សង្គមអន្តរជាតិ
អន្តរជាតិ
គ្រោះធម្មជាតិ២ខែនៅវៀតណាម ធ្វើឲ្យស្លាប់១៩២នាក់ និងខាតបង់លុយ១,៣ពាន់លានដុល្លារ 03, Dec 2020 , 8:29 am
ព្យុះទីហ្វុងមួយ វាយប្រហារលើខេត្ត Quang nam ប្រទេសវៀតណាម កាលពីខែតុលា។ រូបពី AFP
× គ្រោះមហន្តរាយធម្មជាតិ ក្នុងពេល២ខែចុងក្រោយ ធ្វើឲ្យសេដ្ឋកិច្ចវៀតណាមខាតបង់អស់ប្រមាណ១,៣ពាន់លានដុល្លារ ហើយជីវិតមនុស្ស១៩២នាក់ត្រូវបាត់បង់ ខណៈ៥៧នាក់ផ្សេងទៀតបន្តបាត់ខ្លួន។ អាជ្ញាធរវៀតណាម បានប្រកាសបែបនេះ នៅថ្ងៃទី ២ ខែធ្នូ។ បណ្ដាខេត្តភាគកណ្ដាលរបស់វៀតណាម រងគ្រោះខ្លាំងជាងគេ។
តំបន់ភាគកណ្ដាលនៃប្រទេសវៀតណាម បានជួបប្រទះទ្វេគ្រោះក្នុងឆ្នាំ២០២០នេះ។ គ្រោះទីមួយគឺពាក់ព័ន្ធនឹងឧស្សាហកម្មទេសចរណ៍ខ្លួន ដែលរងផលប៉ះពាល់ដោយសារជំងឺកូវីដ-១៩ ចំណែកគ្រោះមួយទៀត គឺជាការវាយប្រហាររបស់ព្យុះទីហ្វុង៩លើក ដែលកម្ទេចផលដំណាំ និងបំផ្លិចបំផ្លាញផ្ទះសម្បែងពលរដ្ឋរាប់ម៉ឺននាក់។ មនុស្សស្លាប់ដោយសារគ្រោះមហន្តរាយ២ខែចុងក្រោយនេះ គឺលើសចំនួនអ្នកស្លាប់សរុបពេញមួយឆ្នាំ២០១៩តែម្ដង ដែលកាលនោះមាន១៣២នាក់។
«យើងឆ្លងកាត់ព្យុះទីហ្វុង ៩ដង និងវិសម្ពាធទាប២ដង ក្នុងរយៈពេល២ខែមកនេះ ចាប់ពីពាក់កណ្ដាលខែកញ្ញាដល់ពាក់កណ្ដាលខែវិច្ឆិកា»។ រដ្ឋមន្ត្រីកសិកម្ម និងអភិវឌ្ឍន៍ជនបទវៀតណាម Nguyen Xuan Cuong បញ្ជាក់បែបនេះក្នុងសេចក្តីថ្លែងការណ៍រដ្ឋាភិបាល មុននឹងបន្ថែមថា ហេតុការណ៍ដ៏អាក្រក់នេះ បានបង្កការខូចខាតដល់សេដ្ឋកិច្ចវៀតណាមរហូតដល់ជាង១,៣ពាន់លានដុល្លារ។
ទោះបីជាខាតបង់សេដ្ឋកិច្ចវៀតណាម លោករដ្ឋមន្ត្រី Nguyen បានលើកឡើងថា រដ្ឋាភិបាលវៀតណាម ត្រូវតែធានាថា គ្មានពលរដ្ឋខ្លួនម្នាក់ណាអត់ផ្ទះសម្បែងស្នាក់នៅ រងទុក្ខដោយសារការអត់ឃ្លាន ឬខ្វះទឹកស្អាតផឹកនោះឡើយ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
សេដ្ឋកិច្ចវៀតណាម រំពឹងថាមានកំណើនយឺតចន្លោះ២ទៅ៣ភាគរយ ក្នុងឆ្នាំ២០២០នេះ ក្រោយមានកំណើនប្រមាណ៧ភាគរយក្នុងឆ្នាំ២០១៩។ ការធ្លាក់ចុះនៃកំណើនសេដ្ឋកិច្ចវៀតណាមនេះ បង្កឡើងមួយផ្នែកធំបង្កឡើងដោយសារផលប៉ះពាល់នៃជំងឺកូវីដ-១៩ និងគ្រោះមហន្តរាយធម្មជាតិ ។
ភូមិសាស្ត្រលក្ខណៈឆ្នេរដ៏វែងរបស់វៀតណាម ធ្វើឲ្យប្រទេសនេះងាយរងគ្រោះចំពោះគ្រោះធម្មជាតិដូចជា ព្យុះទីហ្វុង និងគ្រោះទឹកជំនន់ ជាដើម។ យោងតាមរបាយការណ៍ធនាគារពិភពលោកកាលពីខែតុលា មនុស្សប្រមាណ១១,៨លាននាក់ដែលរស់នៅក្នុងបណ្ដាខេត្តភាគកណ្ដាលប្រទេសវៀតណាម រងការគំរាមកំហែងនៃគ្រោះទឹកជំនន់ខ្លាំងក្លា៕
Tag:
វៀតណាម
គ្រោះធម្មជាតិ
© រក្សាសិទ្ធិដោយ thmeythmey.com