សង្គមអន្តរជាតិ
អន្តរជាតិ
វៀតណាមជាប្រទេសទី៦ នៅអាស៊ានផ្ញើលិខិតអបអរលោក បៃឌិន 02, Dec 2020 , 8:29 pm
អគ្គលេខាបក្សកុម្មុយនីស្តវៀតណាម លោកង្វៀន ភូជុង (ខាងឆ្វេង) ជល់កែវជាមួយ លោកចូ បៃឌិន នៅក្រសួងការបរទេសអាមេរិក នៅថ្ងៃទី៧ ខែកក្កដា ឆ្នាំ២០១៥។ រូបភាព៖ AFP
× អគ្គលេខាបក្សកុម្មុយនីស្ត និងប្រមុខរដ្ឋវៀតណាម លោក ង្វៀន ភូជុង និងនាយករដ្ឋមន្ត្រីវៀតណាម លោកង្វៀន ស៊ួនហ្វុក នៅថ្ងៃទី៣០ ខែវិច្ឆិកា បានផ្ញើលិខិតអបអរសាទរ ប្រធានាធិបតីជាប់ឆ្នោតអាមេរិកថ្មី លោក ចូ បៃឌិន។ វៀតណាម គឺជាប្រទេសទី៦ហើយ ដែលបានផ្ញើលិខិតអបអរសាទរនេះ បន្ទាប់ពីម៉ាឡេស៊ី ឥណ្ឌូណេស៊ី ថៃ សិង្ហបុរី និងហ្វីលីពីន។
តាមរយៈសេចក្តីប្រកាសព័ត៌មានរបស់ក្រសួងការបរទេសវៀតណាម មេដឹកនាំកំពូលវៀតណាម ពីររូប បានផ្ញើសារសាទរ លោក ចូ បៃឌិន ប្រធានាធិបតីជាប់ឆ្នោត ខណៈអនុប្រធានាធិបតីវៀតណាម លោកស្រី Dang Thi Ngoc Thinh ក៏បានចេញសារអបអរលោកស្រី កាម៉ាឡា ហារីស អនុប្រធានាធិបតីជាប់ឆ្នោតអាមេរិកផងដែរ។
ក្នុងលិខិតលិខិតអបអររៀងៗខ្លួន លោកង្វៀន ភូជុង អគ្គលេខាបក្សកុម្មុយនីស្តវៀតណាម និងជាប្រមុខរដ្ឋវៀតណាម និងលោក ង្វៀន សួនហ្វ៊ុក នាយករដ្ឋមន្ត្រីវៀតណាម បានបញ្ជាក់ពី ទំនាក់ទំនងយ៉ាងរឹងមាំរវាងប្រទេសពីរ ដែលត្រូវបានពង្រឹងយ៉ាងខ្លាំង ក្នុងរយៈពេល ២៥ឆ្នាំចុងក្រោយនេះ។ បើតាមមេដឹកនាំវៀតណាមទាំងពីរ រដ្ឋាភិបាលហាណូយ សង្ឃឹមថា ភាពជាដៃគូគ្រប់ជ្រុងជ្រោយរវាងប្រទេសទាំងពីរ នឹងបន្តអភិវឌ្ឍប្រកបដោយស្ថិរភាព, ប្រសិទ្ធភាព និងផ្តល់ជាប្រយោជន៍ដល់ប្រជាជននៃប្រជាជាតិទាំងពីរ។
ជាមួយគ្នានេះ វៀតណាម មានទំនុកចិត្តថា រដ្ឋាភិបាលក្រុងវ៉ាស៊ីនតោន និងក្រុងហាណូយ នឹងសហការគ្នាបន្ថែមទៀត ដើម្បីលើកតម្កើងសន្តិភាព សន្តិសុខ ស្ថិរភាព កិច្ចសហប្រតិបត្តិ និងការអភិវឌ្ឍ ទាំងនៅក្នុងតំបន់ និងពិភពលោក។
ក្រៅការអបអរសាទរ ថ្នាក់ដឹកនាំកំពូលវៀតណាម ក៏បានអញ្ជើញ លោក បៃឌិន និងលោកស្រី ហារីស ឲ្យមកទស្សនកិច្ចនៅវៀតណាមផងដែរ។ កន្លងមក លោកបៃឌិន បានប្រកាសពីរបៀបវារៈនៃគោលនយោបាយការបរទេសអាមេរិកថ្មី និងការពង្រឹងចំណងទំនាក់ទំនងជាមួយប្រទេសម្ព័ន្ធមិត្តនៅក្នុងតំបន់ អាស៊ី-បាស៊ីហ្វិក។
សូមបញ្ជាក់ថា វៀតណាម និងអាមេរិក បានចាប់ផ្តើមភ្ជាប់ការទូតជាមួយគ្នាឡើងវិញនៅក្នុងឆ្នាំ ១៩៩៥ បន្ទាប់ពីធ្វើសង្គ្រាមជាមួយគ្នានៅក្នុ្ងសង្គ្រាមឥណ្ឌូចិនលើកទី២ ដែលជាសង្គ្រាមបង្រួបបង្រួមវៀតណាម។ ទំហំពាណិជ្ជកម្មវៀតណាម និងអាមេរិក បានកើនពី ៤៥០លានដុល្លារ ដល់ ៧៧ពាន់លានដុល្លារ ចាប់ពីឆ្នាំ ១៩៩៥ ដល់ឆ្នាំ ២០១៩។ លើសពីនេះ រដ្ឋាភិបាលក្រុងហាណូយ និងក្រុងវ៉ាស៊ីនតោន ក៏បានពង្រឹងទំនាក់ទំនងការទូតយ៉ាងខ្លាំងផងដែរ ដើម្បីទប់នឹងឥទ្ធិពលចិន នៅក្នុងតំបន់អាស៊ី- បាស៊ីហ្វិក។
កន្លងទៅថ្មីៗនេះ មន្ត្រីជាន់ខ្ពស់អាមេរិក បានមកធ្វើទស្សនកិច្ចនៅវៀតណាមជាបន្តបន្ទាប់។ ក្នុងនោះមានដូចជា លោក ម៉ៃ ប៉ុមប៉េអូ រដ្ឋមន្ត្រីការបរទេសអាមេរិក និងលោក Robert O’Brien ទីប្រឹក្សាសន្តិសុខជាតិអាមេរិក៕
© រក្សាសិទ្ធិដោយ thmeythmey.com