COVID-19
អន្តរជាតិ
ប្រធានក្រុមប្រឹក្សាEU ស្នើឲ្យបង្កើតសន្ធិសញ្ញាអន្តរជាតិស្តីពីជំងឺរាតត្បាតសាកល 04, Dec 2020 , 10:29 pm
លោក ឆាល មីឈែល ប្រធានក្រុមប្រឹក្សាអឺរ៉ុប។ រូបភាព៖AFP
× ប្រធានក្រុមប្រឹក្សាអឺរ៉ុប ឆាល មីឈែល នៅថ្ងៃទី៣ ធ្នូ អំពាវនាវដល់សហគមន៍អន្តរជាតិក្នុងការបង្កើតសន្ធិសញ្ញាអន្តរជាតិស្តីពីជំងឺរាតត្បាតសាកល។ តំណាងរបស់សហភាពអឺរ៉ុបរូបនេះ ក៏ទទូចប្រទេសទាំងឡាយឲ្យរៀនសូត្រពីជំងឺរាតត្បាតសាកលកូវីដ-១៩ ដើម្បីរៀបចំខ្លួនឲ្យបានប្រសើរជាងមុនក្នុងការទប់ទល់នឹងវិបត្តិសុខាភិបាលបែបនេះនៅថ្ងៃអនាគត។
ក្នុងកិច្ចប្រជុំអនឡាញរបស់អង្គការសហប្រជាជាតិស្តីពីជំងឺកូវីដ-១៩ លោក ឆាល មីឈែល ប្រធានក្រុមប្រឹក្សាអឺរ៉ុប លើកឡើង ថា សន្ធិសញ្ញាស្តីពីជំងឺរាតត្បាតសាកលមួយ នឹងជួយក្នុងការសម្របសម្រួលការស្រាវជ្រាវ ការចែករំលែកព័ត៌មាន និងការទទួលបានការថែទាំសុខភាពដោយសមធម៌។
«ចំនួននៃជំងឺរាតត្បាតសាកល បានកើនឡើងប៉ុន្មានទសវត្សរ៍ចុងក្រោយនេះ។ យើងបានដឹងថា ពិភពលោកអាចប្រឈមនឹងជំងឺរាតត្បាតសាកល។ ប៉ុន្តែយើងមិនបានប្រុងប្រៀបរៀបចំឡើយ»។ នេះជាការលើកឡើងរបស់លោក Michel ។ លោកបន្តថា នេះអាចជាបរាជ័យរបស់ប្រទេសនីមួយៗ ដែលចាំបាច់ត្រូតែរៀនសូត្រពីបទពិសោធ និងផលប៉ះពាល់ដែលខ្លួនជួបប្រទះ។
យ៉ាងណាក្តី លោក មីឈែល ក៏លើកពីរឿងវិជ្ជមានផងដែរ ដោយលោកបានចង្អុលទៅរកប្រតិបត្តិការមិនធ្លាប់មានក្នុងការបង្កើតវ៉ាក់សាំងដែលចំណាយពេលមិនដល់មួយឆ្នាំផងក្រោយមានករណីផ្ទុះជំងឺឆ្លងដំបូង។ លោកអះអាងថា សមត្ថភាពក្នុងការបង្កើតវ៉ាក់សាំង គឺលឿន និងដែលមិនធ្លាប់មានក្នុងប្រវត្តិសាស្ត្រមនុស្សជាតិ។
ចំពោះការបង្កើតសន្ធិសញ្ញាអន្តរជាតិស្តីពីជំងឺឆ្លង ប្រធានក្រុមប្រឹក្សានិយាយថា សន្ធិសញ្ញានេះ នឹងស្ថិតក្នុងក្រោមក្របខណ្ឌអង្គការសុខភាពពិភពលោក(WHO) និងមានគោលបំណងក្នុងការធ្វើឲ្យប្រសើរឡើងនូវការផ្តល់ថវិកា និងសម្របសម្រួលការស្រាវជ្រាវ។ លោកបន្តថា បំណងរបស់សហភាពអឺរ៉ុបសម្រាប់សន្ធិសញ្ញានេះ គឺធានាការទទួលបានវ៉ាក់សាំង ការព្យាបាល និងការធ្វើតេស្តសម្រាប់ជំងឺរាតត្បាតនាពេលអនាគត ហើយអាចជំរុញការអភិវឌ្ឍប្រព័ន្ធប្រកាសអាសន្នជំងឺឆ្លងផងដែរ។
ទាក់ទងរឿងនេះ មន្ត្រីសហភាពអឺរ៉ុប ធ្លាប់បានអះអាងថា សន្ធិសញ្ញាថ្មី អាចនឹងយកគំរូតាមអនុសញ្ញាស្តីពីការគ្រប់គ្រងថ្នាំជក់ដែលចូលជាធរមានក្នុងឆ្នាំ២០០៥។ បើមានដំណើរការមែន ការព្រាង និងការចរចាសន្ធិសញ្ញានេះនឹងត្រូវចំណាយពេលច្រើនគួរសម ដោយរួមបញ្ចូលទាំងរដ្ឋ ទីភ្នាក់ងារអង្គការសហប្រជាជាតិ សង្គមស៊ីវិល និងអង្គការក្រៅរដ្ឋាភិបាលផងដែរ។
គិតត្រឹមខែធ្នូ ឆ្នាំ២០២០ ជំងឺរាតត្បាតសាកលកូវីដ-១៩មានចំនួន៦៥លានករណី និងសម្លាប់មនុស្សចំនួន១,៥លាននាក់។ក្នុងកិច្ចប្រជុំអនឡាញស្តីពីជំងឺកូវីដ-១៩ អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតេរ៉េស បានទទូចឲ្យប្រទេសអភិវឌ្ឍន៍ផ្តល់វ៉ាក់សាំងដល់ប្រទេសដែលកំពុងអភិវឌ្ឍ ដើម្បីឲ្យប្រទេសទាំងនោះអាចប្រយុទ្ធ និងបង្ការករណីឆ្លងបន្ថែមទៀត៕
Tag:
សហភាពអឺរ៉ុប
កូវីដ-១៩
© រក្សាសិទ្ធិដោយ thmeythmey.com