អន្តរជាតិ
នយោបាយអន្តរជាតិ
ប្រមុខ UN ថា បើអត់អាមេរិក ពិភពលោកគ្មានផ្លូវដោះស្រាយវិបត្តិអាកាសធាតុកើតដែរ
04, Dec 2020 , 8:29 am
អគ្គលេខាធិការ UN លោក អាន់តូនីញ៉ូ ហ្គូតេរ៉េស ថ្លែងសុន្ឬរកថា ក្នុងព្រឹត្តិការណ៍ COP25 កាលពីឆ្នាំ២០១៩ ។ រូបពី AFP
×![]()
អគ្គលេខាធិការអង្គការសហប្រជាជាតិ (UN) លោក អាន់តូនីញ៉ូ ហ្គូតេរ៉េស បានព្រមានថា មនុស្សជាតិកំពុងធ្វើសង្គ្រាមបំផ្លាញខ្លួនឯងជាមួយធម្មជាតិ។ លោកសង្កត់ធ្ងន់ទៀតថា គ្មានផ្លូវពិភពលោកដោះស្រាយវិបត្តិបម្រែបម្រួលអាកាសបានឡើយ បើគ្មានវត្តមាននៃភាពជាអ្នកដឹកនាំរបស់អាមេរិកទេនោះ។ 
ក្នុងសុន្ទរកថាមួយនៅសកលវិទ្យាល័យ Columbia ក្នុងទីក្រុង ញូវយ៉ក នៅថ្ងៃទី ២ ខែធ្នូ លោក អាន់តូនីញ៉ូ ហ្គូតេរ៉េស បានប្រកាសថា ស្ថានភាពនៃផែនដីគឺបែកបាក់។ ទាក់ទិននឹងបញ្ហានេះ លោកអគ្គលេខាធិការ UN បានលើកឡើងទស្សនវិស័យចម្បង៣ចំណុច។
ចំណុចទីមួយ លោក ហ្គូតេរ៉េស បានលើកពីអព្យាក្រឹតកាបូនសកល ដែលចាំបាច់ត្រូវតែសម្រេចឲ្យបានជោគជ័យក្នុងពេល៣០ឆ្នាំខាងមុខ។ ទីពីរគឺ ហិរញ្ញវត្ថុសកល ត្រូវតែស្របតាមកិច្ចព្រមព្រៀងសកលឆ្នាំ២០១៥ ដែលមានគោលដៅប្រយុទ្ធប្រឆាំងបញ្ហាបម្រែប្រួលអាកាសធាតុ។ ហើយចុងក្រោយគឺ រដ្ឋាភិបាលនានា ត្រូវបង្កើតគោលនយោបាយដើម្បីការពារ ក្រុមមនុស្សដែលរងគ្រោះដោយសារឥទ្ធិពលអវិជ្ជមាននៃបញ្ហាប្រែប្រួលអាកាសធាតុផងដែរ។
តាមការចុះផ្សាយរបស់ទីភ្នាក់ងារព័ត៌មាន Reuters លោកសង្កត់ធ្ងន់ថា៖«ខ្ញុំជឿជាក់ថា វាគ្មានផ្លូវដោះស្រាយគ្រោះអាសន្នអាកាសធាតុក្នុងពិភពលោកបានឡើយ ដោយគ្មានភាពជាអ្នកដឹកនាំរបស់សហរដ្ឋអាមេរិកទេនោះ»។
ត្រង់ចំណុចនេះ លោកគូសបញ្ជាក់ថា កិច្ចព្រមព្រៀងអាកាសធាតុក្រុងប៉ារីសឆ្នាំ២០១៥ នឹងមិនអាចប្រសូត្រចេញរួចឡើយ បើគ្មានការដឹកនាំរបស់ប្រធានាធិបតីអាមេរិកជំនាន់នោះ លោក បារ៉ាក់ អូបាម៉ា ព្រោះជំនួបកំពូលរវាងលោកអូបាម៉ា និងប្រធានាធិបតីចិន ស៊ី ជិនភីង បានជួយឲ្យឈ្នះការគាំទ្ររបស់រដ្ឋាភិបាលក្រុងប៉េកាំង។
យ៉ាងណាមិញ លោក ដូណាល់ ត្រាំ ដែលជាអ្នកស្នងតំណែងបន្តពីលោក អូបាម៉ា បានចាត់ទុកបញ្ហាប្រែប្រួលអាកាសធាតុនេះ ជារឿងបោកប្រាស់ ហើយបានដកអាមេរិកចេញកិច្ចព្រមព្រៀងអាកាសធាតុក្រុងប៉ារីស ក្នុងឆ្នាំ២០១៧ ។ ខណៈអាណត្តិលោក ត្រាំ ជិតផុត លោក ចូ បៃឌិន ប្រធានាធិបតីជាប់ឆ្នោតអាមេរិក បានសន្យាចូលរួមកិច្ចព្រមព្រៀងអាកាសធាតុនេះជាថ្មី។
សូមបញ្ជាក់ដែរថា កាលពីដើមសប្ដាហ៍នេះ លោក បៃឌិន បានជជែកជាមួយលោក ហ្គូតេរ៉េស ដោយពិភាក្សាពីសារសំខាន់ក្នុងការពង្រឹងភាពជាដៃគូ ក្នុងគោលដៅប្រយុទ្ធប្រឆាំងនឹងបញ្ហាបម្រែបម្រួលអាកាសធាតុ និងដោះស្រាយវិបត្តិជំងឺរាតត្បាតសកលកូវីដ-១៩ ៕
Tag:
អាមេរិក
អង្គការសហប្រជាជាតិ
Antonio Guterres
© រក្សាសិទ្ធិដោយ thmeythmey.com
