ជាតិ
ពលរដ្ឋជាង២០០គ្រួសារនៅឧត្តរមានជ័យ កាក់កបមុខរបរចិញ្ចឹមត្រីអណ្តែង និងកង្កែប
11, Dec 2020 , 8:59 am
×![]()
ពលរដ្ឋខេត្តឧត្តរមានជ័យជាង២០០គ្រួសារ កំពុងប្រកបរបរចិញ្ចឹមត្រីអណ្ដែង និងកង្កែប ខណៈពីមុនមានជាង១០គ្រួសារប៉ុណ្ណោះ។ នេះបើតាមការអះអាងរបស់ លោក សូត្រ ស៊ីសុខឃាង ប្រធានមន្ទីរកសិកម្ម រុក្ខា ប្រមាញ់ និងនេសាទខេត្តឧត្តរមានជ័យ ដោយវាយតម្លៃពីរបរទាំងនេះ បានផ្តល់ផលលឿន និងលក់បានតម្លៃខ្ពស់។
ថ្លែងប្រាប់ ThmeyThmey25 តាមទូរសព្ទ លោក សូត្រ ស៊ីសុខឃាង បានអះអាងថា មន្ទីរកសិកម្ម តែងជំរុញ និងបានចុះចែកកូនត្រី កង្កែប ដល់កសិករតាមទិសដៅ ព្រមទាំងបង្រៀនពីបច្ចេកទេសចិញ្ចឹមដើម្បីឆាប់ទទួលបានផល ជាពិសេសនៅក្នុងខេត្ត ក៏មានកូនសម្រាប់លក់ ខណៈពីមុនត្រូវទិញនៅខេត្តសៀមរាប និងប្រទេសថៃ។
«ពីមុនចិញ្ចឹមមិនសូវជោគជ័យ ដោយសារមិនមានបច្ចេកទេសគ្រប់គ្រាន់។ ឥលូវយើងមានបទពិសោធន៍ បច្ចេកទេស កូន និងចំណីគ្រប់គ្រាន់ ដែលធ្វើឱ្យត្រីធំលឿន»។ នេះជាការបញ្ជាក់ របស់ប្រធានមន្ទីរកសិកម្មខេត្តឧត្តរមានជ័យ។
លោកបានបន្តថា ការចិញ្ចឹមត្រីអណ្ដែង និងកង្កែប ជារបរដែលទទួលបានផលលឿន ក្នុងនោះត្រីអណ្ដែង ទទួលផលរយៈពេលជាង២ខែ និងកង្កែប ទទួលផលរយៈពេល៥០ថ្ងៃ។ លោកបន្តថា ត្រីអណ្ដែងអាចលក់បានក្នុងតម្លៃ ៦ពាន់រៀលក្នុងមួយគីឡូក្រាម រីឯកង្កែបលក់បានតម្លៃ ១ម៉ឺនរៀលក្នុងមួយគីឡូក្រាម។
ស្របពេលដែលពលរដ្ឋខេត្តឧត្តរមានជ័យជាច្រើន កំពុងជោគជ័យលើរបរនេះ ក៏មានកសិករប្រមាណ៤០គ្រួសារ បានផ្អាកការចិញ្ចឹមត្រី និងកង្កែបរបស់ខ្លួន ដោយសារត្រូវប្រមូលផលស្រូវ និងដំឡូងមី ប៉ុន្តែពួកគេ នឹងចាប់ផ្ដើមចិញ្ចឹមវិញ បន្ទាប់ពីប្រមូលផលរួច។
លោក សូត្រ ស៊ីសុខឃាង បានអះអាងថា៖«ទទួលស្គាល់ថា ការចិញ្ចឹមនេះ ទទួលបានផលលឿន ប៉ុន្តែគាត់រវល់ប្រមូលផលស្រូវនិងដំឡូងមី គាត់អត់មានពេលមើលត្រីអណ្ដែងទេ អីចឹងពេលប្រមូលចប់ គាត់នឹងចិញ្ចឹមត្រីអណ្ដែងវិញ ក្នុងអំឡុងខែកុម្ភៈ»។
បើតាមប្រធានមន្ទីរកសិម្មរូបនេះ នាពេលខាងមុខ លោកនឹងខិតខំជំរុញផ្នែកវារីវប្បកម្ម នៅក្នុងខេត្ត ដោយបន្ត និងពង្រីកការចិញ្ចឹមត្រី ដូចជា ត្រីស្ពឹន ត្រីកន្ធរ និងត្រីទីឡាប់យ៉ាជាដើម។
តាមរបាយការណ៍ ទិន្នផលវារីវប្បកម្មឆ្នាំ២០២០នេះ បានកើនឡើង ៣០ភាគរយ បើប្រៀបធៀបរយៈពេលដូចគ្នាក្នុងឆ្នាំ២០១៩ ទោះបីកម្ពុជាប្រឈមមុខនឹងវិបត្តកូវីដ-១៩ក្តី។ កន្លងមក ប្រមុខរដ្ឋាភិបាលកម្ពុជា បានផ្ដល់ទឹកប្រាក់ចំនួន ២ពាន់លានដុល្លារ សម្រាប់គាំទ្រផ្នែកវារីវប្បកម្មលើខេត្តចំនួន១០។ តាមរយៈការងារនេះ រដ្ឋបាលជលផលបានជំរុញការងារចិញ្ចឹមត្រី និងកង្កែប បានចំនួន ១ ,០០០គ្រួសារ រួចមកហើយ និងត្រៀមអនុវត្តជាបន្តបន្ទាប់៕
Tag:
កសិកម្ម
ត្រីអណ្ដែង
កង្កែប
វារីវប្បកម្ម
© រក្សាសិទ្ធិដោយ thmeythmey.com
