អន្តរជាតិ
របាយការណ៍ AI ៖ វៀតណាមបង្កើនការគាបសង្កត់សកម្មជន និងអ្នករិះគន់តាមបណ្តាញសង្គម 01, Dec 2020 , 12:53 pm
បណ្តាញសង្គមFacebook និងGoogle
× អង្គការលើកលែងទោសអន្តរជាតិ (Amnesty International, AI) អះអាងថា ចំនួនអ្នកទោសមនសិការនៅវៀតណាម បានកើនឡើងដល់កម្រិតមួយខ្ពស់បំផុត។ របាយការណ៍ដែលចុះផ្សាយនៅថ្ងៃទី១ ធ្នូ នេះ ក៏បានចោទក្រុមហ៊ុនបណ្តាញសង្គមមួយចំនួនដូចជា Facebook និង Google ថា បានរឹតត្បិតការផ្សាយមាតិកាណាដែលប្រឆាំងទៅនឹងរដ្ឋាភិបាលវៀតណាមដែរ។
ក្នុងរបាយការណ៍របស់អង្គការលើកលែងទោសអន្តរជាតិ យ៉ាងហោចណាស់មានអ្នកទោសមនសិការ១៧០រូប នៅវៀតណាម ក្នុងនោះមាន៧០រូប កំពុងជាប់ពន្ធាគារដោយសារសកម្មភាពរបស់ខ្លួននៅលើបណ្តាញសង្គមមាន Facebook និង YouTube ជាដើម។
« បណ្តាញសង្គមដែលធ្លាប់តែជាសេចក្តីសង្ឃឹមក្នុងការពង្រីកសិទ្ធិសេរីភាពក្នុងការបញ្ចេញមតិ ជាតំបន់មានសិទ្ធិមនុស្ស ដែលមានការរិះគន់ និងប្រឆាំងរដ្ឋាភិបាលវៀតណាមដោយសន្តិវិធី ត្រូវបានរឹតត្បិត»។ នេះជាការលើកឡើងរបស់របាយការណ៍ចេញថ្ងៃទី១ ខែធ្នូ។ ចំនួនអ្នកទោស១៧០រូបនេះ ជាចំនួនច្រើនបំផុតតាំងតែពីឆ្នាំ១៩៩៦មក។ អង្គការលើកលែងទោសអន្តរជាតិ កំណត់អ្នកទោសមនសិការ ជាបុគ្គលដែលមិនប្រើហិង្សា ឬតស៊ូមតិបែបហិង្សា ប៉ុន្តែត្រូវជាប់ពន្ធនាគារដោយសារអត្តសញ្ញាណ ឬជំនឿរបស់ខ្លួន។
របាយការណ៍នេះបន្តថា បើទោះបីជាមានកំណែទម្រង់សេដ្ឋកិច្ច និងការបើកចំហរសង្គមក្តី បក្សកុម្មុយនីស្តវៀតណាមនៅបន្តគ្រប់គ្រងសារព័ត៌មាន និងពុំសូវជាអត់អោនឲ្យអ្នកប្រឆាំងរដ្ឋាភិបាលឡើយ។បន្ថែមពីនេះ រដ្ឋាភិបាលបង្កើនការគាបសង្កត់លើក្រុមអ្នកប្រឆាំង និងសកម្មជន ជាពិសេសនៅមុនកិច្ចប្រជុំបក្សនៅឆ្នាំក្រោយ។
អង្គការលើកលែងទោសអន្តរជាតិ ក៏បានរិះគន់ក្រុមហ៊ុនបណ្តាញសង្គមធំៗដែលមិនអាចជម្នះការទាមទាររបស់រដ្ឋាភិបាលវៀតណាមដែលចង់ឲ្យរឹតត្បិតមាតិកាទាំងឡាយណាដែលប្រឆាំងខ្លួន។ ការចោទប្រកាន់នេះ ផ្អែកលើភស្តុតាង និងការសម្ភាសជាមួយសកម្មជនវៀតណាមដែលមាតិការបស់ពួកគេក្នុងបណ្តាញសង្គម ត្រូវបានរឹតត្បិតក្នុងពេលផ្សព្វផ្សាយ។
ទាក់ទងបញ្ហានេះ Facebook និង YouTube អះអាងថា ខ្លួនរឹតត្បិតផ្សព្វផ្សាយណាមួយ លុះត្រាណាតែការផ្សព្វផ្សាយនោះបំពានច្បាប់ក្នុងស្រុកដែលប្រទេសខ្លួនវិនិយោគ។ នៅវៀតណាម មាត្រា១១៧ នៃច្បាប់ស្តីពីក្រុមហ៊ុនអ៊ីនធឺណិតបរទេស ហាមពលរដ្ឋវៀតណាមក្នុងការផលិត រក្សាទុក និងចែកចាយ សម្ភារៈទាំងឡាយណាដែលប្រឆាំងរដ្ឋវៀតណាម។ ជាក់ស្តែង Facebook បានរឹតត្បិតការផ្សព្វផ្សាយមិនមាតិកាចំនួន៨៣៤ គិតត្រឹមរយៈពេល៦ខែ ដើមឆ្នាំ២០២០។
ក្រុមហ៊ុនFacebook កាលពីថ្ងៃទី១៩ វិច្ឆិកា កន្លងទៅរងការគំរាមបិទពីរដ្ឋាភិបាលវៀតណាមចំពោះការមិនព្រមរឹតត្បិតការផ្សព្វផ្សាយណាដែលរិះគន់រដ្ឋាភិបាល និងប្រឆាំងរដ្ឋវៀតណាម។ វៀតណាម មានអ្នកប្រើប្រាស់ Facebook ប្រមាណ៦០លាននាក់ ដោយក្រុមហ៊ុននេះរកចំណូលបានប្រមាណ១ពាន់លានដុល្លារក្នុងមួយឆ្នាំ៕
© រក្សាសិទ្ធិដោយ thmeythmey.com