សង្គមអន្តរជាតិ
អន្តរជាតិ
អាជ្ញាធរអាមេរិក កំពុងតាមដានយ៉ាងប្រុងប្រយ័ត្នពីទម្រង់ថ្មីរបស់កូវីដ-១៩ នៅអង់គ្លេស 21, Dec 2020 , 2:58 pm
លោកវេជ្ជបណ្ឌិត Moncef Slaoui ប្រធានក្រុមការងារទទួលបន្ទុកកម្មវិធីវ៉ាក់សាំងរបស់សេតវិមានអាមេរិក ។ រូបពី AFP
× អាជ្ញាធរអាមេរិក កំពុងតាមដានយ៉ាងប្រុងប្រយ័ត្នបំផុតជុំវិញព័ត៌មានអំពីវត្តមានទម្រង់ថ្មីដែលកើតចេញពីការបំផ្លែងខ្លួនរបស់ជំងឺកូវីដ-១៩ ក្នុងចក្រភពអង់គ្លេស។ មន្ត្រីជាន់ខ្ពស់សុខាភិបាលអាមេរិក បានបញ្ជាក់បែបនេះ នៅថ្ងៃទី ២០ ខែធ្នូ ខណៈសង្កត់ធ្ងន់ថា ការផ្អាកជើងហោះហើរលើប្រទេសអង់គ្លេស ពុំទាន់ជារឿងចាំបាច់នៅឡើយទេ។
លោកវេជ្ជបណ្ឌិត Moncef Slaoui ប្រធានក្រុមការងារទទួលបន្ទុកកម្មវិធីវ៉ាក់សាំងរបស់សេតវិមានអាមេរិក ប្រាប់ទូរទស្សន៍ CNN ថា មន្ត្រីអាមេរិក ពុំទាន់ដឹងច្បាស់ថាទម្រង់ថ្មីរបស់កូវីដ-១៩ ពិតជាមានវត្តមានក្នុងសហរដ្ឋអាមេរិកឬអត់ទេ។ ត្រង់ចំណុចនេះ លោកអះអាងថា៖«ច្បាស់ណាស់ យើងកំពុងតាមដានរឿងនេះយ៉ាងប្រុងប្រយ័ត្នបំផុត»។
លោក Slaoui ក៏បានបញ្ជាក់ទៀតថា មកទល់ពេលនេះ គ្មានប្រភេទវីរុសណា អាចធន់នឹងវ៉ាក់សាំងកូវីដ-១៩ដែលមានឲ្យប្រើប្រាស់នាពេលបច្ចុប្បន្នឡើយ។ សម្រាប់លោក វត្តមានទម្រង់ថ្មីដែលកើតចេញពីការបំផ្លែងខ្លួនរបស់កូវីដ-១៩ ក្នុងចក្រភពអង់គ្លេសនេះ មិនទំនងជារួចគេចផុតពីប្រព័ន្ធស៊ាំនៃវ៉ាក់សាំងឡើយ។
ជុំវិញទម្រង់ថ្មីនេះដែរ លោក Brett Giroir ប្រធានផ្នែកធ្វើតេស្តជំងឺកូវីដ-១៩ បានប្រាប់ទូរទស្សន៍អាមេរិក ABC ថា ស្ថានភាពបច្ចុប្បន្ន មិនទាន់ដល់ពេលប្រកាសអាសន្នឡើយ។ នៅពេលសាកសួរថា សហរដ្ឋអាមេរិក ទំនងជាដើរតាមឧទាហរណ៍របស់បណ្ដាប្រទេសអឺរ៉ុប ដែលបានផ្អាកជើងហោះហើរពីចក្រភពអង់គ្លេសឬទេ លោក Giroir ឆ្លើយថា នៅមិនទាន់ជារឿងចាំបាច់នៅឡើយទេ។
រដ្ឋាភិបាលអង់គ្លេស នៅថ្ងៃទី២០ ខែធ្នូ បានបិទខ្ទប់ទីក្រុងឡុងដ៏ និងប៉ែកអាគ្នេយ៍នៃប្រទេស ព្រោះតែទម្រង់ថ្មីរបស់កូវីដ-១៩ បានរីករាលដាលយ៉ាងលឿនរហ័ស។ រដ្ឋមន្ត្រីសុខាភិបាលអង់គ្លេស លោក Matt Hancock ដែលចាត់ទុកស្ថានការណ៍ជាគ្រោះថ្នាក់ខ្លាំង បានព្រមានថា វិធានការនេះ នឹងបន្តអនុវត្ត រហូតដល់កម្មវិធីចាក់វ៉ាក់សាំងសម្រេចរួចរាល់។
អ្នកវិទ្យាសាស្ត្រអង់គ្លេស បានរកឃើញវត្តមានទម្រង់ថ្មីរបស់ជំងឺកូវីដ-១៩ ក្នុងខ្លួនអ្នកជំងឺម្នាក់ កាលពីខែកញ្ញា កន្លងទៅ។ នាយករដ្ឋមន្ត្រី អង់គ្លេស បូរីស ចនសុន បង្ហាញថា ទម្រង់ថ្មីនៃកូវីដ-១៩ មានល្បឿនឆ្លងលឿនជាងទម្រង់ចាស់រហូតដល់៧០ភាគរយ។
មកទល់ពេលនេះ វត្តមានទម្រង់ថ្មី នៅមិនទាន់ជាក្តីបារម្ភនៅឡើយទេ។ ក៏ប៉ុន្តែប្រទេសមួយចំនួននៅតំបន់អឺរ៉ុប បានចាប់ផ្ដើមបិទជើងហោះហើរពីប្រទេសអង់គ្លេស ក្នុងនោះដូចជា បារាំង អាល្លឺម៉ង់ អៀរឡង់ អ៊ីតាលី ហូឡង់ និងបែលហ្ស៊ិកជាដើម៕
Tag:
ចក្រភពអង់គ្លេស
កូវីដ-១៩
© រក្សាសិទ្ធិដោយ thmeythmey.com