ពីនេះ ពីនោះ
ខ្លះថាណូអែល « Noël» តាមបារាំង ឯខ្លះហៅ បុណ្យគ្រីស្មាស់ «Christmas» តាមអង់គ្លេស 25, Dec 2020 , 7:29 am
× បុណ្យណូអែល(Noël) ឬបុណ្យគ្រីស្មាស់(Christmas)តែងតែប្រារព្ធឡើងជារៀងរាល់ឆ្នាំនៅថ្ងៃទី២៥ ខែធ្នូ។ ទាំងអ្នកគោរពសាសនាគ្រិស្ត និងសាសនាព្រះពុទ្ធ គឺសុទ្ធតែនិយមប្រារព្ធពិធីនេះ។ ពិធីបុណ្យសាសនាគ្រិស្តនេះអ្នកខ្លះហៅថាបុណ្យណូអែលអ្នកខ្លះទៀតហៅថាបុណ្យគ្រីស្មាស់។
បុណ្យណូអែល«Noel» ជាភាសាដើមរបស់បារាំង ដែលពលរដ្ឋបារាំងគ្រប់គ្នា តែងច្រៀងបទ«The first Noel» ដែលមានន័យថា រីករាយថ្ងៃបុណ្យណូអែល។ ក្រៅពីច្រៀងចម្រៀងណូអែល ពួកគេរៀបចំផ្ទះសម្តែង តុបតែងដើមឈើអមជាមួយអំណោយផ្សេងៗផងដែរ។
សម្រាប់ពាក្យ «Christmas» ជាពាក្យដើមមកពីភាសាអង់គ្លេសបុរាណថា Christes Maesse ឬ Christ’s Mass ដែលមានន័យថា ពិធីអបអរសាទរជួបជុំគ្នារវាងអ្នកគោរពសាសនាគ្រិស្ត។ ប្រជាពលរដ្ឋអាមេរិក និងអង់គ្លេស ចាត់ទុកបុណ្យ«Christmas» នេះ ជាថ្ងៃដែលលោកតា Santa Claus ផ្តល់ជាអំណោយ និងជាថ្ងៃដែលគេជួបជុំឲ្យកាដូគ្នាទៅវិញទៅមក ច្រៀងលេងកម្សាន្ត ជួនពរគ្នាទៅវិញទៅមក ឬការបួងសួងជាដើម។ ពួកគេជឿជាក់ថាការបួងសួងរបស់ពួកគេនឹងបានទៅដល់លោកតា Santa Claus នៅពេលគេបោះសំបុត្រចូលក្នុងភ្នក់ភ្លើង។
សម្រាប់ប្រទេសអង់គ្លេស ក៏គេមានជំនឿថា នៅពេលគេយកស្រោមជើងទៅព្យួរនៅដើមឈើនៅក្រោមបំពង់បង្ហុយផ្សែង ដើម្បីទទួលបានប្រាក់មាសពីលោកតា Santa Claus។ ចំណែកការព្យួរស្លឹកដើមឈើ នៅជុំវិញដើមឈើ គេរំលឹកដល់រដូវធ្លាក់ទឹកកក និងរំលឹកដល់ថ្ងៃផ្ការីកដែលជិតមកដល់ឆាប់ៗរបស់ប្រទេសអង់គ្លេស។
ជារួម ពាក្យថា «Noel» ឬ«Christmas» ឬម្យ៉ាងទៀត «X’ mas» ត្រូវបានគេកំណត់ថាជាថ្ងៃដែលរំលឹកដល់ព្រះយេស៊ូដែលបានប្រសូតនៅភពផែនដីនៅថ្ងៃទី២៥ ខែឆ្នូ។ ប៉ុន្តែពួកគេភាគច្រើនមិនហៅថា បុណ្យព្រះយេស៊ូប្រសូតនោះទេ។ ពលរដ្ឋតែងតែហៅថាបុណ្យណូអែល «Noel» ឬហៅថាបុណ្យគ្រីស្មាស់ «Christmas»។
បច្ចុប្បន្នមិនមែនមានតែប្រជាជនដែលកាន់សាសនាគ្រិស្តប្រារព្ធពិធីនេះទេ សូម្បីតែប្រទេសដែលមិនគោរពសាសនាគ្រិស្ត ក៏គេចូលរួមប្រារព្ធពិធីនេះផងដែរ។ ចំពោះប្រជាពលរដ្ឋខ្មែរ ក៏ប្រារព្ធពិធីនេះយ៉ាងផុសភុលផងដែរ។
ពលរដ្ឋខ្មែរខ្លះតែងរៀបចំកាដូជូនគ្នាទៅវិញទៅមក ឬការចែកស្ករគ្រាប់គ្នាទៅវិញទៅមកផងដែរ។ ចំណែកនៅតាមស្ថាប័ន ក្រុមហ៊ុន សាលារៀន ឬផ្ទះសម្តែងនានា ក៏មានការរៀបចំដាក់បង្ហាញដើម «Christmas» ដោយមានភ្លើងភ្លឺផ្លេក និងប្រអប់កាដូយ៉ាងស្រស់ស្អាតផងដែរ៕
© រក្សាសិទ្ធិដោយ thmeythmey.com