COVID-19
អន្តរជាតិ
កូរ៉េខាងត្បូង មានករណីឆ្លងកូវីដ-១៩ ច្រើនបំផុតក្នុងរយៈពេល៩ខែ
04, Dec 2020 , 1:50 pm
បុគ្គលិកសុខាភិបាលកូរ៉េខាងត្បូង។ រូបភាព៖AFP
×![]()
ទីភ្នាក់ងារគ្រប់គ្រងជំងឺឆ្លងកូរ៉េខាងត្បូងនៅថ្ងៃទី៤ ធ្នូ បានប្រកាសពីករណីឆ្លងជំងឺកូវីដ-១៩ ច្រើនបំផុតក្នុងរយៈពេល៩ខែចុងក្រោយ ដោយមានដល់ទៅ៦២៩ករណី ក្នុងរយៈពេល២៤ម៉ោងមុន។ ការផ្ទុះករណីឆ្លងច្រើនបែបនេះ ធ្វើឲ្យរដ្ឋាភិបាលកូរ៉េខាងត្បូងកាន់តែបារម្ភថែមទៀតដោយសារសិស្សចំនួន៥សែននាក់ ត្រូវប្រឡងចូលសាកលវិទ្យាល័យ។
ករណីឆ្លងថ្មីចំនួន៦២៩ករណី នាំឲ្យកូរ៉េខាងត្បូងមានករណីឆ្លងសរុបចំនួន៣៦,៣៣២ករណី និងអ្នកស្លាប់ចំនួន៥៣៦នាក់។ អាជ្ញាធរសុខាភិបាលកូរ៉េខាងត្បូងអះអាងថា ករណីឆ្លងចំនួន៦០០ ឬប្រមាណ៨០គាគរយនៃករណីថ្មីកើតឡើងក្នុងតំបន់ដែលមានប្រជាជនច្រើនកុះករ និងដែលជាកន្លែងដែលធ្លាប់មានការផ្ទុះជំងឺឆ្លងពីមុនមក។
ឆ្លើយតបទៅនឹងស្ថានការណ៍នេះ លោក Chung Sye-kyun នាយករដ្ឋមន្ត្រីកូរ៉េខាងត្បូង លើកឡើងថា ចំនួនឆ្លងនៅតែកើនឡើងក្នុងកម្រិតអាសន្នមួយ បើទោះបីជារដ្ឋាភិបាលបានបន្តឹងវិធានគម្លាតសុវត្ថិភាពកាលពីចុងខែវិច្ឆិកាមក។លោកថា រដ្ឋាភិបាលនឹងសម្រេចចិត្តលើការរឹតត្បិតបន្ថែមទៀតនៅថ្ងៃទី៦ ធ្នូ។
«មានរយៈពេល១០ថ្ងៃហើយដែលយើងរឹតបន្តឹងគម្លាតសុវត្ថិភាពដំណាក់កាលទី២ ក្នុងទីក្រុងសេអ៊ូល ប៉ុន្តែករណីឆ្លងសឹងតែមិនអាចគ្រប់គ្រងបាន»។ នេះជាការនិយាយរបស់លោក Chung ក្នុងការប្រជុំរបស់រដ្ឋាភិបាល ដែលដកស្រង់ដោយទីភ្នាក់ងារព័ត៌មាន Yonhap។ ចាប់តាំងតែពីថ្ងៃទី២៩ វិច្ឆិកាមក កូរ៉េខាងត្បូងមានករណីឆ្លងយ៉ាងហោចណាស់៤៥០ ទៅ៥០០ករណីក្នុងមួយថ្ងៃ។
អ្នកជំនាញសុខាភិបាល ព្រមានថា បើសិនអាជ្ញាធរមិនចាត់វិធានការបន្តឹងទាន់ពេលទេ នោះក្នុងរយៈពេល១ ទៅ២សប្តាហ៍ខាងមុខ ករណីឆ្លងអាចនឹងកើនឡើងពីចំនួន៧០០ ទៅ១,០០០ករណីក្នុងមួយថ្ងៃ។ អ្នកជំនាញក៏ទាមទារផងដែរឲ្យរដ្ឋាភិបាលដំឡើងកម្រិតប្រកាសអាសន្ន ទៅកម្រិតទី២នៃកម្រិតទាំង៥ ។ មុននឹងមានការផ្ទុះឡើងលើកនេះ អាជ្ញាធរសុខាភិបាលធ្លាប់ព្រមានម្តងហើយពីការកើនឡើងចំនួនការឆ្លងក្នុងរដូវរងារ និងក្រោយពេលជួបជុំបុណ្យឆ្លងឆ្នាំសាកល។
នៅពេលផ្ទុះជំងឺឆ្លងកូវីដ-១៩ ដំបូង កូរ៉េខាងត្បូងត្រូវបានពិភពលោកកោតសសើរចំពោះវិធានការដ៏រហ័សក្នុងការបង្ការ និងប្រយុទ្ធនឹងជំងឺឆ្លង។ ប៉ុន្តែចាប់តាំងពីខែតុលាមក ករណីឆ្លងមានការកើនឡើងក្រោយអាជ្ញាធរបន្ធូរបន្ថយវិធានគម្លាតសុវត្ថិភាព។ រដ្ឋាភិបាលកូរ៉េខាងត្បូង ក៏បានបន្តឹងវិធានសុខាភិបាលនៅទីក្រុងសេអ៊ូល និងតំបន់ជុំវិញ។
បន្ថែមពីនេះ អាជ្ញាធរក៏បារម្ភផងដែរចំពោះករណីឆ្លងក្នុងចំណោមសិស្ស៥សែននាក់ដែលកំពុងប្រឡងចូលសាកលវិទ្យាល័យ។ នាយករដ្ឋមន្ត្រីកូរ៉េខាងត្បូង ទទូចឲ្យសិស្សកុំទៅកន្លែងដែលមានការឆ្លងខ្ពស់ដូចជារង្គសាល ខារ៉ាអូខេ ឬហាងកាហ្វ សម្រាប់ជួបជុំអបអរសាទក្រោយពេលប្រឡងចប់។
យ៉ាងណាមិញ មិនទាន់ទាំងប្រឡងផង សិស្សកូរ៉េខាងត្បូងចំនួន៤៣០នាក់បានឆ្លងជំងឺកូវីដ-១៩ ទៅហើយ។ ជាវិធានការតប ក្រសួងអប់រំកូរ៉ខាងត្បូងបានបង្កើនបន្ទប់ចំនួន៥៨៣ផ្សេងទៀត ឲ្សសិស្សទាំងនោះប្រឡងដោយឡែកពីគេ៕
Tag:
កូរ៉េខាងត្បូង
កូវីដ-១៩
© រក្សាសិទ្ធិដោយ thmeythmey.com
