COVID-19
អន្តរជាតិ
ក្រុមហ៊ុន AstraZeneca ថា វ៉ាក់សាំងខ្លួន ត្រូវការការសិក្សាបន្ថែមទៀត 27, Nov 2020 , 11:58 am
ដបថ្នាំ ដែលត្រូវសរសេរថាវ៉ាក់សាំងកូវីដ-១៩ ជាមួយយីហោក្រុមហ៊ុន AstraZeneca និងឈ្មោះសកលវិទ្យាល័យ Oxford។ រូបភាព៖ AFP
× ក្រុមហ៊ុនផលិតថ្នាំពេទ្យដ៏ធំរបស់អង់គ្លេសAstraZeneca នៅថ្ងៃទី២៦ ខែវិច្ឆិកា បានអះអាងថា វ៉ាក់សាំងប្រឆាំងកូវីដ-១៩ របស់ខ្លួន ត្រូវការការសិក្សាបន្ថែមទៀត បន្ទាប់ពីមានសំណួរមួយចំនួនបានលេចឡើងជុំវិញប្រសិទ្ធភាពរបស់វ៉ាក់សាំងដែលប្រែប្រួលទៅតាមបរិមាណវ៉ាក់សាំងដែលបានចាក់។ ប៉ុន្តែការសិក្សាបន្ថែមនេះ នឹងមិនធ្វើឲ្យប៉ះពាល់ ដល់នីតិវិធីនៃការផ្តល់អាជ្ញាប័ណ្ណវ៉ាក់សាំងនៅអង់គ្លេសឡើយ។
ថ្មីៗនេះ ក្រុមហ៊ុនថ្នាំពេទ្យ AstraZeneca បានប្រកាសថា វ៉ាក់សាំងប្រឆាំងកូវីដ-១៩របស់ខ្លួន មានប្រសិទ្ធិភាពជាមធ្យមចំនួន ៧០ភាគរយ។ ក្រុមហ៊ុនថ្នាំពេទ្យ បានសាកល្បងលើអ្នកចូលរួមសាកល្បងវ៉ាក់សាំងចំនួនពីរក្រុម។
មនុស្សមួយក្រុម ត្រូវចាក់វ៉ាក់សាំងតែពាក់កណ្តាលដូសប៉ុណ្ណោះ ហើយមួយខែក្រោយទើបគេចាក់មួយដូស។ លទ្ធផលរបស់ក្រុមនេះ បង្ហាញថា វ៉ាក់សាំងប្រឆាំងកូវីដ-១៩ មានប្រសិទ្ធភាពរហូតដល់ ៩០ភាគរយ។ ផ្ទុយទៅវិញ មនុស្សមួយក្រុមទៀត ដែលត្រូវចាក់វ៉ាក់សាំង មួយដូសលើកដំបូង និង១ខែក្រោយ ត្រូវចាក់ មួយដូសទៀត ដែលលទ្ធផលបង្ហាញឲ្យឃើញថា មានប្រសិទ្ធភាពត្រឹមតែ៦២ភាគរយ។ លទ្ធផលនេះមានន័យថា ការចាក់វ៉ាក់សាំងមានបរិមាណតិចជាង មានប្រសិទ្ធភាពជាង។
ទាក់ទិននឹងបញ្ហានេះ លោក Pascal Soriot ប្រធានប្រតិបត្តិនៃក្រុមហ៊ុនថ្នាំពេទ្យអង់គ្លេសដ៏ធំខាងលើ បានបញ្ជាក់ថា AstraZeneca អាចសិក្សាបន្ថែមទៀត ដើម្បីវាយតម្លៃថា តើហេតុអ្វីបានជាវ៉ាក់សាំង ដែលមានកម្រិតដូសតិចជាងមានប្រសិទ្ធភាពល្អជាងវ៉ាក់សាំងដែលមានកម្រិតដូសពេញ?
ប្រធានប្រតិបត្តិ AstraZeneca បានបន្តទៀតថា ពេលនេះ ក្រុមហ៊ុនបានរកឃើញថា វ៉ាក់សាំងមានប្រសិទ្ធភាពខ្ពស់ជាងមុខ ហើយក្រុមហ៊ុនត្រូវតែសិក្សាបន្ថែមទៀត ដើម្បីឲ្យដឹងច្បាស់ពីប្រសិទ្ធភាពជាក់លាក់របស់វា។ បើតាមលោក Soriot ក្រុមហ៊ុន អាចនឹងមានការសិក្សាជាអន្តរជាតិបន្ថែមទៀត ប៉ុន្តែការសិក្សានោះ ត្រូវតែលឿន ដោយសារតែក្រុមហ៊ុន បានដឹងថា វ៉ាក់សាំងមានប្រសិទ្ធភាពខ្ពស់រួចស្រេច ហើយក្រុមហ៊ុនត្រូវការតែមនុស្សមួយក្រុមតូចប៉ុណ្ណោះក្នុងការសិក្សា។
តាមការចុះផ្សាយរបស់សារព័ត៌មាន Al Jazeera ក្រុមអ្នកវិទ្យាសាស្ត្រមួយចំនួន បានសង្ស័យពីប្រសិទ្ធិភាពរបស់វ៉ាក់សាំងAstraZeneca ដែលមានកម្រិតខ្ពស់រហូតដល់ ៩០ភាគរយ បន្ទាប់ពីចាក់លើអ្នកចូលរួម ដែលដំបូងឡើយមានបញ្ហាមួយចំនួនបានកើតឡើង។
បើទោះបីជាមានការសិក្សាបន្ថែមលើវ៉ាក់សាំងក្តី ប៉ុន្តែប្រធានប្រតិបត្តិរបស់ក្រុមហ៊ុនលើកឡើងថា វាមិនបានបង្អាក់នីតិវិធីនៃការផ្តល់អាជ្ញាប័ណ្ណដល់វ៉ាក់សាំងរបស់ក្រុមហ៊ុនខ្លួនឡើយ។ ចំណែករដ្ឋមន្ត្រីសុខាភិបាលអង់គ្លេស លោក Matt Hancock ក៏បានស្នើទៅអ្នកផ្តល់អាជ្ញាប័ណ្ណលើវ៉ាក់សាំង វាយតម្លៃលើវ៉ាក់សាំងក្រុមហ៊ុន AstraZeneca ផងដែរ ដោយសង្ឃឹមថា កម្មវិធីចាក់វ៉ាក់សាំង អាចចាប់ផ្តើមមុនថ្ងៃបុណ្យណូអែល៕
© រក្សាសិទ្ធិដោយ thmeythmey.com