អន្តរជាតិ
លោក ស៊ី ផ្ញើសារអបអរលោក បៃឌិន ដោយសង្ឃឹមថា អាមេរិកនិងចិនមានទំនាក់ទំនងឈ្នះ-ឈ្នះ
26, Nov 2020 , 10:41 am
លោក ស៊ី ជិនភីង ចាប់ដៃជាមួយលោក ចូ បៃឌិន នៅវិមានប្រជាជានចិន ក្នុងទីក្រុង ប៉េកាំង កាលពីខែធ្នូ ឆ្នាំ២០១៣ ។ រូបភាព៖ AFP
×![]()
ប្រធានាធិបតីចិន ស៊ី ជិនភីង បានផ្ញើសារអបអរសាទរជ័យជម្នះរបស់ប្រធានាធិបតីជាប់ឆ្នោត ចូ បៃឌិន ហើយសង្ឃឹមថា ប្រទេសទាំងពីរ នឹងប្រកាន់ខ្ជាប់កិច្ចសហប្រតិបត្តិការឈ្នះ-ឈ្នះ ទោះបីកំពុងមានជម្លោះរាប់ចាប់ពីវិស័យពាណិជ្ជកម្ម បច្ចេកវិទ្យា និងសន្តិសុខដែលកើតឡើងក្រោមរដ្ឋបាលលោក ដូណាល់ ត្រាំ ក្ដី។ 
អត្ថបទទាក់ទង
ក្នុងសារអបអរដែលចុះផ្សាយទីភ្នាក់ងារព័ត៌មាន Xinhua នៅថ្ងៃទី ២៥ ខែវិច្ឆិកា លោក ស៊ី ជិនភីង បានប្រាប់លោក ចូ បៃឌិនថា ទំនាក់ទំនងដែលល្អនិងមានស្ថិរភាពរបស់ចិននិងអាមេរិក ជាការរំពឹងទុករួមគ្នាមួយនៃសហគមន៍អន្តរជាតិ។
«យើងសង្ឃឹមថា ភាគីទាំងពីរ នឹងប្រកាប់ខ្ជាប់នូវស្មារតីមិនប្រឈមមុខដាក់គ្នា និងមិនបង្កជម្លោះ គោរពគ្នាទៅវិញទៅមក ក៏ដូចជាកិច្ចសហប្រតិបត្តិការឈ្នះ-ឈ្នះ»។ ប្រធានាធិបតី ស៊ី បញ្ជាក់បែបនេះ មុននឹងរំពឹងទុកទៀតថា ចិននិងអាមេរិក នឹងផ្តោតសំខាន់លើកិច្ចសហប្រតិបត្តិការ ចេះគ្រប់គ្រងភាពខុសគ្នា ព្រមទាំងលើកកម្ពស់ការអភិវឌ្ឍល្អ និងមានស្ថិរភាពក្នុងទំនាក់ទំនងរវាងប្រជាជាតិទាំងពីរ។
ក្រសួងការបរទេសចិន បានអបអរលោក បៃឌិន កាលពីថ្ងៃទី ១៣ ខែវិច្ឆិកា ពោលគឺជិត១សប្ដាហ៍ក្រោយសម្ព័ន្ធមិត្តអាមេរិកជាច្រើនបានធ្វើបែបនេះ។ ក្នុងឆ្នាំ២០១៦ លោក ស៊ី បានផ្ញើសារអបអរជ័យជម្នះប្រធានាធិបតី ដូណាល់ ត្រាំ ក្នុងថ្ងៃទី ៩ ខែវិច្ឆកា ពោលគឺ១ថ្ងៃប៉ុណ្ណោះក្រោយចប់បោះឆ្នោត។
បើតាមទីភ្នាក់ងារព័ត៌មានរដ្ឋចិន អនុប្រធានាធិបតីចិន វ៉ាង ឈីសាន ក៏បានអបអរអនុប្រធានាធិបតីអាមេរិកជាប់ឆ្នោត អ្នកស្រី កាម៉ាឡា ហារីស ។
ជាង១០ថ្ងៃមកហើយក្រោយចិនចេញសារអបអរលោកបៃឌិន រុស្ស៊ីនៅតែរក្សាភាពស្ងៀមស្ងាត់ដដែល។ ក៏ប៉ុន្តែ វិមានក្រេមឡាំង បានបញ្ជាក់ក្នុងសេចក្តីថ្លែងការណ៍មួយកាលពីថ្ងៃទី២៤ ខែវិច្ឆិកាថា ប្រធានាធិបតីរុស្ស៊ី វ្ល៉ាឌីមៀ ពូទីន នឹងមិនអបអរជ័យជម្នះរបស់លោក បៃឌិន នោះឡើយ ទោះបីជារដ្ឋបាលលោក ត្រាំ បានបើកភ្លើងបៃតងក្នុងការដំណើរការនីតិវិធីផ្ទេរអំណាចផ្លូវការ។
គួរបញ្ជាក់ដែរថា ទំនាក់ទំនងរវាងសហរដ្ឋអាមេរិកនិងចិន មានភាពល្អក់កករខ្លាំងបំផុតអំឡុងពេល៤ឆ្នាំនៃអាណត្តិលោកត្រាំ ជាពិសេសជម្លោះលើវិស័យជាច្រើន រាប់ចាប់ពីពាណិជ្ជកម្ម បច្ចេកវិទ្យា សន្តិសុខ ហើយចុងក្រោយវិបត្តិសុខភាពសាធារណៈកូវីដ-១៩៕
Tag:
ចិន
សហរដ្ឋអាមេរិក
ស៊ី ជិនភីង
ចូ បៃឌិន
© រក្សាសិទ្ធិដោយ thmeythmey.com
