សង្គមអន្តរជាតិ
អន្តរជាតិ
ប៉ូលិសថៃ កោះហៅមេដឹកនាំបាតុកម្ម១២រូបជុំវិញបទចោទប្រមាថស្ដេចដែលអាចជាប់គុក១៥ឆ្នាំ 25, Nov 2020 , 5:21 pm
ក្រុមបាតុករថៃ បង្ហាញម្រាមដៃ៣ នៅក្នុងទីក្រុងបាងកក នៅថ្ងៃទី១៨ ខែវិច្ឆិកា ឆ្នាំ២០២០។ រូបភាព៖ Reuters
× មេដឹកនាំបាតុកម្មថៃចំនួន ១២រូប ត្រូវបានប៉ូលិសថៃកោះហៅ ដើម្បីសួរចម្លើយជុំវិញការបរិហារកេរ្តិ៍ព្រះមហាក្សត្រ។ នេះ គឺជាលើកទីមួយហើយ ចាប់តាំងពីឆ្នាំ២០១៨ ដែលច្បាប់ការពារព្រះមហាក្សត្រ ត្រូវបានយកមកប្រើប្រាស់ឡើងវិញ បន្ទាប់ពីលោក ប្រាយុទ្ធ ចន្ទអូចា នាយករដ្ឋមន្ត្រីថៃ បានផ្តល់ភ្លើងបៃតងដល់អាជ្ញាធរអាចប្រើប្រាស់ច្បាប់គ្រប់ទាំងអស់ ដើម្បីដោះស្រាយជាមួយបាតុករ ដែលបំពានច្បាប់។
បាតុកម្ម នៅថៃហាក់ដូចជាកើនឡើងកម្តៅជាងមុន ដោយសារក្រុមបាតុករនៅតែទទូចឲ្យលោកប្រាយុទ្ធ ចាន់អូចា នាយករដ្ឋមន្ត្រីថៃ ចុះចេញពីតំណែង វិសោធនកម្មរដ្ឋធម្មនុញ្ញ និងកំណែទម្រង់ស្ថាប័នព្រះមហាក្សត្រជាដើម។ ស្របពេលគ្នានេះ លោកនាយករដ្ឋមន្ត្រី បានផ្តល់ភ្លើងបៃតង ដល់អាជ្ញាធរអាចប្រើប្រាស់ច្បាប់ផ្សេងៗ ដើម្បីទប់ទល់ជាមួយក្រុមបាតុករណា ដែលហ៊ានបំពានស្ថាប័នព្រះមហាក្សត្រ និងមិនគោរពច្បាប់ជាដើម។
ទាក់ទិននឹងច្បាប់ការពារព្រះមហាក្សត្រនេះ មេដឹកនាំក្រុមបាតុកម្មថៃចំនួន ១២រូប ត្រូវបានប៉ូលិសថៃកោះហៅទៅសួរចម្លើយ ជុំវិញបទបរិហារកេរ្តិ៍មហាក្សត្រ។ តាមមាត្រា ១១២នៃក្រមព្រហ្មទណ្ឌថៃ ជនទាំងឡាយណា ដែលបានបង្ខូចកេរ្តិ៍ឈ្មោះ ញុះញង់ និងគំរាមកំហែងព្រះមហាក្សត្រ ព្រះមហាក្សត្រី និង ព្រះញាតិវង្សានុវង្ស អាចជាប់ពន្ធនាគាររហូតដល់ ១៥ឆ្នាំ។
ក្នុងចំណោមអ្នកទាំង ១២នាក់នោះ មានមនុស្សមួយចំនួន ធ្លាប់រងនូវបទចោទ ជុំវិញបាតុកម្មនៅថៃកន្លងមក។ អ្នកទាំងនោះមានដូចជា មេធាវីការពារសិទ្ធិមនុស្សលោក Anon Nampa, លោក Anon Numpha និងមេដឹកនាំនិស្សិត កញ្ញា Panusaya Sithijirawathanakul និងលោក Parit Chiwarak ជាដើម។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
កន្លងទៅ ក្រុមបាតុករថៃ បានប្រកាសថា នឹងធ្វើបាតុកម្មនៅមុខការិយាល័យទ្រព្យសម្បត្តិព្រះមហាក្សត្រ នៅថ្ងៃទី២៥ ខែវិច្ឆិកា ដើម្បីទាមទារឲ្យមហាក្សត្រ មហា វជិរាលង្ករណ៍ បោះបង់ការកាន់កាប់ទ្រព្យសម្បត្តិផ្ទាល់ខ្លួនមួយចំនួន។ យ៉ាងណាមិញ បាតុករបានផ្លាស់ប្ដូរទីតាំងតវ៉ាវិញ ខណៈដែលប៉ូលិសបានបិទផ្លូវជុំវិញរាជវាំង និងស្នាក់ការការិយាល័យទ្រព្យសម្បត្តិស្ដេច។ ប៉ូលិសថៃ ត្រៀមដាក់ពង្រាយកម្លាំងប្រមាណ៦ពាន់នាក់ ដើម្បីគ្រប់គ្រងក្រុមបាតុករ។
តាមការប៉ាន់ស្មានកន្លងមក មហាក្សត្រ មហា វជិរាលង្ករណ៍ បានកាន់កាប់ទ្រព្យសម្បត្តិ ដែលមានតម្លៃប្រមាណពី៣០ ទៅ៤០ពាន់លានដុល្លារ។ យ៉ាងណាក៏ដោយ តម្លៃទ្រព្យសម្បត្តិជាក់លាក់ នៅតែរឿងសម្ងាត់ និងមិនទាន់ត្រូវបានទម្លាយជាសាធារណៈនៅឡើយទេ៕
© រក្សាសិទ្ធិដោយ thmeythmey.com