ជាតិ
សង្គមអន្តរជាតិ
អ្នកនាំពាក្យ៖ ថ្ងៃដំបូងនៃការប្រឡងឌីប្លូម ប្រព្រឹត្តទៅដោយរលូន 30, Nov 2020 , 5:13 pm
សិស្សានុសិស្សនៅវិទ្យាល័យក្នុងខេត្តសៀមរាបវាស់កម្តៅមុនចូលប្រឡងឌីប្លូមនៅតាមមណ្ឌលប្រឡងនាថ្ងៃទី៣០ ខែវិច្ឆិកា (រូបភាពពីសហការី)
× ភ្នំពេញ៖ ការប្រឡងសញ្ញាបត្រមធ្យមសិក្សាបឋមភូមិ (ឌីប្លូម) នៅថ្ងៃទី៣០ ខែវិច្ឆិកានេះ ដែលជាថ្ងៃដំបូង គឺប្រព្រឹត្តិទៅយ៉ាងរលូន ដោយពុំមានហេតុការណ៍ប្លែកគួរឲ្យកត់សម្គាល់ឡើយ។ នេះបើតាម លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ដែលបានប្រាប់អ្នកសារព័ត៌មានថ្មីៗ តាមតេឡេក្រាម។
លោក រស់ សុវាចា បានបញ្ជាក់ថា ការប្រឡងឌីប្លូមនៅថ្ងៃដំបូងនេះ មានបេក្ខជនប្រឡងជាង១៥ម៉ឺន៨ពាន់នាក់ ដោយក្នុងនោះ ស្រី មានជាង៨ម៉ឺន៥ពាន់នាក់។ លោក មិនទាន់ទទួលបាននិន្នន័យនោះទេថា ថ្ងៃដំបូងនេះ មានសិស្សប៉ុន្មាននាក់ ដែលអវត្តមានមិនទៅប្រឡង។ បើតាមអ្នកនាំពាក្យដដែល មណ្ឌលប្រឡងឌីប្លូម មានជាង១,៧ពាន់ ស្មើជាង៧,១ពាន់បន្ទប់។
អ្នកនាំពាក្យក្រសួងអប់រំ លើកឡើងថា ការប្រឡងឌីប្លូមនៅតាមគ្រឹះស្ថានសិក្សាទាំង២៥រាជធានី-ខេត្តបានប្រព្រឹត្តិទៅដោយរលូនតាមការគ្រោងទុក និងប្រព្រឹត្តទៅក្រោមការគោរពតាមវិធានការណែនាំរបស់ក្រសួងសុខាភិបាល និងក្រសួងអប់រំ។
លោក ថ្លែងថា៖«ជារួមក្រសួងអប់រំ យល់ឃើញថា គណៈគ្រប់គ្រងគ្រឹះស្ថានសិក្សា បេក្ខជនប្រឡង និងគ្រប់ភាគីពាក់ព័ន្ធ បានអនុវត្តវិធានការសុវត្ថិភាពសុខភាពខ្ជាប់ខ្ជួន។ មេប្រយោគបានបំពេញការងារប្រកបដោយការទទួលខុសត្រូវខ្ពស់។ រួមទាំងគ្មានហេតុការណ៍ ឬប្រធានស័ក្តិអ្វីកើតឡើងគួរឱ្យកត់សម្គាល់ទេ»។
នៅថ្ងៃ១ ខែធ្នូ ឆ្នាំ២០២០ គឺជាថ្ងៃចុងក្រោយនៃការប្រឡងឌីប្លូម៕
© រក្សាសិទ្ធិដោយ thmeythmey.com