ជាតិ
ប្រាសាទ «ត្រពាំងប្រើស» លាក់ខ្លួនយ៉ាងជ្រៅ ក្នុងតំបន់ព្រៃឡង់
05, Dec 2020 , 11:13 am
×![]()
ដោយ៖ ហុង ស្រីណា
«ប្រាសាទត្រពាំងប្រើស» ជាប្រាសាទតែមួយគត់ ដែលសំងំលាក់ខ្លួនយ៉ាងជ្រៅ នៅក្នុងតំបន់ព្រៃឡង់។ មានទីតាំងនៅតំបន់ភ្នំជី និងតំបន់ព្រៃឡង់ ក្នុងភូមិសាស្ត្រឃុំសុចិត្រ ស្រុកសណ្តាន់ ខេត្តកំពង់ធំ ប្រាសាទនេះ មានប៉មចំនួន៣ និងមានត្រពាំងធំមួយ នៅទិសខាងកើត ដែលអ្នកស្រុកហៅថា ត្រពាំងប្រើស។ លោក សេង អាន ប្រធានមន្ទីរទេសចរណ៍ខេត្តកំពង់ធំ បានប្រាប់ Thmeythmey25 ថា ដោយសារប្រាសាទនេះ ស្ថិតនៅព្រៃជ្រៅនៃតំបន់ព្រៃឡង់ ហើយស្ថានភាពផ្លូវ ក៏មាលំបាកខ្លាំង ដូច្នេះមិនសូវមានភ្ញៀវទេសចរបានទៅដល់ឡើយ។ 
«ប្រាសាទត្រពាំងប្រើស» មានទីតាំងនៅតំបន់ភ្នំជី និងតំបន់ព្រៃឡង់ ក្នុងភូមិសាស្ត្រ ឃុំសុចិត្រ ស្រុកសណ្តាន់ ខេត្តកំពង់ធំ។ លោក សេង អាន ប្រធានមន្ទីរទេសចរណ៍ខេត្តកំពង់ធំ ប្រាប់ Thmeythmey25 ថាប្រាសាទនេះ មានរចនាបថកំពង់ព្រះ ដែលសាងសង់ឡើងនៅរវាងសតវត្សរ៍ទី៨ ក្នុងរជ្ជកាលក្សត្រីអង្គណាមួយ ក្នុងចំណោមអង្គបីរនេះ (ព្រះនាងនីពេន្ទ្រទេវី, ព្រះនាងជយេន្ទ្រ
-ភា, ព្រះនាងជេស្ថារ្យ) ដែលជាមហាក្សត្រគ្រប់គ្រង នៅក្រុងសម្ភុបុរ។ លោកពន្យល់ថា ស្ថាបត្យកម្ម សិល្បៈ មានលក្ខណៈដូចគ្នាខ្លាំង ជាមួយប្រាសាទបណ្តាប្រាសាទ នៅក្រុងសម្ភុបុរ ដែលស្ថិតនៅស្រុកសំបូរ ខេត្តក្រចេះ ដូចជាប្រាសាទធាតុក្វាន់ពីរជាដើម។
ប្រាសាទ ត្រពាំងប្រើស មានប៉មចំនួនបី រត់ជួរពីទិសពាយ័ព្យ ទៅអាគ្នេយ៍ សាងអំពីឥដ្ឋ បែរមុខទៅទិសឦសាន និងមានត្រពាំងធំមួយនៅទិសខាងកើត ដែលហៅថា ត្រពាំងប្រើស ពោលគឺឈ្មោះប្រាសាទ និងឈ្មោះត្រពាំងដូចគ្នា។ នេះបើយោងតាម មន្ទីរវប្បធម៌ និងវិចិត្រសិល្បៈខេត្តកំពង់ធំ។
លោក សេង អាន ប្រធានមន្ទីរទេសចរណ៍ខេត្តកំពង់ធំ បានប្រាប់សារព័ត៌មាន ThmeyThmey25 ឲ្យដឹងថា៖«ប្រាសាទបុរាណនេះ បង្កប់ខ្លួនយ៉ាងជ្រៅនៅក្នុងព្រៃឡង់ ដោយមានចម្ងាយ ១៦០ គីឡូរម៉ែត្រ ពីទីរួមខេត្តកំពង់ធំ និងត្រូវបន្តដំណើរដោយម៉ូតូ រឺគោយន្តខ្ពស់ៗ ក្នុងព្រៃឡង់រយៈពេលយូរ ជាមួយផ្លូវដ៏សែនលំបាក ដើម្បីទៅដល់ទីតាំងប្រាសាទ។ មានភ្ញៀវទេសចរតិចណាស់ ដែលទៅបានដល់»។
ប្រធានមន្ទីររូបនេះ ក្នុងមួយឆ្នាំ មានភ្ញៀវទេសចរពី១០នាក់ ទៅ ២០នាក់ប៉ុណ្ណោះ ដែលបានទៅដល់ ប្រាសាទត្រពាំងប្រើស ព្រោះភ្ញៀវទេសចរអាចទៅទស្សនាប្រាសាទនេះបានតែក្នុងរដូវប្រាំងប៉ុណ្ណោះ។
ចំណែក លោក ម៉ង់ វ៉ាលី ប្រធានស្តីទី ការិយាល័យបេតិកភណ្ឌ នៃមន្ទីរវប្បធម៌ ខេត្តកំពង់ធំ ក៏បានប្រាប់សារព័ត៌មានThmeyThmey25 ដែរថា ប្រាសាទត្រពាំងប្រើសនេះ មានប៉មកណ្តាលកម្ពស់ ៧.២០ម៉ែត្រ ហើយតួប៉មអមសងខាងមានកម្ពស់ ៦.២០ម៉ែត្រ។ លោកបានបន្តទៀតថា នគរខ្មែរ កាលសម័យសម្ភុបុរៈ មានការរីកចម្រើនខ្លាំងផ្សេងៗគ្នា ដោយមួយផ្នែកគឺសម្ភុបុរៈនៅខេត្តក្រចេះ និងមួយផ្នែកទៀតនៅអង្គរ។ ដូច្នេះ សិល្បៈសម័យកំពង់ព្រះនៅខាងអង្គរ និងកំពង់ធំ មានលក្ខណៈខុសគ្នាតិចតួចជាមួយខេត្តក្រចេះ ប៉ុន្តែ ដោយសារត្រពាំងប្រើសនៅជាប់ខេត្តក្រចេះ វាបានធ្វើឲ្យរចនាបថ ប្រាសាទត្រពាំងប្រើស មានទំនោរទៅតាមប្រាសាទភាគច្រើនក្នុងខេត្តក្រចេះ។
គួររំលឹកផងដែរថា កាលពីខែធ្នូ ឆ្នាំ២០១៧ គ្រប់ប្រព័ន្ធបណ្តាញផ្សព្វផ្សាយ បានផ្សាយពីការរកឃើញប្រាសាទបុរាណថ្មីមួយ មិនទាន់ចុះបញ្ជី នៅកណ្តាលព្រៃឡង់។ ប៉ុន្តែបើតាម លោក ម៉ង់ វ៉ាលី នេះមិនមែនជាព័ត៌មានពិតឡើយ ដោយហេតុថាអ្នកស្រាវជ្រាវជនជាតិបារាំង ធ្លាប់បានមកសិក្សាអំពីស្ថាបត្យកម្ម សិល្បៈ និងចុះបញ្ជីប្រាសាទត្រពាំងប្រើសនេះ តាំងពីឆ្នាំ១៩២០ ម្ល៉េះ។ សព្វថ្ងៃនេះ មានអ្នកស្រុកបានសាងសង់អាស្រមមួយ និងសង់សំណង់ស្រាលមួយចំនួននៅជុំវិញប្រាសាទ តែមិនមានព្រះសង្ឃគង់នៅទេ៕
Tag:
ប្រាសាទត្រពាំងប្រើស
ព្រៃឡង់
© រក្សាសិទ្ធិដោយ thmeythmey.com
