ខ្សែភាពយន្ត Surviving Bokator ទទួលបានជ័យជម្នះក្នុងការប្រកួតភាពយន្តនៅអ៊ីតាលី

កីឡាជាតិ

ជាតិ

ខ្សែភាពយន្ត Surviving Bokator ទទួលបានជ័យជម្នះក្នុងការប្រកួតភាពយន្តនៅអ៊ីតាលី

26, Nov 2020 , 7:29 pm

រូបភាព

ដោយ:

ខ្សែភាពយន្តការរស់ឡើងវិញនៃគុនល្បុក្កតោ «Surviving Bokator» ទទួលបានជ័យជម្នះក្នុងការប្រកួតភាពយន្តនិងកីឡាប្រចាំព្រឹត្តិការណ៍ជើងឯកពិភពលោក World FICTS Challenge នៅមហោស្រពភាពយន្ត និងទូរទស្សន៍កីឡានៅប្រទេសអ៊ីតាលី។ ខ្សែភាពយន្តជាង៩០០មកពីមហោស្រពចំនួន២០ត្រូវបានដាក់ឲ្យចូលរួមប្រកួតប្រជែងក្នុងព្រឹត្តិការណ៍នេះ។

ចុចទីនេះដើម្បីទទួលបានព័ត៌មានរហ័ស

ខ្សែភាពយន្ត Surviving Bokator ដែលជាកិច្ចសហការរវាងគណៈកម្មាធិការជាតិអូឡាំពិកម្ពុជា សហព័ន្ធកីឡាគុនល្បុក្កតោកម្ពុជា និងផលិតកម្មភាពយន្ត Cineboxx Film & Television Inc របស់កាណាដា ទទួលបានជ័យជម្នះក្នុងការប្រកួតភាពយន្តកីឡាក្នុងព្រឹត្តិការណ៍លំដាប់ពិភពលោក World FICTS Challenge នៅមហោស្រពមីនីណូអន្តរជាតិលើកទី៣៨នៅអ៊ីតាលី។

បច្ចុប្បន្នមហោស្រពអន្តរជាតិ ដែលបង្កើតឡើងតាំងពីឆ្នាំ១៩៨៣ មួយនេះ មានប្រទេសជាសមាជិកចំនួន១១៦ និងទទួលបានការទទួលស្គាល់ពីគណៈកម្មាធិការអូឡាំពិកអន្តរជាតិ(IOC)។ បើតាមសេចក្តីប្រកាសព័ត៌មាន World FICTS Challenge កាលពីថ្ងៃទី២៣ វិច្ឆិកា ដែលសារព័ត៌មានថ្មីៗទើបទទួលបាននៅថ្ងៃទី២៥ វិច្ឆិកា ខ្សែភាពយន្ត Surviving Bokator បានឆ្លងកាត់ការប្រកួតវគ្គជម្រុះជាបន្តបន្ទាប់ និងចុងក្រោយបានប្រកួតប្រជែងជាមួយខ្សែភាពយន្តចំនួន៩៧០ មកពី២០មហោស្រព។

ខ្សែភាពយន្ត Surviving Bokator ត្រូវបានផលិតករអូស្ត្រលីលោក Mark Bochsler និងលោកស្រី Sandra Leuba ចាប់យកដំណើររឿងរបស់លោកព្រឹទ្ធាចារ្យ សាន គីមស៊ាន ដែលបានខិតខំតស៊ូជីកកកាយគុនល្បុក្កតោឲ្យរស់ឡើងវិញ ក្រោយរបបប្រល័យពូជសាសន៍ ប៉ុល ពត និងបន្តសិក្សាស្រាវជ្រាវ ចងក្រង និងអភិរក្សសម្រាប់យុវជនមកដល់បច្ចុប្បន្ន។

គុនល្បុក្កតោស្ទើរត្រូវបានបាត់បង់ទាំងស្រុងក្នុងរបបកម្ពុជាប្រជាធិបតេយ្យចន្លោះពី១៩៧៥-១៩៧៩។ អ្នកចេះក្បាច់មួយចំនួនត្រូវបានរស់នៅដោយលាក់បាំងអត្តសញ្ញាណ និងអ្នកខ្លះទៅជ្រកកោននៅតាមទីវត្តអារាម។ ក្រោយរបបដឹកនាំដោយខ្មែរក្រហមមួយនេះដួលរលំ លោកព្រឹទ្ធាចារ្យ សាន គីមស៊ាន បានបង្កើតចលនាប្រមែប្រមូលអ្នកគុនល្បុក្កតោ ដើម្បីស្តារក្បាច់គុននេះឲ្យរស់ឡើងវិញ។

ផលិតករ Mark Bochsler បង្ហាញការភ្ញាក់ផ្អើលយ៉ាងខ្លាំងចំពោះជោគជ័យមួយនេះ និងចាត់ទុកជាព្រឹត្តិការណ៍មិនគួរឲ្យជឿ។ លោកបានបង្ហាញពីអារម្មណ៍ដូច្នេះថា៖«សម្រាប់យើងជាផលិតករ ភាពយន្ត Surviving Bokator មិនត្រឹមតែជាខ្សែភាពយន្តប៉ុណ្ណោះទេ វាគឺជាដំណើរដ៏អស្ចារ្យមួយ ហើយយើងមានកិត្តិយសណាស់ ដែលបានដើរតួនាទីតូចមួយ ក្នុងការរួមចំណែកនៃការរស់ឡើងវិញនៃវប្បធម៌របស់ប្រទេសកម្ពុជា»។

ភាពយន្តឯកសារ Surviving Bokator ត្រូវបានចាក់បញ្ចាំងលើកដំបូងលើឆាកអន្តរជាតិក្នុងព្រឹត្តិការណ៍មហោស្រពសិល្បៈក្បាច់គុនពិភពលោកជុងប៊ូកនៅសាធារណរដ្ឋកូរ៉េ។ បន្ទាប់មកភាពយន្តនេះ ត្រូវបានចាក់បញ្ចាំងក្នុងមហោស្រពភាពយន្តអន្តរជាតិកម្ពុជានៅឆ្នាំ២០១៨ និងបានចាក់ផ្សាយក្នុងមហោស្រពអន្តរជាតិជាច្រើនលើពិភពលោកផងដែរ។

ភាគីពាក់ព័ន្ធទាំងបីខាងលើប្តេជ្ញាថា ពួកគេនឹងធ្វើយុទ្ធនាការចាក់ផ្សាយខ្សែភាពយន្តឯកសារ Surviving Bokator នៅជុំវិញពិភពលោក ដើម្បីផ្សព្វផ្សាយពីកីឡាវប្បធម៌ប្រពៃណីខ្មែរមួយនេះឲ្យកាន់តែមានភាពទូលំទូលាយ និងទទួលបានការគាំទ្រកាន់តែច្រើនថែមទៀត៕

Tag:

ល្បុក្កតោ

Surviving Bokator