ជាតិ
សេដ្ឋកិច្ច
កម្ពុជា នាំចេញម្ទេស ក្រូចឆ្មារ និងក្រូចថ្លុង ទៅថៃ ជាង៧៣លានដុល្លារ ក្នុងឆ្នាំ២០២០ 08, Jan 2021 , 10:29 pm
× ភ្នំពេញ៖ ពេញមួយឆ្នាំ២០២០នៃវិបត្តិកូវីដ-១៩ កម្ពុជានាំចេញម្ទេស ក្រូចឆ្មារ និងក្រូចថ្លុង ទៅទីផ្សារក្នុងប្រទេសថៃ បាន៩២,១២៦តោន ស្មើនឹងទំហំទឹកប្រាក់ជាង៧៣លានដុល្លារអាមេរិក។ បើតាមរបាយការណ៍នាំចេញប្រចាំ២០២០ ដែលសារព័ត៌មានថ្មីៗទទួលបានពីលោក កែ មុន្ធីវុធ នាយកដ្ឋានការពារដំណាំអនាម័យ និងភូតគាមអនាម័យ ។
របាយការណ៍ដដែល បានបង្ហាញថា ក្នុងចំណោមបរិមាណនាំចេញខាងលើ គឺមានម្ទេស ៧០,៥៤៦តោន ស្មើនឹងទឹកប្រាក់ជាង៤៤លានដុល្លារ។ ចំនួននេះ បានកើនជាង២៧ភាគរយ បើធៀបនឹងឆ្នាំ២០១៩។
ដោយឡែក ការនាំចេញក្រូចឆ្មារវិញ កម្ពុជាសម្រេចបាន២,៣០០តោន មានតម្លៃជាង២លានដុល្លារ និងក្រូចថ្លុងបាន១៧,៤០០តោន មានតម្លៃជាង២៦លានដុល្លារ។ នេះបើតាមរបាយការណ៍ ដែលបានបញ្ជាក់ថា ការនាំចេញក្រូចឆ្មារ និងក្រូចថ្លុងរបស់កម្ពុជានេះ គឺជាការសម្រេចបានជាលើកដំបូងនៅក្នុងឆ្នាំ២០២០។
សម្រាប់ឆ្នាំ២០២០កន្លងមកនេះ ក្រៅមុខពីដំណាំកសិកម្មខាងលើនេះ កម្ពុជាក៏សម្រេចបាននូវនាំចេញគ្រាប់ស្វាយចន្ទី, គ្រាប់ពោត, ផ្លែចេក, ផ្លែស្វាយ ម្រេច, ល្ង, សណ្តែកបាយ និងគ្រាប់ឈូក បានសរុបជិត៧៧,៧ម៉ឺនតោនផងដែរ។ នេះបើតាមទិន្នន័យរបស់គ្រឹះភូតគាមអនាម័យនៃអគ្គនាយកដ្ឋានកសិកម្មរបស់ក្រសួងកសិកម្ម រុក្ខាប្រមាញ់ និងនេសាទ៕
© រក្សាសិទ្ធិដោយ thmeythmey.com