COVID-19
កីឡាអន្តរជាតិ
អន្តរជាតិ
Salah និង Elneny តេស្តវិជ្ជមាន COVID-19 លើកទី២, ខកខានជួយ Liverpool និង Arsenal 19, Nov 2020 , 2:28 pm
× Mohamed Salah និង Mohamed Elneny បានធ្វើតេស្តចេញលទ្ធផលវិជ្ជមានជំងឺ COVID-19 ជាលើកទីពីរ។ នេះជាការប្រកាសរបស់សហព័ន្ធកីឡាបាល់ទាត់អេហ្ស៊ីប (EFA) នៅថ្ងៃទី១៨ វិច្ឆិកា។ Salah និង Elneny នឹងត្រូវខកខានជួយក្រុម Liverpool និង Arsenal រៀងៗខ្លួនក្នុងជំនួប Premier League ចុងសប្តាហ៍នេះ។
Salah ខ្សែប្រយុទ្ធរបស់ក្រុម Liverpool ធ្លាប់បានធ្វើតេស្តចេញលទ្ធផលវិជ្ជមាន COVID-19 ម្តងរួចមកហើយ អំឡុងពេលបំពេញកាតព្វកិច្ចឲ្យក្រុមកីឡាបាល់ទាត់ជម្រើសជាតិអេហ្ស៊ីបកាលពីថ្ងៃទី១៣ វិច្ឆិកា ខណៈ Elneny ខ្សែបម្រើ Arsenal បានធ្វើតេស្តវិជ្ជមាននៅ៣ថ្ងៃបន្ទាប់។
ក្រោយរយៈពេល៥ថ្ងៃពីការធ្វើចត្តាឡីស័យខ្លួនឯង ខ្សែប្រយុទ្ធហង្សក្រហមវ័យ២៨ឆ្នាំ បានទទួលបានការធ្វើតេស្តជាថ្មីហើយនៅតែចេញលទ្ធផលវិជ្ជមានដដែល។ ដោយសារមូលហេតុនេះ Salah ដែលស៊ុតបញ្ចូលទី៨គ្រាប់ក្នុងក្របខណ្ឌ Premier League រដូវកាលនេះ នឹងមិនអាចជួយ Liverpool នៅពេលធ្វើដំណើរទៅជួបក្រុមកំពូលតារាង Leicester City ក្នុងជំនួបលីគសប្តាហ៍ទី៩ នៅរាត្រីថ្ងៃទី២២ វិច្ឆិកានេះឡើយ។
Salah ក៏ទំនងជាត្រូវអវត្តមានក្នុងការប្រកួត Champions League ទល់ក្រុម Atalanta នៅថ្ងៃទី២៤ សប្តាហ៍ក្រោយនេះផងដែរ។
ដោយឡែក Elneny វ័យ២៨ឆ្នាំ ដែលស្ថិតនៅដាច់ដោយឡែកដោយសារផ្ទុកជំងឺ COVID-19 ក៏ត្រូវបានគេជឿជាក់ថា នឹងខកខានការធ្វើដំណើរជាមួយ Arsenal ដើម្បីទៅជួប Leeds United នៅយប់ថ្ងៃទី២២ វិច្ឆិកា និងជំនួប Europa League ទល់ក្រុម Molde នៅ៤ថ្ងៃបន្ទាប់ទៀតផងដែរ៕
Tag:
Mohamed Salah
Mohamed Elneny
COVID-19
© រក្សាសិទ្ធិដោយ thmeythmey.com