ជាតិ
២៥ខេត្ត/រាជធានី
លោក វេង សាខុន ផ្ដើមបេសកកម្មនៅខេត្តកំពង់ឆ្នាំង បន្ទាប់ពីធ្វើចត្តាឡីស័ក 21, Nov 2020 , 11:47 am
លោក វេង សាខុន នាឱកាសចុះពិនិត្យការងារស្ដារដំណាំស្រូវ នាថ្ងៃទី២១ វិច្ឆិកា ២០២០ នៅក្នុងខេត្តកំពង់ឆ្នាំង។ រូបភាពពីគណនីហ្វេសប៊ុកលោក វេង សាខុន។
× លោក វេង សាខុន ចាប់ផ្ដើមបេសកកម្មតាមខេត្តឡើងវិញ បន្ទាប់អនុវត្តន៍ការធ្វើចត្តាឡីស័ក ១៤ថ្ងៃរួចរាល់។ តាមហ្វេសប៊ុករបស់លោករដ្ឋមន្ត្រីកសិកម្ម វេង សាខុន ខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ ឧត្តរមានជ័យ សៀមរាប និងខេត្តកំពង់ធំ ជាគោលដៅក្នុងបេសកកម្មនេះ។
បន្ទាប់ពីបញ្ចប់ការធ្វើចត្តាឡីស័ក ក្រោយព្រឹត្តិការណ៍៣វិច្ឆិកា លោក វេង សាខុន ចាប់ផ្ដើមបេស កកម្មតាមខេត្តឡើងវិញ ដើម្បីបន្តចុះពិនិត្យស្ថានភាពការងារស្ដារ ដំណាំកសិកម្មដែលខូចខាត នាពេលកន្លងមកឡើងវិញ។ តាមទំព័រហ្វេសប៊ុក លោក វេង សាខុន រដ្ឋមន្ត្រីកសិកម្ម ខេត្តកំពង់ឆ្នាំង គឺជាគោលដៅដំបូង បន្ទាប់មកលោករដ្ឋមន្ត្រី នឹងបន្តបេសកកម្មនៅពោធិ៍សាត់ បាត់ដំបង បន្ទាយមានជ័យ ឧត្តរមានជ័យ សៀមរាប និងនៅខេត្តកំពង់ធំ។
គោលបំណងសំខាន់ ក្នុងបេសកកម្មនេះ ដើម្បីពិនិត្យមើលលទ្ធផល នៃការស្តារផលិតកម្មដំណាំស្រូវឡើងវិញ ក្រោយពីប្រជាកសិករទទួលបានស្រូវពូជ, ពិនិត្យស្ថានភាពប្រភពទឹក នៅលើទីតាំងដែលបានស្តារ និងការព្យាករណ៍ការប្រើប្រាស់ទឹកដល់ការប្រមូលផល។ បេសកកម្មនេះ ក៏ដើម្បីពិនិត្យ និងវាយតម្លៃ គុណភាពពូជស្រូវ (អត្រាដំណុះគ្រាប់) ដើម្បីទុកជាទឡ្ហីករណ៍ សម្រាប់ការស្រាវជ្រាវ និងផលិតពូជស្រូវឲ្យកាន់តែល្អប្រសើរឡើង។ នេះបើតាមគណនីហ្វេសប៊ុកលោក វេង សាខុន។
សូមជម្រាបថា រាជធានី-ខេត្តចំនួន២០ បានរងផលប៉ះពាល់ដោយសារគ្រោះទឹកជំនន់កន្លងមក ក្នុងនោះ មាន មនុស្សចំនួនមានពលរដ្ឋប្រមាណ ៦០ម៉ឺននាក់រងផលប៉ះពាល់, មនុស្ស៤៤នាក់បានបាត់បង់ជីវិត និងដំណាំកសិកម្មប្រមាណ ៣៨ម៉ឺនហិកតា ត្រូវបានជន់លិច៕
Tag:
ស្រូវ
កំពង់ឆ្នាំង
ពោធិ៍សាត់
បាត់ដំបង
បន្ទាយមានជ័យ
ឧត្តរមានជ័យ
សៀមរាប
កំពង់ធំ
© រក្សាសិទ្ធិដោយ thmeythmey.com