កីឡាជាតិ
ជាតិ
លោក សួង ភីរម្យ លាលែងពីតំណែងគ្រូបង្វឹកអ្នកចាំទីក្លិបវិសាខា
24, Nov 2020 , 11:17 am
×![]()
ភ្នំពេញ៖ លោក សួង ភីរម្យ បានសុំលាលែងតំណែងគ្រូបង្វឹកអ្នកចាំទីរបស់ក្លិបវិសាខា ក្រោយរួមរស់ជាមួយក្លិបជាង២ឆ្នាំ។ នេះបើតាមការប្រកាសរបស់ក្លិបវិសាខា នៅថ្ងៃទី២៤ វិច្ឆិកា។
ក្លិបកីឡាបាល់ទាត់ វិសាខា បានសរសេរលើហ្វេសប៊ុកដូច្នេះថា៖«សូមអរគុណចំពោះលោកគ្រូ សួង ភីរម្យ សម្រាប់រយៈពេលជាង ២ឆ្នាំកន្លងមក ដែលលោកគ្រូបានខិតខំបំពេញការងារ និងជួយដល់ក្លិបរបស់យើង»។
ចំពោះការលាឈប់របស់លោក សួង ភីរម្យ នេះ ត្រូវបានអ្នកចាត់ការទូទៅនៃក្លឹបបាល់ទាត់វិសាខា លោក ហុក សុចិត្រា បានបញ្ជាក់ថា គ្រូបង្វឹកអ្នកចាំទីរូបនេះ ត្រូវទៅបំពេញការងារជាប្រចាំនៅក្រសួងការពារជាតិវិញ ទើបមិនចង់ឲ្យប៉ះពាល់ដល់ការងារនៅក្នុងក្លិប។
«ដោយសារគាត់(លោក សួង ភីរម្យ)មិនមានពេលវេលាគ្រប់គ្រាន់សម្រាប់ជួយក្លិប ព្រោះគាត់ត្រូវចូលបំពេញការងារនៅក្រសួងការពារជាតិ ដោយសារក្រសួងត្រូវការប្រមូលកងកម្លាំងយោធពលខេមរភូមិន្ទ ឲ្យចូលបំពេញការងារជាប្រចាំវិញ»។ នេះជាការបញ្ជាក់របស់លោក ហុក សុចិត្រា ដែលប្រាប់ពីហេតុផលនៃការឈប់របស់លោក សួង ភីរម្យ។
សម្រាប់ក្លិបវិសាខា ដែលទើបគ្រងតំណែងជើងឯកពានរង្វាន់សម្ដេច ហ៊ុន សែន នៅឆ្នាំ២០២០នេះ ក៏មិនចង់ឲ្យលោក សួង ភីរម្យ ចាកចេញដែរ ប៉ុន្តែវាជាការសម្រេចចិត្តគាត់។ អ្នកចាត់ការទូទៅនៃក្លឹបបាល់ទាត់វិសាខា លោក ហុក សុចិត្រា បាននិយាយដូច្នេះថា៖«យើងមានការសោកស្ដាយដែរ ព្រោះគាត់ជាគ្រូបង្វឹកអ្នកចាំទីមួយដ៏ល្អ ជាធនធានល្អនៅស្រុកខ្មែរយើង ដែលមានបទពិសោធន៍ខ្ពស់ និងមានសញ្ញាប័ត្រខ្ពស់។ ប៉ុន្តែយើងក៏មិនអាចឃាត់គាត់បានដែរ ព្រោះក្របខណ្ឌមន្ត្រីរាជការនេះ គឺជាឆ្នាំងបាយដ៏សំខាន់របស់គាត់»។
លោក សួង ភីរម្យ នឹងត្រូវឈប់ពីតួនាទីគ្រូបង្វឹកអ្នកចាំទី ចាប់ពីថ្ងៃទី១ ធ្នូ ២០២០ ខណៈក្លិបកំពុងសម្លឹងមើលគ្រូបង្វឹក ដែលមានទេពកោសល្យល្អដូចលោក។ លោក សួង ភីរម្យ បានរួមរស់ជាមួយក្លិបវិសាខា ជាង២ឆ្នាំ ក្រោយផ្ទេរពីក្លិបកងយោធពខេមរភូមិន្ទ(អតីតឈ្មោះក្លិបក្រសួងការពារជាតិ) កាលពីពាក់កណ្ដាលឆ្នាំ២០១៨ ៕
Tag:
សួង ភីរម្យ
វិសាខា
បាល់ទាត់
© រក្សាសិទ្ធិដោយ thmeythmey.com
