ភ្នំពេញ៖ ក្រុមហ៊ុនចំនួន៤ កំពុងដំឡើងម៉ាស៊ីនទំនើបនានាដើម្បីសម្លាប់សមាសភាពចង្រៃ(ពងរុយ)ដែលចោះផ្លែស្វាយ ដើម្បីវេចខ្ចប់នាំទៅទីផ្សារប្រទេសចិន នាដើមឆ្នាំ២០២១។ បើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្រុមហ៊ុនទាំង៤នោះ នឹងបញ្ចប់គម្រោងដំឡើងម៉ាស៊ីនសម្លាប់ពងរុយ នៅបំណាច់ឆ្នាំ២០២០។
ក្រុមហ៊ុនទាំង៤ ដែលបានដំឡើងម៉ាស៊ីនទំនើបដើម្បីសម្លាប់សមាសភាពចង្រៃក្នុងផ្លែស្វាយ ហើយវេចខ្ចប់សម្រាប់នាំទៅចិននាដើមឆ្នាំ២០២១ នោះ មានក្រុមហ៊ុនបឹងកេតផ្លេនធីង&អ៊ិនដាសស្ទៀល មានទីតាំងនៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។ ក្រុមហ៊ុននេះ បានតម្លើងម៉ាស៊ីន Hot Water Treatment ខណៈក្រុមហ៊ុន អាល់ ហ្សាហ្ស៊ីលេន ហ្វ៊ូដ ភីធីអ៊ី (ម្ចាស់ក្រុមហ៊ុន HUNTY CO., LTD) កំពុងដំឡើងម៉ាស៊ីនប្រភេទផងដែរ នៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
សម្រាប់ ក្រុមហ៊ុនបាមីន អេហ្គ្រីខលឈ័រ ហាយ-ថេក ឌីវេឡុបម៉ិន បានតម្លើងម៉ាស៊ីនសម្លាប់សមាសភាពចង្រៃផ្លែស្វាយ ប្រភេទVapor Heat Treatment នៅភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ ស្របពេលដែលក្រុមហ៊ុន Long Wo Agriculture (Cambodia) Co., Ltd មានទីតាំងនៅភូមិទី៥ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ កំពុងដឹកសម្ភារៈសាងសង់កន្លែងវេចខ្ចប់និងបរិក្ខាសម្លាប់ពងរុយក្នុងផ្លែស្វាយពីប្រទេសចិន។ នេះបើតាមលោក វេង សាខុន សរសេរលើគណនីហ្វេកប៊ុករបស់ខ្លួនកាលពីថ្ងៃទី៣ធ្នូ។
រដ្ឋមន្ត្រីកសិកម្មរូបនេះ បានបញ្ជាក់ថា ក្រៅពីមានក្រុមហ៊ុន៤ខាងលើ ក៏មានក្រុមហ៊ុនចំនួន៧ផ្សេងទៀត មានគម្រោងបង្កើតកន្លែងកែច្នៃ វេចខ្ចប់ និងបំពាក់ឧបករណ៍ឬសម្ភារសម្លាប់សមាសចង្រៃក្នុងផ្លែស្វាយឱ្យបានមុនដំណាច់ឆ្នាំ២០២០ ដើម្បីនាំចេញផងដែរ។ ប៉ុន្តែក្រុមហ៊ុនទាំង៧នោះ ត្រូវបានផ្អាកបណ្តោះអាសន្នវិញ ដោយសារវិបត្តិជំងឺកូវីដ-១៩(COVID- 19)។
ក្រុមហ៊ុនទាំង៧ ដែលផ្អាកបណ្តោះអាសន្ននូវគម្រោងបង្កើតកន្លែងកែច្នៃនេះ រួមមានក្រុមហ៊ុនអង្គរ ហាវេស ឯ.ក, ក្រុមហ៊ុនហ្គ្រីន ស៊ី អេហ្គ្រីខលឈ័រ, ក្រុមហ៊ុន ឃីង ដឹមហ្វ្រូត អ៊ិនធើណេសិនណល, ក្រុមហ៊ុន Green Centric Farm Co., Ltd, ក្រុមហ៊ុន អង្គរហ្គ្រីន អ៊ិនវេសមេន អេន ឌីវេឡុបមេន (អេជីអាយឌី) និងក្រុមហ៊ុន First Bio-Tech Agricultural (Cambodia) Co., Ltd។
សូមរម្លឹកថា កម្ពុជាអាចនាំចេញផ្លែស្វាយជាផ្លូវការ ទៅប្រទេសចិនបានចំនួន៥០ម៉ឺនតោនក្នុងមួយឆ្នាំៗ ក្រោយភាគីទាំងពីរបានរៀបចំផ្លាស់ប្តូរពិធីសារនាំផ្លែស្វាយជាផ្លូវ កាលពីថ្ងៃទី៩មិថុនា ឆ្នាំ២០២០ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
ចាប់ពីថ្ងៃ១ធ្នូ ឆ្នាំ២០២០ កម្ពុជាបាននាំផ្លែស្វាយស្រស់ជាផ្លូវការលើកដំបូងចំនួនជិត៦០តោន ទៅកាន់ប្រទេសចិន តាមរយៈក្រុមហ៊ុន ហ៊ុនទ្រី ដោយស្វាយទាំងនោះ បានទៅដល់ទីផ្សារប្រទេសចិននៅថ្ងៃទី៤ និងទី៥ធ្នូ ឆ្នាំ២០២០។
បើតាមលោក វេង សាខុន ក្រុមហ៊ុន ហ៊ុន ទ្រី ក្រោយពីបញ្ចប់ការសាងសង់ និងដំឡើងឧបករណ៍សម្លាប់សមាសភាពចង្រៃក្នុងផ្លែស្វាយរួចរាល់មក ក៏ចាប់ផ្តើមដឹកជញ្ជូនស្វាយពីចម្ការមកសម្អាត និងវេចខ្ចប់ ដោយបានចាប់ផ្តើមបណ្តុះបណ្តាលកម្មករចំនួន៧០នាក់ និងប្រើប្រាស់រយៈពេលបីថ្ងៃ ដើម្បីដាក់បញ្ចូលផ្លែស្វាយទៅក្នុងមួយកុងតឺន័រ។ ក្រុមហ៊ុន ហ៊ុន ទ្រី សង្ឃឹមថា ក្រោយទទួលបានបទពិសោធន៍ពីការលៀងសម្អាតនិងវេចខ្ចប់ផ្លែស្វាយ ក្នុងរយៈពេលបីថ្ងៃកន្លងមកនេះ នឹងជួយដល់ក្រុមហ៊ុនបង្កើនល្បឿននៃការនាំចេញផ្លែស្វាយស្រស់ពីកម្ពុជាទៅកាន់ទីផ្សារប្រទេសចិន នាពេលខាងមុខ ។
ក្រុមហ៊ុន ហ៊ុនទី បានបោះទុនវិនិយោគលើការអភិវឌ្ឍវិស័យកសិកម្ម ការលាងសម្អាត ការវេចខ្ចប់ ការបង្កើតឃ្លាំងស្តុកត្រជាក់ សម្រាប់ការនាំចេញផលិតផលកសិកម្មកម្ពុជា កាលពីឆ្នាំ២០១៧៕