អន្តរជាតិ
នយោបាយជាតិ
ប្រធានាធិបតីជាប់ឆ្នោតអាមេរិក បៃឌិន បង្ហាញសមាសភាពក្រុមការងារបរិស្ថាន 20, Dec 2020 , 1:59 pm
លោកស្រីតំណាងរាស្ត្រ Deb Haalandបេក្ខភាព រដ្ឋមន្ត្រីក្រសួងមហាផ្ទៃ។
× លោកចូ បៃឌិនប្រធានាធិបតីជាប់ឆ្នោតអាមេរិក នៅថ្ងៃទី១៩ ធ្នូ បានបង្ហាញសមាសភាពបុគ្គលសំខាន់ៗ នៃក្រុមការងារបរិស្ថាន សម្រាប់រដ្ឋបាលរបស់លោក។ លោកបៃឌិន អះអាងថា អាមេរិក ក្រោមការដឹកនាំរបស់លោក នឹងយកការប្រយុទ្ធប្រឆាំងនឹងបម្រែបម្រួលអាកាសធាតុ ជាសសរទ្រូងមួយដ៏សំខាន់ ក្នុងការស្រោចស្រង់សេដ្ឋកិច្ចអាមេរិក ដែលប៉ះពាល់ដោយសារជំងឺឆ្លងកូវីដ-១៩។
លោក ចូ បៃឌិន អះអាងថា ក្រុមការងារបរិស្ថាននេះ នឹងដឹកនាំរដ្ឋបាលរបស់លោក ក្នុងការសម្រេចផែនការដ៏មានមហិច្ឆតា ក្នុងការដោះស្រាយបម្រែបម្រួលអាកាសធាតុ។ បេក្ខភាពក្រុមការងារបរិស្ថាន មានរដ្ឋមន្ត្រីក្រសួងមហាផ្ទៃ ប្រមុខភ្នាក់ងារការពារបរិស្ថាន មន្ត្រីគោលនយោបាយអាកាសធាតុ នៃសេតវិមាន និងនាយកក្រុមប្រឹក្សាគុណភាពបរិស្ថាន។
ថ្លែងក្នុងពិធីមួយនៅក្រុង Wilmington រដ្ឋDelaware លោក បៃឌិន លើកឡើងថា មនុស្សជាតិកំពុងស្ថិតក្នុងវិបត្តិ។ លោកថា គេចាំបាច់ត្រូវការប្រទេសមួយដែលរួបរួម ក្នុងការដោះស្រាយវិបត្តិជំងឺកូវីដ-១៩ ក៏ដូចជាវិបត្តិបម្រែបម្រួលអាកាសធាតុ។ នេះយោងតាមទីភ្នាក់ងារព័ត៌មានAFP។
ចំពោះបេក្ខភាព រដ្ឋមន្ត្រីក្រសួងមហាផ្ទៃ លោកបៃឌិន បានជ្រើសតាំងលោកស្រីតំណាងរាស្ត្រDeb Haaland នៃរដ្ឋម៉ិកស៊ិកថ្មី។ ក្រសួងមហាផ្ទៃអាមេរិក មាននាទីពិនិត្យទៅលើធនធានធម្មជាតិ រួមមានឧទ្យានជាតិ និងជម្រកសត្វព្រៃ។ បើសិនជាព្រឹទ្ធសភាអាមេរិក យល់ព្រមលើបេក្ខភាព លោកស្រី Deb Haaland នោះ អាមេរិកនឹងមានរដ្ឋមន្ត្រី ដែលជាជនជាតិដើមអាមេរិកដំបូងបង្អស់។
ចំពោះតំណែងប្រមុខភ្នាក់ងារការពារបរិស្ថាន (EPA) បានទៅលោក Michael Regan ដែលជាអ្នកគ្រប់គ្រងបញ្ហាបរិស្ថាន នៅរដ្ឋការូលៃណាខាងជើង។ ចំណែកតំណែង អគ្គនាយក្រុមប្រឹក្សាគុណភាពបរិស្ថាន បានទៅលោក Brenda Mallory ដែលជាមេធាវីជំនាញបរិស្ថាន។ លោកRegan និងMallory ជាជនជាតិអាហ្វ្រិក-អាមេរិក។ លោកបៃឌិន ប្រកាសនៅថ្ងៃទី១៩ ធ្នូ ថាគណៈរដ្ឋមន្ត្រីរបស់លោក នឹងមានជនជាតិអាហ្វ្រិក-អាមេរិក ចំនួន៦រូប។
លោកបៃឌិន ក៏បានជ្រើសយកលោក Gina McCarthy អតីតប្រធានភ្នាក់ងារ EPA ជំនាន់លោកអូបាម៉ា មកធ្វើជាមន្ត្រីមន្ត្រីគោលនយោបាយអាកាសធាតុ នៃសេតវិមានផងដែរ។ កាលពីខែមុន លោកបៃឌិន ក៏បានជ្រើសតាំងលោក ចន ខេរី អតីតរដ្ឋមន្ត្រីការបរទេស មកកាន់តំណែងជាប្រេសិតអាមេរិក ទទួលបន្ទុកបម្រែបម្រួលអាកាសធាតុផងដែរ។
លោក បៃឌិន សន្យាថា រដ្ឋបាលរបស់លោកនឹងធ្វើទំនើបកម្ម ហេដ្ឋារចនាសម្ព័ន្ធទឹក ដឹកជញ្ជូន និងថាមពល ដើម្បីអាចធានាបានទៅនឹងអាកាសធាតុ ដែលមានសភាបកាន់ តែកាចសាហាវឡើងពីមួយឆ្នាំទៅមួយឆ្នាំ។ បន្ថែមពីនេះ លោកក៏នឹងសាងសង់ស្ថានីយ សាកថាមពលអគ្គីសនីយានយន្តចំនួន៥សែនកន្លែង នៅទូទាំងប្រទេស និងកសាងផ្ទះចំនួន១,៥លានខ្នង ដែលសន្សំសំចៃថាមពល។ ស្របពេលគ្នានេះដែរ លោកថាអាចបង្កើតការងារចំនួន ២៥ម៉ឺន កន្លែងបន្ថែមទៀត ដោយដើម្បីបិទអណ្តូងប្រេង និងឧស្ម័ន ដែលត្រូវបោះបង់ចោល ហើយបង្កជាហានិភ័យ ចំពោះសុខភាព និងសុវត្ថិភាព។
ចំពោះការប្តេជ្ញាចិត្តអន្តរជាតិវិញ លោកបៃឌិន បញ្ជាក់ថានឹងចូលរួមជាថ្មី ក្នុងកិច្ចព្រមព្រៀងស្តីពីអាកាសធាតុក្រុងប៉ារីសឆ្នាំ២០១៥ ដែលលោកត្រាំបានដកអាមេរិក ចេញកាលពីឆ្នាំ២០១៨៕
© រក្សាសិទ្ធិដោយ thmeythmey.com