COVID-19
អន្តរជាតិ
ថៃ នឹងយករីសតទីលានវាយកូនហ្គោលធ្វើជាកន្លែងចត្តាឡីស័ក ដើម្បីជំរុញទេសចរណ៍ 12, Jan 2021 , 10:27 am
រូបថត AFP
×
ដោយ៖ ឈួន ឈីវអ៊ីង
រដ្ឋមន្ត្រីទេសចរណ៍ថៃ លោក Phiphat Ratchakitprakarn បាននិយាយនៅថ្ងៃទី១១ ខែមករា ថា លោកបានដាក់ស្នើគម្រោងមួយឲ្យភ្ញៀវបរទេសអាចធ្វើចត្តាឡីស័កនៅរីសតដែលមានទីលានវាយកូនហ្គោល។ គម្រោងនេះមានគោលដៅជំរុញវិស័យទេសចរណ៍ក្នុងស្រុកដែលរងផលប៉ះពាល់ខ្លាំងអំឡុងពេលវិបត្តិកូវីដ-១៩។
«យើងកំពុងជជែកជាមួយក្រសួងសុខភាពសាធារណៈនិងក្រុមការងាររួមប្រយុទ្ធវីរុសកូរ៉ូណាដើម្បីផ្ដល់ការធ្វើចត្តាឡីស័កនៅរីសតវាយកូនហ្គោល និងសណ្ឋាគារសម្រាប់អ្នកទេសចរដែលមានវិញាបនបត្រសុខាភិបាល។» នេះជាការលើកឡើងរបស់រដ្ឋមន្ត្រីទេសចរណ៍ថៃ លោក Phiphat Ratchakitprakarn នៅថ្ងៃទី១១ ខែមករា។
បើតាម Phiphat ភ្ញៀវទេសចរអន្តរជាតិ អាចចំណាយពេលធ្វើចត្តាឡីស័ក ២សប្តាហ៍នោះដើម្បីសម្រាកលំហែនៅឯរីស៊ត និងវាយកូនហ្គោល ដែលប្រសើរជាងការដែលនៅសម្រាកតែក្នុងបន្ទប់មួយកន្លែង។ លោក Phiphat បានបន្ថែមថា ការផ្តល់ជូនទិដ្ឋាការពិសេសដល់ភ្ញៀវទេសចរបរទេស ដើម្បីស្នាក់នៅក្នុងរយៈពេលយូរនាឆ្នាំ២០២០ ក៏បានទាក់ទាញភ្ញៀវទេសចរប្រមាណមួយពាន់នាក់រួចមកហើយដែរ។
ស្របតាមគម្រោងនេះ ក្រសួងសុខាភិបាលថៃ នឹងប្រកាសឈ្មោះទីលានវាយកូនហ្គោល និងសណ្ឋាគារដែលត្រូវជ្រើសរើសជាទីតាំងធ្វើចត្តាឡីស័កជំនួសឲ្យទីតាំងដែលបានកំណត់។ លោកវេជ្ជបណ្ឌិត Tares Krassanairawiwong អគ្គនាយកនៃអគ្គនាយកដ្ឋានគាំទ្រសេវាសុខភាព និយាយថា ការធ្វើចត្តាឡីស័កបែបនេះ ត្រូវអនុញ្ញាតចំពោះតែអ្នកដំណើរមកពីប្រទេសមានហានិភ័យទាប ហើយមានលិខិតបញ្ជាក់គ្មានផ្ទុកមេរោគកូវីដ-១៩ រយៈពេល៧២ម៉ោងមុនពេលចេញដំណើរទៅថៃ រួមទាំងលិខិតបញ្ជាក់ការចូលមកប្រទេសថៃពីស្ថានទូតថៃនៅក្នុងប្រទេសរបស់ពួកគេផងដែរ។
លើសពីនោះ ពួកគេ ក៏ត្រូវធ្វើតេស្តបីដងអំឡុងពេលនេះ ហើយបើមានលទ្ធផលវិជ្ជមាន ត្រូវបញ្ជូនទៅមន្ទីរពេទ្យ ហើយចេញថ្លៃចំណាយព្យាបាលដោយខ្លួនឯង។ នេះបើតាមការផ្សាយរបស់កាសែតបាងកកប៉ុស្តិ៍។
ទេសចរណ៍ ជាវិស័យដ៏សំខាន់មួយរបស់ថៃ និងជាប្រភពចំណូលដ៏ធំរបស់ប្រទេសអាស៊ីអាគ្នេយ៍នេះដែរ។ កាលពីឆ្នាំ២០១៩ កន្លងទៅ ថៃបានទាក់ទាញភ្ញៀវទេសចរ ៤០លាននាក់ និងទទួលបានចំណូលប្រមាណ៦៣.៤ពាន់លានដុល្លារ។ ប៉ុន្តែការផ្ទុះជំងឺកូវីដ-១៩ ធ្វើឲ្យទេសចរធ្លាក់ចុះដោយសារការបិទព្រំដែន។ សណ្ឋាគារ ភោជនីយដ្ឋាន និងកន្លែងកីឡានានាដែលពឹងផ្អែកលើភ្ញៀវទេសចរអន្តរជាតិ រងគ្រោះខ្លាំងដោយសាររឿងនេះ៕
© រក្សាសិទ្ធិដោយ thmeythmey.com