ជាតិ
សង្គមជាតិ
សិស្សនៅកំពង់ចាមណែនាំពីមុខងារ APP របស់ខ្លួនដែលបានលេខ២ ក្នុងកម្មវិធីបច្ចេកវិទ្យា e-ICON
04, Jan 2021 , 8:59 am
×![]()
ភ្នំពេញ៖ យុវសិស្សថ្នាក់ទី១១ ចំនួន២នាក់ នៅវិទ្យាល័យហ៊ុនសែនកំពង់ចាម បានទទួលជ័យលាភីលេខ២ក្នុងការបង្កើតApp «ឆ្លើយសំណួរពីរបៀបប្រើប្រាស់ទឹកស្អាត និងអនា ម័យ» ក្នុងកម្មវិធីប្រកួតប្រជែងអន្តរជាតិ ផ្នែកបច្ចេកវិទ្យាe-ICON លើកទី១១ ដែលរៀបចំឡើងតាមអនឡាញដោយក្រសួងអប់រំសាធារណរដ្ឋកូរ៉េ កាលពីថ្ងៃទី៩ ខែកញ្ញា។ ក្រុមយុវសិស្សខ្មែរទាំងពីររូបនេះ ទទួលបានជ័យលាភីលេខ២ ក្នុងចំណោម១០ក្រុម ដែលមកពីប្រទេសចំនួន៨។ តាមរយៈកម្មវិធីនេះ យុវសិស្សទាំងពីរនាក់ ទទួលបានចំណេះដឹងផ្នែកទំនាក់ទំនង ជាមួយនឹងយុវសិស្សបរទេស និងការប្រើប្រាស់បច្ចេកវិទ្យា។ 
យុវសិស្សខ្មែរ២រូបបានចូលរួមបង្កើតApp ភាសាអង់គ្លេស«ឆ្លើយសំណួរពីរបៀបប្រើប្រាស់ទឹកស្អាត និងអនាម័យ»សម្រាប់ប្រកួតក្នុងកម្មវិធីប្រកួតប្រជែងអន្តរជាតិផ្នែកបច្ចេកវិទ្យា e-ICON ដែលរៀបចំឡើងដោយក្រសួងអប់រំកូរ៉េតាមអនឡាញ តាំងពីខែសីហា រហូតដល់ខែកញ្ញា ឆ្នាំ២០២០។ កម្មវិធីនេះ តម្រូវឲ្យបេក្ខជនក្រុមនីមួយៗមានសមាជិកចំនួន៤នាក់ ដោយ២នាក់ជាយុវសិស្សខ្មែរ និង២នាក់ទៀតជាយុវសិស្សកូរ៉េ ។ ក្រុមយុវសិស្សខ្មែរទាំងពីរនេះ ទទួលបានជ័យលាភីលេខ២ ក្នុងចំណោមក្រុមយុវសិស្សអាយុ១៧ឆ្នាំ ចំនួន១០ក្រុម ដែលមកពី៨ប្រទេសខុសៗគ្នា។
យុវសិស្សថា្នក់ទី១១ ហេង ពុធភា នៅវិទ្យាល័យហ៊ុនសែនកំពង់ចាម ខេត្តកំពង់ចាម បានបញ្ជាក់ប្រាប់អ្នកសារព័ត៌មានថ្មីៗតាមទូរសព្ទថា ការចូលរួមបង្កើត App ដោយមានសមាជិកជាយុវសិស្សខ្មែរផង និងកូរ៉េផង រួមទាំងនៅឆ្ងាយពីគ្នាផងនោះ មិនមែនជារឿងងាយស្រួលសម្រាប់ក្រុមដែលមានសមាជិកសញ្ជាតិខុសគ្នាឡើយ។
មុខងារនៃApp បែបហ្គេមឆ្លើយនឹងសំណួរអំពីការប្រើប្រាស់ទឹកស្អាត និងការអនាម័យ
«ពេលបង្កើតAppហ្នឹង ក្រុមរបស់ខ្ញុំគឺនៅឆ្ងាយពីគ្នា។ ពេលពួកខ្ញុំត្រូវការនិយាយគ្នា ពួកខ្ញុំគឺត្រូវវីដេអូខលដោយនិយាយជាភាសាអង់គ្លេស។ ដោយសារអ៊ីនធឺណិតនៅកន្លែងខ្ញុំវាខ្សោយ។ អ៊ីចឹងយើងនិយាយគ្នាអត់សូវបានដល់កម្រិតដែលយើងចង់បានទេ។ ហើយការប្រើប្រាស់ភាសា ពួកយើងប្រើភាសាគោលមួយគឺភាសាអង់គ្លេស។ ជួនណាខ្ញុំនិយាយទៅគាត់ស្តាប់អត់សូវបាន។ ពេលខ្លះពួកគាត់និយាយមកក៏ពួកខ្ញុំស្តាប់មិនសូវបាន។ ពេលវេលានៅប្រទេសកូរ៉េ និងកម្ពុជាគឺខុសគ្នាចំនួន២ម៉ោង»។ នេះជាការលើកឡើងរបស់យុវសិស្ស ហេង ពុធភា។
ទោះបីការពិភាក្សាគ្នាតាមអនឡាញជួបផលលំបាកក្តី តែយុវសិស្សខ្មែរចំនួន២នាក់នេះ នៅតែបានបន្តសហការ និងសាមគ្គីគ្នាជាមួយនឹងសមាជិកក្រុមរបស់ខ្លួន ដែលនៅប្រទេសកូរ៉េ ដោយពុំមានភាពខ្វែងគំនិតពីគ្នាឡើយ។ «ពេលពួកយើងមានចម្ងល់ ឬដឹងអ្វីអ៊ីចឹង យើងតែងតែចែករំលែកបទពិសោធ និងចំណេះដឹងគ្នាទៅវិញទៅមក។ ពួកខ្ញុំអត់មានទំនាស់គ្នាទេ ពួកខ្ញុំតែងតែសាមគ្គីគ្នា សហការគ្នា និងចេះស្តាប់ហេតុផលគ្នាទៅវិញទៅមក»។ នេះជាការរៀបរាប់របស់យុវសិស្ស ពុធភា ដែលតែងតែផ្សារភ្ជាប់ទំនាក់ទំនងល្អជាមួយនឹងសមាជិកក្រុមរបស់ខ្លួន។
យុវសិស្សថា្នក់ទី១១ អឿ ធាមៈនី នៅវិទ្យាល័យហ៊ុនសែនកំពង់ចាម ខេត្តកំពង់ចាម បានទទួលសៀវភៅ និងរង្វាន់លើកទឹកចិត្តពីលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា
តាមរយៈការសហការគ្នាបង្កើតApp សម្រាប់ប្រកួតនេះ ក្រុមយុវសិស្សខ្មែរពីររូប ទទួលបានបទពិសោធក្នុងការប្រើប្រាស់បច្ចេកវិទ្យាជាងមុន។ យុវសិស្ស ហេង ពុធភាបាននិយាយថា៖«នៅពេលដែលក្រុមរបស់ខ្ញុំបានចូលរួមកម្មវិធីហ្នឹង ខ្ញុំបានហ្វឹកហាត់ខ្លួនរបស់ខ្ញុំច្រើនមែនទែន។ ខ្ញុំយល់ពីការចងកូដ សរសេរកូដ ឌីហ្សាញApp ដែលការងារនេះពីមុនមកខ្ញុំអត់ដែលបានធ្វើទេ។ វាជាបទពិសោធថ្មីសម្រាប់ខ្ញុំ។ ដោយសារសិស្សកូរ៉េយល់ច្បាស់ពីបច្ចេកវិទ្យាខ្លាំង ដូច្នេះជួយឲ្យខ្ញុំទទួលបានចំណេះដឹងពីពួកគាត់មក។ យើងផ្តល់ឲ្យគ្នាទៅវិញទៅមក»។
យុវសិស្ស ហេង ពុធភា បានពន្យល់ពីមុខងារនៃApp ដូច្នេះថា៖«App ហ្នឹងយើងប្រើ ដោយមានសំណួរ (Quiz) បែបហ្គេមដែលមានរូបភាព ដើម្បីឲ្យពួកគេឆ្លើយសំណួរ ដោយមានសំណួរ ហើយមានចម្លើយ៤ឲ្យគាត់ជ្រើសរើស និងឆ្លើយ ដែលនិយាយអំពីការប្រើប្រាស់ទឹកស្អាត និងអនាម័យ»។
បើតាមយុវសិស្ស ហេង ពុធភា App បែបហ្គេមឆ្លើយនឹងសំណួរអំពីការប្រើប្រាស់ទឹកស្អាត និងការអនាម័យនោះមិនទាន់អាចដំឡើងនៅលើទូរសព្ទបានឡើយ គឺត្រូវរង់ចាំការស្រាវជ្រាវ និងសិក្សាបន្ថែមទៀត៕
យុវសិស្សថា្នក់ទី១១ ហេង ពុធភា នៅវិទ្យាល័យហ៊ុនសែនកំពង់ចាម ខេត្តកំពង់ចាម បានទទួលសៀវភៅ និងរង្វាន់លើកទឹកចិត្តពីលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា
Tag:
យុវសិស្ស
ជ័យលាភី
App
© រក្សាសិទ្ធិដោយ thmeythmey.com
