ក្រុមហ៊ុនភូមិពងទាខ្មែរ ប្រកាសទិញពងទាពីកសិករខេត្តតាកែវ និងព្រៃវែង ២០ម៉ឺនគ្រាប់ ក្នុងតម្លៃ៤០០រៀល

ជាតិ

ក្រុមហ៊ុនភូមិពងទាខ្មែរ ប្រកាសទិញពងទាពីកសិករខេត្តតាកែវ និងព្រៃវែង ២០ម៉ឺនគ្រាប់ ក្នុងតម្លៃ៤០០រៀល

24, Dec 2020 , 9:58 am

រូបភាព

ដោយ:

ភ្នំពេញ៖ ក្រុមហ៊ុន ភូមិពងទាខ្មែរ បានប្រកាសទិញពងទា របស់កសិករ ក្នុងខេត្តតាកែវ និងខេត្តព្រៃវែង ដែលកំពុងជួបបញ្ហាខ្វះទីផ្សារ។ លោក សោម សុធា អគ្គនាយកក្រុមហ៊ុន ភូមិពងទាខ្មែរ បានប្រាប់ Thmeythmey25ថា នៅក្នុងដំណាក់កាលដំបូងនេះ ក្រុមហ៊ុនខ្លួននឹងជួយទិញពងទាកសិករទាំង២ខេត្តនេះ ចំនួន ២០ម៉ឺនគ្រាប់ ក្នុងតម្លៃ ៤០០រៀល ក្នុងមួយគ្រាប់ និងតម្លៃ ២០០រៀល ក្នុងមួយគ្រាប់ សម្រាប់ពងទាដែលខូចគុណភាព។

ចុចទីនេះដើម្បីទទួលបានព័ត៌មានរហ័ស

លោក សោម សុធា បន្តប្រាប់សារព័ត៌មានThmeyThmey25 តាមទូរសព្ទយ៉ាងដូច្នេះ៖«យើងត្រូវការប្រមូលទិញពងទា នេះក្នុងដំណាក់កាលដំបូង ២០ម៉ឺនគ្រាប់ ពីខេត្តតាកែវ និងខេត្តព្រៃវែង ដោយសារកន្លងមក មានលក់ពងទា ក្នុងខេត្តទាំងពីរ មានការអ៊ូរទាំពីបញ្ហាខ្វះទីផ្សារ។ ក្រុមការងារ ភូមិពងទាខ្មែរ នឹងចាប់ផ្ដើមចុះដល់ទីតាំងចិញ្ចឹមទាផ្ទាល់ និងប្រមូលទិញក្នុងមួយគ្រាប់ ៤០០រៀល ដើម្បីរួមចំណែក ដោះស្រាយបញ្ហានេះ ជូនអ្នកចិញ្ចឹមទា»។

លោកបានបញ្ជាក់ទៀតថា លោកមិនប្រមូលទិញ ពីឈ្មួញកណ្តាលនោះទេ ដោយតម្រូវឲ្យក្រុមការងារ ចុះទៅដល់ទីតាំងចិញ្ចឹមផ្ទាល់ ដើម្បីពិនិត្យថា កសិដ្ឋាននោះ អាចត្រូវតាមលក្ខខណ្ឌ ដែលលោកចង់បានឬអត់។ លោកបន្ថែមថា៖«យើងទទួលទិញពងទារបស់កសិករ ដែលជួបបញ្ហា ពិតប្រាកដ និងពិនិត្យមើលពីស្ដង់ដានៃការចិញ្ចឹមទា»។

លោក សោម សុធា អគ្គនាយកនៃក្រុមហ៊ុន ភូមិពងទាខ្មែរ

ដ្បិតភូមិពងទាខ្មែរ ជាអ្នកផ្គត់ផ្គង់ពងទាលើទីផ្សារ ដោយបញ្ជូលបន្តទៅដល់អ្នកចែកចាយនានា តែបរិមាណមិនទាន់គ្រប់គ្រាន់នៅឡើយ ដែលជាមូលហេតុ លោកសម្រេចជួយដល់អ្នកចិញ្ចឹមទាយកពង។ នេះគឺជាដំណាក់កាល ដំបូងប៉ុណ្ណោះ ក្នុងការជួយ ដល់កសិករខ្មែរ ដែលជួបបញ្ហា ក្នុងអំឡុងវិបត្តិកូវីដ-១៩ ហើយលោក នឹងធ្វើតាមដំណាក់កាល ជាបន្តបន្ទាប់ដែលអាចធ្វើទៅបាន។

គួរកត់សម្គាល់ថា មួយរយៈចុងក្រោយនេះ តម្លៃពងទាក្នុងស្រុកបានធ្លាក់ចុះក្រោម៤០០រៀល ហើយកសិករបន្ទោសថា ដោយសារការនាំចូលពីប្រទេសវៀតណាមច្រើន។ ឆ្លើយតបនឹងការលើកឡើងនេះក្រសួងកសិកម្ម រុក្ខាប្រមាញ់និងនេសាទ អះអាងថាក្រសួងមិនអនុញ្ញាត ឲ្យមានការនាំចូលពងទា ពីប្រទេសវៀតណាមនោះទេ។ ក្រសួងពន្យល់ថា ការធ្លាក់ចុះនៃតម្លៃពងទា គឺមកពីនៅអំឡុងវិបត្តិកូវីដ-១៩នេះ ការជួបជុំមួយចំនួនត្រូវបានផ្អាកផង ហើយចំដូវប្រមូលផលត្រី ផងនោះ ទើបពលរដ្ឋងាកមកបរិភោគត្រីច្រើនជាងមុនវិញ។

ប្រជាកសិករ អាចទាក់ទងទៅលោក សោម សុធា អគ្គនាយកក្រុមហ៊ុន ភូមិពងទាខ្មែរ តាមលេខទូរសព្ទ ០៩៦ ២៧ ៧៧ ៨២០៕

Tag:

ពងទា

តាកែវ

ព្រៃវែង