ជាតិ
សេដ្ឋកិច្ច
អគ្គលេខាធិការរងGMAC៖ ប្រព័ន្ធ GSP របស់អង់គ្លេស នឹងដើរតួរជំនួស EBA សម្រាប់កម្ពុជា
19, Nov 2020 , 10:29 pm
រូបភាពពីក្រសួងការងារ និងបណ្តុះបណ្តាលវិជ្ជាជីវៈ
×![]()
ដោយ: ឡាយ សុភាវតី
ភ្នំពេញ៖ កម្ពុជានឹងទទួលបានប្រព័ន្ធអនុគ្រោះទូទៅ GSP (Generalized Scheme of Preferences) ពីប្រទេសអង់គ្លេសសម្រាប់នាំទំនិញគ្រប់ប្រភេទលើកលែងតែអាវុធនិងគ្រឿងផ្ទុះ ដោយមិនជាប់ពន្ធនិងមិនជាប់ការកំរិតកូតា។ ប្រព័ន្ធ GSP នេះ គឺដើរតួរជំនួសគម្រោង EBA (ប្រព័ន្ធអនុគ្រោះពន្ធគ្រប់ប្រភេទលើកលែងតែអាវុធ)សម្រាប់នាំទំនិញទៅប្រទេសអង់គ្លេសនៅឆ្នាំ២០២១។ 
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជាអះអាងប្រាប់សារព័ត៌មានថ្មីៗថា GSP នឹងដើរតួរជំនួស EBA បាន១០០ភាគរយ សម្រាប់ការនាំចេញទំនិញកម្ពុជា ទៅកាន់អង់គ្លេស ។
លោក កាំង ម៉ូនីកា បានបន្ថែមថា នៅពេលអង់គ្លេសចេញពីសហភាពអឺរ៉ុបជាផ្លូវការនៅថ្ងៃទី១មករា ឆ្នាំ២០២១ ការនាំចេញរបស់កម្ពុជាទៅប្រទេសនេះ គឺចាប់ផ្ដើមគិតតាមប្រព័ន្ធ GSP វិញ។ ប្រព័ន្ធ GSP នេះ គឺផ្ដល់ដល់ប្រទេសដែលមានក្របខណ្ឌចំនួន៣ ក្របខ័ណ្ឌប្រទេសអភិវឌ្ឍតិចតួចបំផុត ក្របខណ្ឌទូទៅ និងក្របខណ្ឌប្រសើរឡើង។
«បច្ចុប្បន្នយើងការនាំចេញទៅUK(អង់គ្លេស) គឺគិតតាមប្រព័ន្ធ EBA របស់អឺរ៉ុប។ ប៉ុន្តែក្រោយពីថ្ងៃ៣១ ធ្នូឆ្នាំនេះទៅ មានន័យថា ថ្ងៃទី១មករា ២០២១ គឺផ្ដើមអនុវត្តប្រព័ន្ធ GPS របស់UK សម្រេចផ្ដល់ភាពអនុគ្រោះដល់កម្ពុជា ក្រោមក្រខណ្ឌប្រទេសមានការអភិវឌ្ឍតិចតួច គឺផ្ដល់ការអនុគ្រោះទាំងស្រុងតែម្ដងដូចEBAអ៊ីចឹង...ពិសេស មុខទំនិញដែលដកចេញពីEBA»។ នេះបើតាមការលើកឡើងរបស់លោក កាំង ម៉ូនីកា ដោយបញ្ជាក់បន្ថែមថា អង់គ្លេស គឺជាប្រទេសដែលកម្ពុជានាំទំនិញក្នុងវិស័យកាត់ដេរទៅច្រើនជាងគេ គឺប្រមាណ៣០ភាគរយ ខណៈអាល្លឺម៉ង់ជាប់លំដាប់ទី២ ក្នុងចំណោមបណ្ដាប្រទេសនៅអឺរ៉ុប ៕
Tag:
GSP
អង់គ្លេស
© រក្សាសិទ្ធិដោយ thmeythmey.com
