សង្គមអន្តរជាតិ
អន្តរជាតិ
កាសែតរដ្ឋចិន៖ ផ្នែកខ្លះនៃទំនាក់ទំនងចិន-អាមេរិក ឈានដល់ការខូចខាតមិនអាចស្តារបាន
04, Dec 2020 , 11:29 pm
ទង់ជាតិចិន និងអាមេរិក។ រូបភាព៖ AFP
×![]()
កាសែតរដ្ឋចិន Global Time នៅក្នុងបទវិចារណាកថារបស់ខ្លួនដែលចុះផ្សាយនៅថ្ងៃទី៤ ធ្នូ បានព្រមានថា ផ្នែកខ្លះនៃទំនាក់ទំនងចិន-អាមេរិក បានខូចខាតមិនអាចស្តារឡើងវិញឡើយ។ ការព្រមានរបស់កាសែតរដ្ឋចិននេះ ធ្វើឡើងក្រោយរដ្ឋបាលអាមេរិកបន្តឹងការផ្តល់ទិដ្ឋាការដល់មន្ត្រីចិន ក៏ដូចជាការជម្លោះពាក្យសម្តីរវាងព្រឹទ្ធសភាអាមេរិក និងអ្នកកាសែតចិន។
ចាប់តាំងពីប្រធានាធិបតី ដូណាល់ ត្រាំ កាន់តំណែងបានពាក់កណ្តាលអាណត្តិមក ទំនាក់ទំនងរវាងប្រទេសមហាអំណាចសេដ្ឋកិច្ចទាំងពីរ ធ្លាក់ដល់កម្រិតទាបបំផុតដោយសារបញ្ហាពាណិជ្ជកម្ម បច្ចេកវិទ្យា សន្តិសុខ សិទ្ធិមនុស្ស និងជំងឺឆ្លងកូវីដ-១៩។ ក្នុងបទវិចារណកថា កាសែតរដ្ឋចិន Global Times បានលើកឡើងថា ការកំហិតការផ្តល់ការទិដ្ឋាការលើមន្ត្រីបក្សកុម្មុយនីស្តចិន និងក្រុមគ្រួសារ និងការហាមឃាត់នាំចូលកប្បាសពីតំបន់ស៊ីនជាំង ជាសញ្ញាដ៏គួរឲ្យបារម្ភក្នុងទំនាក់ទំនងប្រទេសទាំងពីរ។
កាសែតនេះបន្តថា ទំនាក់ទំនងរវាងមហាអំណាចទាំង២បានរំកិលទៅដល់ចំណុចគ្រោះថ្នាក់ ដែលសូម្បីដែលរដ្ឋបាលថ្មីចង់ស្ដារឡើងវិញ ក៏ពិបាកដែរ។ Global Times សរសេរថា៖« បើទោះបីជារដ្ឋបាលអាមេរិកថ្មី មានបំណងបន្ធូរបន្ថយសម្ពាធយ៉ាងណាក្តី ក៏នៅមានផលប៉ះពាល់មួយចំនួនដែលមិនអាចស្តារបានឡើយ»។
កាលពីសប្តាហ៍មុន រដ្ឋាភិបាលអាមេរិកបានដាក់ក្រុមហ៊ុនផលិតបន្ទះឈីប SMIC និងក្រុមហ៊ុនប្រេងCNOOC ចូលទៅក្នុងបញ្ជីខ្មៅ ដោយអះអាងថា ជាក្រុមហ៊ុនយោធា និងហាមមិនឲ្យអ្នកវិនិយោគអាមេរិកទិញភាគហ៊ុន ចាប់ពីឆ្នាំ២០២១ទៅ។
ជុំវិញទំនាក់ទំនងខាងលើ លោក Cui Tiankai ឯកអគ្គរដ្ឋទូតចិននៅអាមេរិកបានបង្ហាញពីឆន្ទៈក្នុងការកាត់បន្ថយបញ្ហាប្រឈមរវាងប្រទេសចិន និងអាមេរិក ខណៈប្រធានាធិបតីជាប់ឆ្នោត ចូ បៃឌិន ត្រៀមចូលកាន់តំណែងក្នុងខែមករា ឆ្នាំ២០២១។ នៅក្នុងសំណេរបង្ហោះលើបណ្តាញសង្គមTwitter អ្នកការទូតរូបនេះលើកឡើងថា ប្រទេសទាំងពីរតែងតែមានភាពខុសគ្នា ប៉ុន្តែភាពខុសគ្នានេះមិនគួរណាជាដើមចមនៃការប្រឈម និងសង្គ្រាមត្រជាក់ ឬក្តៅអ្វីឡើយ។
ឯកអគ្គរដ្ឋទូតចិនរូបនេះ បន្តថាដោយមានការគោរព និងយល់គ្នាពេញលេញ ប្រទេសទាំងពីរអាចការពារមិនបណ្តាលឲ្យភាពខុសគ្នានេះបំផ្លិចបំផ្លាញដល់ទំនាក់ទំនងទាំងស្រុងឡើយ។
បើទោះបីជាលោក បៃឌិន ជាប់ឆ្នោតជាប្រធានាធិបតីក្តី អ្នកវិភាគមួយចំនួនប្រមើលឃើញថា ទំនាក់ទំនងរវាងប្រទេសទាំងពីរ និងមិនអាចត្រឡប់មកដូចដើម ឬប្រសើរជាមុនខ្លាំងដែរ។ ប៉ុន្តែគេរំពឹងថាលោក បៃឌិន ប្រហែលជាអាចប្រើប្រាស់យុទ្ធសាស្ត្រផ្សេងក្នុងការទប់ជាមួយនឹងចិន ដែលខុសពីលោក ត្រាំ ដែលទប់ទល់នឹងចិនជាលក្ខណៈឯកតោនិយម ដោយគ្មានការពិភាក្សាជាមួយសម្ព័ន្ធមិត្តឡើយ។
ជាក់ស្តែង ថ្នាក់ដឹកនាំបក្សប្រជាធិបតេយ្យប្រាប់កាសែត New York Times ក្នុងសប្តាហ៍នេះថា មកទល់ពេលនេះបក្សប្រជាធិបតេយ្យមិនទាន់មានគម្រោងក្នុងការលុបចោលពន្ធដែលដាក់លើទំនិញចិន ដែលធ្វើឡើងក្រោមការដឹកនាំរបស់ប្រធានាធិបតី ត្រាំ ឡើយ។
បន្ថែមពីនេះ ទាំងបក្សប្រជាធិបត្យេ និងបក្សសាធារណរដ្ឋសុទ្ធសឹងតែគាំទ្រច្បាប់ដែលសំដៅដាក់ទណ្ឌកម្មលើមន្ត្រីជាន់ខ្ពស់ចិន ដែលទទួលបន្ទុកក្នុងការរំលោភសិទ្ធិមនុស្សនៅតំបន់ស៊ីនជាំង និងការបង្ក្រាបសកម្មជនប្រជាធិបតេយ្យនិយមនៅហុងកុង។ ច្បាប់ដាក់ទណ្ឌកម្មលើមន្ត្រីចិន និងសង្គ្រាមពាណិជ្ជកម្ម សុទ្ធសឹងតែជាដើមចមនៃភាពតានតឹងរវាងប្រទេសទាំងពីរ៕
Tag:
ចិន
អាមេរិក
© រក្សាសិទ្ធិដោយ thmeythmey.com
