ឡាវ បានចាក់វ៉ាក់សាំងប្រឆាំងកូវីដ-១៩ របស់ក្រុមហ៊ុនឱសថចិន Sinopharm លើក្រុមគ្រូពេទ្យមួយចំនួន ដែលព្យាបាល និងថែទាំអ្នកជំងឺកូវីដ-១៩។ នេះបើតាមការអះអាងរបស់ រដ្ឋមន្ត្រីសុខាភិបាលឡាវ លោក Bounkong Syhavong នៅថ្ងៃទី៣១ ខែធ្នូ កន្លងទៅ។
នៅក្នុងសេចក្តីថ្លែងការណ៍មួយ រដ្ឋមន្ត្រីសុខាភិបាលឡាវ លោក Bounkong Syhavong បានអះអាងថា ឡាវបានទទួលវ៉ាក់សាំងប្រឆាំងកូវីដ-១៩ ចំនួន២ពាន់ដូសពីក្រុមហ៊ុនឱសថ Sinopharm ។ បើតាមលោករដ្ឋមន្ត្រី វ៉ាក់សាំងខ្លះ ត្រូវបានចាក់លើក្រុមគ្រូពេទ្យ និងបុគ្គលិកសុខាភិបាល ដែលថែទាំអ្នកជំងឺកូវីដ-១៩។ នេះបើតាមការចុះផ្សាយរបស់កាសែត Vientiane Times។
«ការចាក់វ៉ាក់សាំងប្រឆាំងកូវីដ-១៩ ទទួលបានលទ្ធផលល្អ និងមិនមានផលប៉ះពាល់អវិជ្ជមាន បានលេចឡើងឡើយ»។ លោក Bounkong បានបញ្ជាក់ថាបែបនេះ ដោយបន្ថែមថា វ៉ាក់សាំងទាំងនោះ ត្រូវបានប្រើប្រាស់ក្នុងស្ថានការណ៍បន្ទាន់តែប៉ុណ្ណោះ និងដោយផ្អែកលើការស្ម័គ្រចិត្ត។ ការចាក់វ៉ាក់សាំងលើកដំបូង ធ្វើលើក្រុមគ្រូពេទ្យប្រមាណ ២០០នាក់។
មកទល់ពេលនេះ ឡាវ មិនទាន់អនុម័តឲ្យប្រើប្រាស់វ៉ាក់សាំងណាមួយជាផ្លូវការនៅឡើយទេ។ ទំនងជាចង់ការពារ និងបង្ការការរិះគន់ពីមជ្ឈដ្ឋានមួយចំនួន លោករដ្ឋមន្ត្រីសុខាភិបាល បានអះអាងថា វ៉ាក់សាំង Sinopharm ជាវ៉ាក់សាំងមួយក្នុងចំណោមវ៉ាក់សាំងផ្សេងទៀត ដែលកំពុងស្ថិតក្រោមការត្រួតពិនិត្យរបស់អង្គការសុខភាពពិភពលោក (WHO)។ ទន្ទឹមនេះ លោក Bounkong បានបន្តថា ចិន ក៏បានចាក់វ៉ាក់សាំងរបស់ក្រុមហ៊ុន Sinopharm លើប្រជាជនខ្លួនជាច្រើនលាននាក់ផងដែរ។
ថ្មីៗនេះ ក្រុមហ៊ុន Sinopharm បានអះអាងថា វ៉ាក់សាំងរបស់ខ្លួនមានប្រសិទ្ធភាពរហូតដល់ ៧៩,៣៤ ភាគរយ ក្នុងការប្រយុទ្ធប្រឆាំងកូរ៉ូណាវីរុស។ វ៉ាក់សាំងប្រភេទនេះ ទាមទារឲ្យចាក់លើមនុស្សចំនួន ២ដូស និងអាចស្តុកទុកក្នុងសីតុណ្ណភាពពី ២ ទៅ៨ អង្សាសេប៉ុណ្ណោះ។
ក្រៅពីក្រុមហ៊ុន Sinopharm ឡាវ ក៏បានទទួលវ៉ាក់សាំងរបស់រុស្ស៊ី Sputnik V ចំនួន៥០០ដូសផងដែរ។ លើសពីនេះ ឡាវ ត្រៀមទទួលវ៉ាក់សាំងប្រឆាំងកូវីដ-១៩ ពីគម្រោង COVAX ស្ថិតក្រោមការគ្រប់គ្រងរបស់អង្គការ WHO ដែលអាចចាក់លើប្រជាជនឡាវ ១,៤លាននាក់ ឬ២០ភាគរយ នៃប្រជាជនសរុប។ គម្រោងនេះ អាចនឹងចាប់ផ្តើមនៅក្នុងខែមេសា ខាងមុននេះ។
កន្លងមក ប្រមុខរដ្ឋាភិបាលឡាវ លោក ថងលួន ស៊ីសូលីត បានបញ្ជាឲ្យអាជ្ញាធរត្រៀមខ្លួនឲ្យរួចរាល់ ដើម្បីចាក់វ៉ាក់សាំងលើប្រជាជនរបស់ខ្លួន។ ម្យ៉ាងវិញទៀត រដ្ឋាភិបាលឡាវ ក៏បានត្រៀមថវិកាបម្រុងមួយចំនួន សម្រាប់ទិញវ៉ាក់សាំងដែរ។
គិតត្រឹមថ្ងៃទី៣ ខែមករា ឡាវនៅតែជាប្រទេស ដែលមានករណីឆ្លងសរុបតិចជាងគេ នៅក្នុងតំបន់អាស៊ីអាគ្នេយ៍ ដោយមានចំនួន ៤១ករណី និងគ្មានករណីស្លាប់។ ចំណែកអ្នកជាសះស្បើយមានចំនួន ៤០នាក់៕