COVID-19
អន្តរជាតិ
វៀតណាម មានករណីឆ្លងកូវីដ-១៩ ក្នុងស្រុកលើកដំបូងក្នុងពេលជិត៣ខែ
01, Dec 2020 , 9:34 am
មន្រ្តីសុខាភិបាលក្រុងហាណូយ យកសំណាក ដើម្បីពិនិត្យរកកូវីដ-១៩។ រូបភាព៖ VnExpress
×![]()
ដោយ: សារព័ត៌មានថ្មីៗ
វៀតណាម នៅថ្ងៃទី៣០ ខែវិច្ឆិកា បានរាយការណ៍ថា មានករណីឆ្លងកូវីដ-១៩ ក្នុងស្រុកលើកដំបូង ក្នុងរយៈពេល ៨៧ថ្ងៃចុងក្រោយ។
តាមសេចក្តីរាយការណ៍របស់អាជ្ញាធរសុខាភិបាលវៀតណាម បុរសម្នាក់ដែលមានវ័យ៣២ឆ្នាំ និងជាគ្រូបង្រៀនភាសាអង់គ្លេស ត្រូវបានរកឃើញថា មានផ្ទុកកូរ៉ូណាវីរុស។ បុរស ដែលរស់នៅក្នុងទីក្រុងហូជីមិញរូបនេះ បានមានទំនាក់ទំនងជាមួយបុគ្គលិកបម្រើការលើយន្តហោះម្នាក់ដែលត្រូវបានរកឃើញថា មានផ្ទុកកូវីដ-១៩ កាលពីប៉ុន្មានថ្ងៃមុន។
កន្លែងដែលគ្រូបង្រៀនភាសាអង់គ្លេសនេះ ធ្លាប់ទៅមានដូចជា មជ្ឈមណ្ឌលបង្រៀនភាសាបរទេស ហាងកាហ្វេ បារ ខារ៉ាអូខេជាដើម ចាប់តាំងពីទាក់ទងជាមួយបុគ្គលិកបម្រើការលើយន្តហោះ ដែលជាមិត្តភក្តិរបស់ខ្លួន។ ដើម្បីទប់ស្កាត់ការរាតត្បាតនៅក្នុងទីក្រុង អាជ្ញាធរបានបញ្ជាឲ្យបិទកន្លែងដែលបុរសនោះធ្លាប់ទៅទាំងអស់រួចហើយ។
កន្លងមកអ្នកបម្រើការលើយន្តហោះ ត្រូវបានដាក់ចត្តាឡីស័កចំនួន ៥ថ្ងៃ និងធ្វើតេស្តរកកូរ៉ូណាវីរុសចំនួន ២លើក ដែលបង្ហាញថាអវិជ្ជមាន។ ក្រោយមក បុគ្គលិកបម្រើការលើយន្តហោះរូបនេះ បានស្នើមកដាក់ចត្តាឡីស័កនៅផ្ទះ ប៉ុន្តែក្រោយមក មានផ្ទុកវីរុសតែម្ដង។
កន្លងទៅ វៀតណាម បានដាក់ចេញចំណាត់ការជាច្រើន ដើម្បីទប់ស្កាត់កូវីដ-១៩។ គ្រាន់តែផ្ទុះកូវីដ-១៩ឡើង នៅក្នុងទីក្រុងដាណាង រដ្ឋាភិបាលទីក្រុងហាណូយ បានបញ្ជាឲ្យបិទក្រុង មធ្យោបាយដឹកជញ្ជូនសាធារណៈ កន្លែងកម្សាន្ត និងមុខជំនួញមួយចំនួនជាដើម។
គិតមកត្រឹមថ្ងៃទី៣០ ខែវិច្ឆិកា វៀតណាមមានករណីឆ្លងកូរ៉ូណាវីរុសសរុបចំនួន ១៣៤៧ករណី និងអ្នកស្លាប់មានចំនួន ៣៥នាក់។ ចំណែកអ្នកជាសះស្បើយវិញមានចំនួន ១១៧៩នាក់៕
Tag:
វៀតណាម
កូវីដ-១៩
© រក្សាសិទ្ធិដោយ thmeythmey.com
