អតីតប្រធានាធិបតីបារាំងលោកValéry Giscard d'Estaing ទទួលមរណភាពនៅថ្ងៃទី២ ធ្នូ ឆ្នាំ២០២០ ក្នុងជន្មាយុ៩៤ឆ្នាំដោយសារជំងឺកូវីដ-១៩។ លោក Giscard d'Estaing ជាប្រធានាធិបតីបារាំងពីឆ្នាំ១៩៧៤ ដល់ឆ្នាំ១៩៨១។ ក្នុងរយៈពេល៧ឆ្នាំ នៃតំណែងជាប្រធានាធិបតីលោក Giscard d'Estaing បាននាំមកនូវការផ្លាស់ប្តូរក្នុងសង្គមបារាំង ក៏ដូចជាអ្នកគាំទ្រយ៉ាងមុះមុតក្នុងការបង្កើតមូលដ្ឋានគ្រឹះនៃសហភាពអឺរ៉ុប និងរូបិយប័ណ្ណអឺរ៉ូ។
ជាប់ឆ្នោតនៅឆ្នាំ១៩៧៤ លោក Valéry Giscard d'Estaing ជាប្រមុខរដ្ឋនៃសាធារណរដ្ឋបារាំងទី៥ក្មេងបំផុត ត្រឹមអាយុ៤៨ឆ្នាំ។ លោកចាប់ផ្តើមអាជីពនយោបាយក្នុងឆ្នាំ១៩៥៦ ជាសមាជិកសភាបារាំង។ ក្នុងឆ្នាំ១៩៦២ លោកត្រូវបានតែងតាំងជារដ្ឋមន្ត្រីសេដ្ឋកិច្ច និងហិរញ្ញវត្ថុក្រោមការដឹកនាំរបស់ប្រធានាធិបតី ហ្សាល ដឺហ្គោល និងបន្តកាន់តំណែងនេះរហូតដល់ឆ្នាំ១៩៧៤ ក្រោមការដឹកនាំរបស់ប្រធានាធិបតី George Pompidou ។
បើទោះបីជាកាន់តំណែងត្រឹមតែមួយអាណត្តិពីឆ្នាំ១៩៧៤ ដល់១៩៨១ក្តី លោកត្រូវបានទទួលស្គាល់ថាជាអ្នកកំណែទម្រង់សង្គមបារាំងសម័យទំនើប។ ក្នុងការប្រជុំគណៈរដ្ឋមន្ត្រីលើកដំបូង លោកអះអាងថា បារាំងត្រូវតែជាគម្រោងកំណែទម្រង់មួយដ៏ធំ។ ក្នុងនោះលោកបានកាត់បន្ថយការគ្រប់គ្រងរបស់រដ្ឋាភិបាល ក្នុងវិស័យផ្សព្វផ្សាយ អនុញ្ញាតឲ្យរំលូតកូនដោយស្របច្បាប់ ក៏ដូចជាច្បាប់ស្តីពីលែងលះដោយមានការយល់ព្រមពីប្តីប្រពន្ធផងដែរ។
ក្នុងគោលនយោបាយការអឺរ៉ុបវិញ លោកបានចូលរួមចំណែកយ៉ាងធំធេងក្នុងការពង្រីក និងកសាងមូលដ្ឋានគ្រឹះក្នុងការបង្កើតសហភាពអឺរ៉ុប។ ក្នុងឆ្នាំ១៩៧៤ លោក Giscard d'Estaing និងអធិការបតីអាល្លឺម៉ង់លោក Helmut Schmidt បង្កើតក្រុមប្រឹក្សាអឺរ៉ុប ក៏ដូចជាប្រព័ន្ធរូបិយវត្ថុរួមដែលបើកផ្លូវឲ្យបង្កើតរូបិយប័ណ្ណអឺរ៉ូក្នុងឆ្នាំ១៩៩១។ លោកGiscard d'Estaing ក៏យល់ព្រមឲ្យមានការបោះឆ្នោតជ្រើសរើសតំណាងរាស្ត្រសហភាពអឺរ៉ុបដោយផ្ទាល់។ ការយល់ព្រមនេះបើកផ្លូវឲ្យពលរដ្ឋសហភាពអឺរ៉ុបបោះឆ្នោតជ្រើសរើសតំណាងរាស្ត្រជាលើកដំបូងក្នុងឆ្នាំ១៩៧៩។
លើឆាកអន្តរជាតិវិញ លោកក៏ជាអ្នកចូលរួមក្នុងការបង្កើតជំនួបកំពូលមួយដែរ។ ក្នុងខែវិច្ឆិកា ឆ្នាំ១៩៧៥ លោកបានអញ្ជើញអ្នកតំណាងអាមេរិក ជប៉ុន បារាំង អង់គ្លេស និងអាល្លឺម៉ង់ខាងលិចមកជួបប្រជុំពីបញ្ហាសេដ្ឋកិច្ចអន្តរជាតិនៅទីក្រុងប៉ារីស។ ជំនួបខាងលើនេះ ត្រូវចាត់ទុកជាជំនួបប្រទេសចំនួន៥ ដោយក្រោយមកក្លាយជាជំនួបប្រទេសG7 ដោយបញ្ចូលអ៊ីតាលី និងកាណាដា។
ទោះជាយ៉ាងណាក្តី លោក Giscard d'Estaing ពុំសូវជាទទួលជោគជ័យប៉ុន្មានឡើយក្នុងកំណែទម្រង់សេដ្ឋកិច្ច។ ជាក់ស្តែងក្នុងពេលកាន់អំណាចជាប្រមុខរដ្ឋ ចំនួនអ្នកគ្មានការងារធ្វើនៅបារាំងកើនឡើង ចំណែកសេដ្ឋកិច្ចបារាំងវិញក៏រងផលប៉ះពាល់ផងដែរពីវិបត្តិប្រេងក្នុងឆ្នាំ១៩៧៣។ លោកតែងតាំងនាយករដ្ឋមន្ត្រីមកពីបក្សសង្គមនិយម ដែលអនុវត្តគោលនយោបាយចាយវាយសន្សំសំចៃ ដែលធ្វើឲ្យប្រជាប្រិយភាពរបស់លោកធ្លាក់ចុះមិនអាចស្តារបាន។ នេះបើទូរទស្សន៍បារាំង France 24។
មុខមាត់របស់លោកGiscard d'Estaing ក៏កាន់តែអាប់អួរបន្ថែមទៀតក្នុងឆ្នាំ១៩៧៩ ក្រោយកាសែតបារាំងចុះផ្សាយថាលោកទទួលយកពេជ្រពីមេដឹកនាំអាហ្វ្រិក ពេលកាន់តំណែងជារដ្ឋមន្ត្រីសេដ្ឋកិច្ចក្នុងឆ្នាំ១៩៧៣។ ស្របពេលជាមួយគ្នា សាធារណៈមតិបារាំងចាប់ផ្តើមលែងគាំទ្ររូបលោក ដោយមើលឃើញថា លោក Giscard d'Estaing ជាអភិជនដែលពុំសូវដឹងពីជីវភាពប្រចាំថ្ងៃរបស់ពលរដ្ឋបារាំង។
ក្រោយចប់អាណត្តិ លោកត្រឡប់ទៅកាន់តួនាទីជាក្រុមប្រឹក្សាស្រុក និងបន្ទាប់មកជាសមាជិករដ្ឋសភាបារាំង។ ក្រោយចូលនិវត្តន៍លោកចាប់អាជីពជាអ្នកសសេរ និងក្លាយជាសមាជិកបណ្ឌិត្យសភាបារាំងដែលមាននាទីពិនិត្យ និងការពារភាសាបារាំង។
យោងតាមសារលើបណ្តាញសង្គម Twitter របស់មូលនិធិ Valéry Giscard d'Estaing ពិធីបុណ្យសពរបស់អតីតប្រមុខរដ្ឋរូបនេះ នឹងត្រូវធ្វើឡើងដោយមានតែការចូលរួមតែពីក្រុមគ្រួសារប៉ុណ្ណោះ៕