លោក Fernando Salvador គ្រូបង្វឹកកីឡាជឺជិតស៊ូរបស់កីឡាករ ចាន់ រតនា ជឿជាក់ថា អ្នកលេងគុនចម្រុះជួរមុខរបស់កម្ពុជានឹងអាចយកឈ្នះកីឡាករចិន Xie Wei ក្នុងការប្រកួតគុនចម្រុះ ONE: Collision Course នៅប្រទេសសិង្ហបុរីយប់នេះ។ កត្តាដែលធ្វើគ្រូបង្វឹកខ្សែក្រវាត់ខ្មៅ៣ដាន់ជឿជាក់បែបនេះ ដោយសារ រតនា មានកម្លាំងខ្លាំង និងស្នៀតប្រយុទ្ធល្អ។
អ្នកលេងគុនចម្រុះជួរមុខរបស់កម្ពុជាកីឡាករ ចាន់ រតនា ត្រូវប៉ះកីឡាករចិន Xie Wei ក្នុងព្រឹត្តិការណ៍ប្រកួតគុនចម្រុះ ONE: Collision Course នៅវេលាម៉ោង៧:៣០នាទី(ម៉ោងនៅកម្ពុជា)យប់ថ្ងៃទី១៨ ខែធ្នូ ឆ្នាំ២០២០នេះ នាកីឡដ្ឋាន Singapore Indoor Stadium ក្នុងប្រទេសសិង្ហបុរី។
មុនការប្រកួតមកដល់គ្រូបង្វឹកកីឡាជឺជិតស៊ូរបស់កីឡាករ ចាន់ រតនា ហាក់ជឿជាក់ខ្លាំងលើសមត្ថភាពរបស់កូនសិស្សខ្លួនក្នុងការផ្តួលគូប្រកួតនៅយប់ថ្ងៃសុក្រនេះ។ គ្រូបង្វឹកខ្សែក្រវាត់ខ្មៅ៣ដាន់រូបនេះព្យាករណ៍ថា រតនា នឹងអាចផ្តួលដៃគូឲ្យសន្លប់ បើគេអាចទប់ទល់នឹងស្នៀតវាយបក និងស្នៀតឃ្លេរបស់កីឡាករចិនបាន។
«ក្នុងករណីដែល រតនា អាចបន្តប្រកួតបាន៣ទឹក នោះកីឡាករកម្ពុជាយើងច្បាស់ជាមានឱកាស ដើម្បីផ្ដួលឲ្យសន្លប់មិនខានឡើយ។ បើ Wei គេប្រកួតនៅលើក្ដាររេញ វាជាការដោះប្រស្នារបស់ រតនា មួយ ប៉ុន្តែគេធ្លាប់ធ្វើបានជោគជ័យ និងមានបទពិសោធន៍គេចផុតពីឃ្លេសម្លាប់ជាច្រើនមកហើយ។ ខ្ញុំគិតថា វាមិនជាបញ្ហាចោទសម្រាប់អ្នកលេងគុនខ្មែររបស់យើងទេ»។ នេះជាការលើកឡើងរបស់លោក Fernando Salvador។
កត្តាដែលធ្វើឲ្យគ្រូបង្វឹករូបនេះជឿជាក់ខ្លាំងលើសមត្ថភាពកីឡាករ ចាន់ រតនា ដោយសារ រូបគេ ជាកីឡាករ ដែលព្យាយាមហ្វឹកហាត់ និងត្រៀមខ្លួនបានល្អសម្រាប់ការប្រកួតមួយនេះ ទោះបីគេខកខានឡើងសង្វៀនលំដាប់ពិភពលោកនេះជាង១ឆ្នាំក៏ដោយ។ លើសពីនេះ រូបគេមានកម្លាំងខ្លាំង និងស្នៀតប្រយុទ្ធល្អ។
តែយ៉ាងណាគ្រូបង្វឹកវ័យ៥០ឆ្នាំរូបនេះសរសើរដៃគូ រតនា ថា៖«Xie Wei មានកម្លាំងស្ទុះល្អណាស់ និងខ្លាំងទៀតផង។ ហើយបើគអាចរក្សាការគាបលើ រតនា មិនឲ្យរើរួចនៅលើក្ដាររេញ នោះជាបញ្ហាសម្រាប់ជើងខ្លាំងកម្ពុជាមិនខាន»។
ក្រុមហ៊ុនសែលកាត កាលពីខែសីហា ឆ្នាំ២០២០ បានប្រកាសភាពជាដៃគូរយុទ្ធសាស្ត្រជាមួយ ONE Championship ដែលជាស្ថាប័នសារព័ត៌មានកីឡាអន្តរជាតិធំជាងគេបំផុតនៅក្នុងទ្វីបអាស៊ី។ ជាមួយគ្នានេះ លោក ចាន់ រតនា ដែលជាកីឡាករឆ្នើមរបស់កម្ពុជា ក៏បានប្រកាសជាទូតសុឆន្ទៈរបស់ក្រុមហ៊ុនសែលកាតផងដែរ។
កិច្ចព្រមព្រៀងនេះ គឺជាកិច្ចសហការដំបូងគេបង្អស់របស់ ONE នៅប្រទេសកម្ពុជា ដោយភាគីទាំងពីរនឹងធ្វើការរួមគ្នា ដើម្បីចែករំលែកនូវសិល្បក្បាច់គុនចម្រុះ និងព័ត៌មានកីឡាដ៏សម្បូរបែបជាច្រើនទៀតរបស់ ONE Championship ជូនដល់អ្នកគាំទ្រនៅទូទាំងប្រទេសកម្ពុជា។
អ្នកគាំទ្រសិល្បក្បាច់គុនចំរុះរបស់ ONE នឹងត្រូវបានកម្សាន្តជាមួយនឹងមាតិកាព័ត៌មានក្នុងស្រុក ព័ត៌មានវីដេអូខ្លីៗ ព័ត៌មានទូទៅ និងព្រឹត្តិការណ៍កីឡាសំខាន់ៗ ក៏ដូចជាបទអត្ថាធិប្បាយជុំវិញព្រឹត្តិការណ៍កីឡាផ្សេងៗជាច្រើនទៀតផងដែរ ដោយចូលទៅកាន់ Cellcard App តាយរយះតំណរ http://onelink.to/cellcardkh៕