កីឡាជាតិ
ជាតិ
ធី លៀង ដែលជួយ U18 កម្ពុជាយកឈ្នះវៀតណាម និងយុវជន៣រូបទៀត ត្រូវបានរំសាយពីបាទី
06, Jan 2021 , 10:29 pm
កីឡាករ ធី លៀង ផ្តល់បទសម្ភាសដល់អ្នកសារព័ត៌មានក្រោយជំនួប AFC U19 Championship
×![]()
ខ្សែបម្រើ ធី លៀង ដែលបានរួមចំណែកជួយសាងប្រវត្តិសាស្ត្រឲ្យកម្ពុជាក្នុងព្រឹត្តិការណ៍ AFF U18 Championship កាលពីឆ្នាំ២០១៩ រួមជាមួយយុវជន៣រូបផ្សេងទៀត ត្រូវបានរំសាយការប្រមូលផ្តុំហ្វឹកហាត់ពីមជ្ឈមណ្ឌលសាលាបាល់ទាត់ជាតិបាទី។ នេះបើតាមការប្រកាសរបស់សហព័ន្ធកីឡាបាល់ទាត់កម្ពុជា កាលពីថ្ងៃទី៥ មករា ឆ្នាំ២០២០។
យុវជនចំនួន៤រូបរួមមានខ្សែបម្រើ ធី លៀង, អ្នកចាំទី ទួត សារ៉ូត, ខ្សែការពារ ជា សុខម៉េង និងកីឡាករ ឈឹម ពេជពន្លឺ ត្រូវបានសហព័ន្ធកីឡាបាល់ទាត់កម្ពុជា ប្រកាសរំសាយការហ្វឹកហាត់ពីសាលាបាល់ទាត់ជាតិបាទី។ ការប្រកាសនេះ ធ្វើឡើងក្រោយពួកគេទាំង៣រូប ដល់អាយុកំណត់ដែលត្រូវរំសាយត្រឹមឆ្នាំ២០២១។ កីឡាករទាំងបីរូប សុទ្ធតែកើតនៅឆ្នាំ២០០២។
ខ្សែបម្រើ ធី លៀង បានរួមចំណែកជួយឲ្យក្រុមជម្រើសជាតិអាយុក្រោម១៨ឆ្នាំកម្ពុជា យកឈ្នះក្រុមម្ចាស់ផ្ទះវៀតណាមក្នុងលទ្ធផល ២-១ នាការប្រកួត AFF U18 Championship កាលពីអំឡុងខែសីហា ឆ្នាំ២០១៩។ ដោយកាលនោះ ធី លៀង ជាអ្នករកគ្រាប់បាល់ទីពីរឲ្យកម្ពុជានៅនាទីបន្ថែមក្នុងតង់ទីពីរ បន្ទាប់ពីគ្រាប់បាល់នាំមុខរបស់ខ្សែប្រយុទ្ធ សៀង ចន្ធា។
គ្រាប់បាល់មួយគ្រាប់របស់ ធី លៀង នៅចុងម៉ោង ដែលអាជ្ញាកណ្តាលរៀបនឹងផ្លុំកញ្ចែបញ្ចប់ការប្រកួតនេះ បានជួយសាងប្រវត្តិសាស្ត្រឲ្យវិស័យកីឡាបាល់ទាត់កម្ពុជា ខណៈកន្លងមកក្រុម U18 កម្ពុជាពុំធ្លាប់ឈ្នះវៀតណាមនោះទេ។ នៅឆ្នាំ២០០២ កម្ពុជាចាញ់វៀតណាម ៣-១ បន្ទាប់មកនៅឆ្នាំ២០០៣ និង ២០០៧ កម្ពុជាចាញ់វៀតណាមក្នុងលទ្ធផល ៥-០ ដូចគ្នា។
នៅក្នុងជំនួបកម្ពុជាយកឈ្នះវៀតណាម ២-១ ជាប្រវត្តិសាស្ត្រនោះដែរ ក៏មានវត្តមានខ្សែការពារ ជា សុខម៉េង ផងដែរ៕
Tag:
បាល់ទាត់
ធី លៀង
ជា សុខម៉េង
ទួត សារ៉ូត
ឈឹម ពេជពន្លឺ
© រក្សាសិទ្ធិដោយ thmeythmey.com
