COVID-19
ជាតិ
អន្តរជាតិ
មន្ត្រីជាន់ខ្ពស់ចិន៖ ប្រព័ន្ធផ្សព្វផ្សាយប្រទេស LMC រួមចំណែកសំខាន់ក្នុងការប្រយុទ្ធជំងឺកូវីដ-១៩
25, Nov 2020 , 8:29 am
លោក ហ័ង ឃុនមីង (រូបទី១ ផ្នែកខាងលើ) ថ្លែងក្នុងសារវីដេអូ។
×![]()
ដោយ: សារព័ត៌មានថ្មីៗ
មន្ត្រីជាន់ខ្ពស់បក្សកុម្មុយនីស្តចិន លោក ហ័ង ឃុនមីង (Huang Kunming) លើកឡើងថា ប្រព័ន្ធផ្សព្វផ្សាយក្នុងប្រទេសទន្លេមេគង្គ-ឡានឆាង មានចំណែកសំខាន់ក្នុងការប្រយុទ្ធប្រឆាំងជំងឺកូវីដ-១៩ ។ លោក ហ័ង លើកឡើងបែបនេះនាក្នុងជំនួបប្រព័ន្ធផ្សព្វផ្សាយអនឡាញនៃកិច្ចសហប្រតិបត្តិការមេគង្គ-ឡានឆាន (LMC) នៅថ្ងៃទី២៤ ខែវិច្ឆិកា។ លោក ហ័ង ក៏ស្នើឲ្យប្រព័ន្ធឃោសនានានា ផ្សព្វផ្សាយពីការអភិវឌ្ឍ និងកិច្ចសហប្រតិបត្តិការរវាងប្រទេសទាំង៦។ 
ក្នុងជំនួបប្រព័ន្ធផ្សព្វផ្សាយអនឡាញនៃកិច្ចសហប្រតិបត្តិការមេគង្គ-ឡានឆាន (LMC) ដែលរៀបចំពីទីក្រុងប៉េកាំង លោក ហ័ង ឃុនមីង សមាជិកការិយាល័យនយោបាយនៃគណៈមជ្ឈិមបក្សកុម្មុយនីស្តចិន និយាយថា ជំងឺកូវីដ-១៩ នៅតែមានសភាពធ្ងន់ធ្ងរ។ ក្នុងន័យនេះ លោកលើកឡើងពីតួនាទីប្រព័ន្ធផ្សព្វផ្សាយក្នុងការប្រយុទ្ធប្រឆាំងជំងឺកូវីដ-១៩ ក្នុងប្រទេសតំបន់មេគង្គ-ឡានឆាង។
លោក អ៊ឹង ចំរើន និពន្ធនាយកសារព័ត៌មានថ្មីៗ ថ្លែងសុន្ទករថាតាមរយៈវីដេអូ។
«ខ្ញុំជឿជាក់ថា ការប្រមូលផ្ដុំកម្លាំងដូចទឹកទន្លេហូរទៅមុខ នឹងជួយយើងយកឈ្នះជំងឺកូវីដ-១៩។» លោក ហ័ង ថ្លែងបែបនេះក្នុងសារជាវីដេអូនាកិច្ចប្រជុំដែលរៀបចំដោយកាសែតប្រជាជនចិន (People’s Daily)។ លោក ហ័ង ដែលជាប្រធានគណៈឃោសនាបក្សកុម្មុយនីស្តចិនផង ជំរុញឲ្យប្រព័ន្ធផ្សព្វផ្សាយបង្កើនកិច្ចសហប្រតិបត្តិការរវាងប្រទេសសមាជិក៦ ផ្សាយពីការអភិវឌ្ឍក្នុងតំបន់ សាមគ្គីភាព និងការរួបរួមគ្នា។
កិច្ចសហប្រតិបត្តិការមេគង្គ-ឡានឆាង ត្រូវបានបង្កើតនៅឆ្នាំ២០១៦ ដោយមានសមាជិក៦ប្រទេសដូចជាចិន មីយ៉ាន់ម៉ា ថៃ ឡាវ កម្ពុជា និងវៀតណាម។ ឡានឆាង ជាឈ្មោះទន្លេមេគង្គដែលត្រូវបានហៅនៅក្នុងប្រទេសចិន។ កិច្ចសហប្រតិបត្តិការនេះ ផ្ដោតលើការជំរុញវិស័យនានាដូចជាធនធានទឹក សេដ្ឋកិច្ច និងការផ្លាស់ប្ដូររវាងប្រជាជន និងប្រជាជន។ ប្រព័ន្ធផ្សព្វផ្សាយក៏ជាវិស័យមួយនៃកិច្ចសហប្រតិបត្តិការដែរ។
អ្នកសារព័ត៌មានជាច្រើនមកពីអង្គភាពនានានៃប្រទេសទាំង៦ ចូលរួមក្នុងកិច្ចប្រជុំមួយថ្ងៃនេះ។ លោក អ៊ឹង ចំរើន និពន្ធនាយកសារព័ត៌មានថ្មីៗ និងអ្នកសារព័ត៌មានកម្ពុជាមួយចំនួនទៀត ក៏មានវត្តមាន និងថ្លែងសុន្ទរកថាគន្លឹះនាកិច្ចប្រជុំនេះដែរ។
ក្នុងកម្មវិធីដដែលនេះ អនុរដ្ឋមន្ត្រីការបរទេសចិន លោក ឡ័ក ចាវហួយ (Luo Zhaohui) ចាត់ទុកប្រព័ន្ធផ្សព្វផ្សាយជាសាក្សី ជាអ្នកកត់ត្រាកិច្ចសហប្រតិបត្តិការប្រទេស LMC ។ លោកអះអាងថា ចិនមានជំហរបន្តចាប់ដៃជាមួយប្រទេស៥ទៀតដើម្បីជំរុញកិច្ចសហប្រតិបត្តិការលើវិស័យអប់រំ និងកសិកម្មផងដែរ។ ចិនក៏នឹងបន្តធ្វើការជាមួយប្រទេស LMC ឯទៀតក្នុងការស្ដារសេដ្ឋកិច្ចឡើងវិញក្រោយជំងឺកូវីដ-១៩៕
Tag:
ចិន
LMC
© រក្សាសិទ្ធិដោយ thmeythmey.com
