អន្តរជាតិ
ក្រុមបាតុករ ធ្វើបាតុកម្មប្រឆាំងនឹងការគ្រប់គ្រងកងទ័ពដោយមហាក្សត្រថៃ
30, Nov 2020 , 2:26 pm
ប៉ូលិសថៃ ឈរត្រៀមបង្ហាករបាតុករនៅមុខបន្ទាយទាហាន។ រូបភាព៖AP
×![]()
បាតុករជាយុវជនថៃរាប់ពាន់នាក់ នៅថ្ងៃទី២៩ វិច្ឆិកា បានធ្វើបាតុកម្មនៅមុខបន្ទាយកងវរសេនាធំលេខ១ និងលេខ១១ នៅជាយទីក្រុងបាងកក ក្នុងគោលបំណងទាមទារឲ្យមានកំណែទម្រង់របបរាជានិយម។ អង្គភាពយោធាទាំងពីរបូកនឹងអង្គភាពមួយចំនួនទៀត ស្ថិតក្រោមការគ្រប់គ្រងដោយផ្ទាល់របស់មហាក្សត្រ មហា វជិរាលង្ករណ៍ ដែលកាន់កាប់ដោយផ្ទាល់ទ្រព្យសម្បត្តិរាប់សិបពាន់លានដុល្លារទៀត។
ក្រៅតែពីបានធ្វើបាតុកម្ម នៅមុខការិយាល័យទ្រព្យសម្បត្តិស្ដេច និងធនាគារពាណិជ្ជសៀម(SCB) ដែលមានភាគហ៊ុនចំនួន២៣ភាគរយជារបស់មហាក្សត្រ បាតុករថៃ ក៏ទៅធ្វើបាតុកម្មនៅមុខបន្ទាយយោធាដែលកាន់កាប់ដោយមហាក្សត្រម្តង។ សម្រាប់ក្រុមបាតុករ ការកាន់កាប់ទ្រព្យសម្បត្តិរាប់ពាន់លានដុល្លារ និងគ្រប់គ្រងអង្គភាពយោធាមួយចំនួនដោយមហាក្សត្រ មហា វជិរាលង្ករណ៍ បង្ហាញពីឥទ្ធិពលដែលទ្រង់មាននៅក្នុងសង្គម និងឆាកនយោបាយថៃដែលគួរណាស់តែមានកំណែទម្រង់។
កាលពីខែតុលា ឆ្នាំ២០១៩ កងវរសេនាធំថ្មើរជើងលេខ១ និង១១ ត្រូវផ្ទេរទៅស្ថិតនៅក្រោមការគ្រប់គ្រងដោយផ្ទាល់នៃបញ្ជាការដ្ឋានសន្តិសុខមហាក្សត្រ និងទទួលបញ្ជាពីមហាក្សត្រថៃ។ ចំពោះបាតុកម្មនៅថ្ងៃទី២៩ វិច្ឆិកា ដំបូងឡើយក្រុមបាតុករគ្រោងនឹងធ្វើបាតុម្មនៅមុខបន្ទាយកងវរសេនាធំថ្មើរជើងលេខ១ ប៉ុន្តែត្រូវបានប៉ូលិសរាំងខ្ទប់ទាន់ ទើបបង្វែរមកធ្វើបាតុកម្មនៅមុខបន្ទាយកងវរសេនាធំថ្មើរជើងលេខ១១វិញ។
លោក Parit Chiwarak អ្នកដឹកនាំបាតុកម្មមួយរូបលើកឡើងថា កងវរសេនាធំទាំង២នេះ ធ្លាប់ជាប់ពាក់ព័ន្ធក្នុងការប្រើប្រាស់អំពើហិង្សាដើម្បីបំបែកការជួបជុំនយោបាយ ក៏ដូចជាចូលរួមក្នុងការធ្វើរដ្ឋប្រហារជាច្រើនដងផងដែរ។ លោក Parit អះអាងបន្តថា បាតុកម្មនៅថ្ងៃទី២៩ វិច្ឆិកានេះ ជាបង្ហាញពីសំឡេងប្រឆាំងទៅនឹងការគ្រប់គ្រងកងទ័ពដោយមហាក្សត្រ។ លោកបន្ថែមថា រដ្ឋាភិបាលជាអ្នកទទួលខុសត្រូវចំពោះសន្តិសុខរបស់ព្រះមហាក្សត្រ។
«គ្មានប្រទេសប្រជាធិបតេយ្យណាមួយ ដែលមហាក្សត្រគ្រប់គ្រងកងទ័ពឡើយ។ ក្នុងប្រទេសប្រជាធិបតេយ្យ ព្រះមហាក្សត្រជាព្រះប្រមុខរដ្ឋ ចំណែកកងកម្លាំងប្រដាប់អាវុធស្តាប់បញ្ជារដ្ឋាភិបាល»។ នេះជាការលើកឡើងរបស់លោក Arnon Nampa មេដឹកនាំបាតុកម្ម និងជាអ្នកទាមទារយ៉ាងមុះមុតឲ្យមានកំណែទម្រង់របបរាជានិយមដែលផ្សាយដោយទីភ្នាក់ព័ត៌មាន Reuters។
បញ្ជាការដ្ឋានសន្តិសុខព្រះមហាក្សត្រ ត្រូវបានបង្កើតឡើងក្នុងឆ្នាំ១៩៩២។ ថ្វីត្បិតតែបញ្ជាការដ្ឋាននេះស្ថិតក្រោម កងទ័ពថៃ ប៉ុន្តែមិនទទួលបញ្ជាពីបញ្ជាការដ្ឋានកងទ័ពឡើយ។ បញ្ជាការដ្ឋាននេះ ក៏រួមបញ្ចូលផងដែរអង្គរក្សព្រះមហាក្សត្រ ដែលបង្កើតឡើងតាំងតែពីឆ្នាំ១៨៥៩ ក្នុងរជ្ជកាលមហាក្សត្រជូឡាឡុងកន។ ក្រុមបាតុករ ក៏បានទាមទារផងដែរ ឲ្យប្តូរឈ្មោះអង្គរក្សព្រះមហាក្សត្រ ទៅជា «អង្គរក្សប្រជាជន» វិញ។
ក្រោយបាតុកម្មនេះបញ្ចប់ទៅ លោក Parit អះអាងថានឹងមានការជួបជុំនៅថ្ងៃទី២ ធ្នូ នៅមុខតុលាការធម្មនុញ្ញថៃ។ តុលាការធម្មនុញ្ញថៃ នឹងចេញសាលក្រមទាក់ទងនឹងការល្មើសទៅនឹងវិន័យកងទ័ព របស់លោកនាយករដ្ឋមន្ត្រីប្រាយុទ្ធ ចន្ទអូចា និងលោកឧបនាយករដ្ឋមន្ត្រី Prawit Wongsuwan ចំពោះការបន្តរស់នៅក្នុងផ្ទះយោធា បើទោះបីជាលោកចូលនិវត្តន៍ហើយក្តី៕
Tag:
ថៃ
© រក្សាសិទ្ធិដោយ thmeythmey.com
