នៅថ្ងៃទី៣០ វិច្ឆិកា មេដឹកនាំបាតុកម្មប្រឆាំងរដ្ឋាភិបាលថៃ៥នាក់ បានចូលខ្លួនទៅស្នងការប៉ូលិស ដើម្បីស្តាប់ពីបទចោទលើការប្រមាថមហាក្សត្រថៃ ដែលកើតឡើងនៅក្នុងការជួបជុំទ្រង់ទ្រាយធំមួយនៅទីលាន Sanam Luang កាលពីថ្ងៃទី១៩ និង២០ វិច្ឆិកា។ បើរកឃើញថាមានទោសក្នុងការប្រមាថមហាក្សត្រមែន បុគ្គលរូបនោះអាចត្រូវផ្តន្ទាទោសរហូតដល់ទៅ១៥ឆ្នាំ។
លោក Arnon Nampha លោក Parit Chiwarak កញ្ញាPanusaya Sithijirawattanakul លោកPanupong Chadnok និងលោក Patiwat Saraiyaem បានចូលខ្លួនទៅស្នងការដ្ឋានប៉ូលិសក្នងទីក្រុងបាងកកដើម្បីស្តាប់ពីបទចោទប្រឆាំងនឹងពួកគេ។ ពួកគេ ត្រូវបានអមដំណើរដោយមេធាវី២នាក់ផងដែរ។
លោកArnon ដែលជាមេដឹកនាំបាតុកម្ម និងទាមទារឲ្យមានកំណែទម្រង់របបរាជានិយម និយាយថាលោកមិនបារម្ភនឹងបទចោទនេះទេ និងបានត្រៀមខ្លួនតទល់ក្នុងតុលាការរួចហើយ។ លោកអះអាងថា៖« ឥឡូវនេះ គឺជាពេលដែលមនុស្សគ្រប់រូប គួរនិយាយដោយត្រង់ពីស្ថានប័នមហាក្សត្រ និងបើទោះបីអ្វីដែលត្រូវបាននិយាយគ្មានអ្នកស្តាប់ និងត្រូវអាជ្ញាធរប្រើប្រាស់ច្បាប់មកបំបិទមាត់ក្តី»។ លោកអះអាងថាបាតុកម្ម នឹងមានសន្ទុះកាន់តែខ្លាំងឡើងក្នុងឆ្នាំ២០២១។
ចំណែកលោក Parit បានអះអាងថា បទចោទស្តីពីការប្រមាថមហាក្សត្រនេះ នឹងនាំឲ្យមនុស្សជាច្រើនទៀតចូលរួមបាតុកម្ម ព្រោះករណីនេះបង្ហាញពីភាពអយុត្តិធម៌ក្នុងសង្គមថៃ។ កញ្ញា Panusaya វិញបន្តថា សំណើរបស់ចលនាប្រជាជន គឺការធ្វើកំណែទម្រង់របបរាជានិយមពិតប្រាកដមួយ មិនមែនលុបបំបាត់របបនេះឡើយ។ នេះបើយោងតាមកាសែតថៃ Bangkok Post។
មាត្រា១១២ ក្នុងក្រមព្រហ្មទណ្ឌថៃ ចែងពីការការពារព្រះមហាក្សត្រ នឹងផ្តន្ទាទោសជាប្រាក់ និង ជាប់ពន្ធាគាររហូតដល់១៥ឆ្នាំលើបុគ្គលរូបណាដែលធ្វើសកម្មភាពប៉ះពាល់ដល់មហាក្សត្រ ក៏ដូចជាក្រុមគ្រួសាររាជវង្ស។ មាត្រានេះ ក៏ត្រូវបានកែប្រែសម្រាប់អនុវត្តនៅពេលបាតុកម្មផងដែរ ទោះជាយ៉ាងនេះក្តី កញ្ញា Panusaya អះអាងថា ចលនាបាតុកម្មនឹងមិនរាថយឡើយ។
ដោយសារតែមេដឹកនាំបាតុកម្មចូលខ្លួនមកឆ្លើយតបចំពោះបទចោទតាមបញ្ជារបស់ប៉ូលិស ពួកគេត្រូវបានដោះលែងដោយគ្មានលក្ខខណ្ឌ។ ទោះជាយ៉ាងណាក្តី បុគ្គល៥រូបខាងលើ និងក្រុមបាតុករប្រឆាំងរដ្ឋាភិបាលផ្សេងទៀត ដែលធ្វើបាតុកម្មនៅមុខបន្ទាយយោធាកាលពីថ្ងៃទី២៩ វិច្ឆិកា អាចនឹងត្រូវចោទប្រកាន់បន្ថែមទៀតពីការបំពានច្បាប់ស្តីពីការជួបជុំសាធារណៈ ដូចជាការកម្ទេចទ្រព្យសម្បត្តិសាធារណៈ ឡានប៉ូលិស និងរបងសួនដែលស្ថិតក្រោមការគ្រប់គ្រងរបស់សាលាក្រុង។ នេះយោងតាមឧត្តមសេនីយ៍ Piya Tawichai ស្នងការរងប៉ូលិសទីក្រុងបាងកក។
ឧត្តមសេនីយ៍ Piya រូបនេះ ក៏អះអាងបន្ថែមដែរថា ប៉ូលិសអាចនឹងពិនិត្យអត្ថន័យនៃពាក្យសម្តី ដែលបាននិយាយអំឡុងពេលបាតុកម្មដើម្បីកំណត់ថា បាតុករបានបំពានច្បាប់អ្វីខ្លះ។
លោកនាយករដ្ឋមន្ត្រីថៃ ប្រាយុទ្ធ ចន្ទអូចា ធ្លាប់បានអះអាងថា រដ្ឋាភិបាល នឹងប្រើគ្រប់ច្បាប់ទាំងអស់ដើម្បីគ្រប់គ្រងបាតុករ។ ចាប់តាំងតែពីមានបាតុកម្មក្នុងខែកក្កដាមក នេះជាលើកទី១ហើយដែលមេដឹកនាំបាតុកម្មរងបទចោទពីការប្រមាថមហាក្សត្រ។ លើសពីនេះ ច្បាប់នេះ មិនត្រូវបានរដ្ឋាភិបាលថៃយកមកប្រើប្រាស់ចាប់តាំងពីខែមីនា ឆ្នាំ២០១៨ យោងតាមសំណើរបស់មហាក្សត្រ មហា វជិរាលង្ករណ៍។