COVID-19
អន្តរជាតិ
ម៉ាឡេស៊ី ដាក់ប្រទេសក្នុងស្ថានភាពអាសន្ន ដើម្បីទប់ស្កាត់ករណីឆ្លងកូវីដ-១៩
12, Jan 2021 , 2:59 pm
×![]()
ដោយ: ធៀន ភារិន្ទ
មហាក្សត្រម៉ាឡេស៊ី Al-Sultan Abdullah នៅថ្ងៃទី១២ ខែមករា បានប្រកាសដាក់ប្រទេសក្នុងស្ថានភាពអាសន្ន បន្ទាប់ពីករណីឆ្លងបន្តហក់ឡើងខ្លាំងនៅក្នុងប្រទេស។ នេះបើតាមសេចក្តីថ្លែងការណ៍របស់ព្រះរាជវាំងម៉ាឡេស៊ី។ ការដាក់ប្រទេសក្នុងស្ថានភាពអាសន្ននេះ នឹងមានសុពលភាពរហូតដល់ខែសីហាខាងមុខ។ 
ករណីឆ្លងកូវីដ-១៩ នៅក្នុងម៉ាឡេស៊ី ត្រូវបានអាជ្ញាធរសុខាភិបាលអះអាងថា មានករណីឆ្លងជាច្រើនពាន់ករណី។ នៅថ្ងៃទី១១ ខែមករា ម៉ាឡេស៊ី បានប្រកាសថា មានករណីឆ្លងចំនួន ២២៣២នាក់ និងអ្នកស្លាប់ចំនួន៤នាក់។ តួលេខសរុប ម៉ាឡេស៊ី មានអ្នកឆ្លងកូវីដ-១៩ រហូតដល់ ១៣៨២២៤នាក់ និងអ្នកស្លាប់មានចំនួន ៥៥៥នាក់។
ដ្បិតមានវិធានការទប់ស្កាត់ឲ្យប្រជាជនពាក់ម៉ាស់ ការរក្សាគម្លាតសុវត្ថិភាពក៏ដោយ ករណីឆ្លង ក៏នៅតែបន្តហក់ឡើង។ ដើម្បីទប់ស្កាត់ករណីឆ្លងនេះ មហាក្សត្រម៉ាឡេស៊ី Al-Sultan Abdullah បានសម្រេចដាក់ប្រទេសក្នុងស្ថានភាពអាសន្នតាមការស្នើរបស់រដ្ឋាភិបាលនាយករដ្ឋមន្ត្រី មូហ៊ីឌីន យ៉ាស៊ីន ។ បើតាមសេចក្តីថ្លែងការណ៍របស់ព្រះរាជវាំងម៉ាឡេស៊ី ការដាក់ប្រទេសក្នុងស្ថានភាពអាសន្ននេះ នឹងមានសុពលភាពរហូតដល់ខែសីហា ឬអាចមុនខែសីហា ដោយអាស្រ័យលើស្ថានភាពឆ្លងនៅក្នុងប្រទេស។
មហាក្សត្រម៉ាឡេស៊ី ក៏បានអនុញ្ញាតឲ្យរដ្ឋាភិបាលបង្កើតគណៈកម្មាធិការឯករាជ្យមួយដែរ ដោយមានសមាជិកសភាខាងរដ្ឋាភិបាល ,សមាជិកសភាបក្សប្រឆាំង និងអ្នកជំនាញសុខាភិបាលចូលរួម ដើម្បីងាយស្រួលក្នុងការគ្រប់គ្រងស្ថានការណ៍កូវីដ-១៩ នៅក្នុងប្រទេស។
បន្ទាប់ពីការប្រកាសរបស់មហាក្សត្រម៉ាឡេស៊ី លោកនាយករដ្ឋមន្ត្រីម៉ាឡេស៊ី បានធ្វើសន្និសីទសារព័ត៌មានមួយ ជុំវិញការដាក់ប្រទេសក្នុងស្ថានភាពអាសន្ន។ បើតាមលោក យ៉ាស៊ីន ការប្រកាសដាក់ប្រទេសនេះ នឹងមិនអនុញ្ញាតឲ្យសភាបើកអង្គប្រជុំឡើយ ចំណែកការបោះឆ្នោតជាសកល ការបោះឆ្នោតថ្នាក់រដ្ឋ និងការបោះឆ្នោតបំពេញកៅអីទំនេរ ត្រូវហាមឃាត់។
ក្នុងសេចក្ដីថ្លែងការណ៍ថ្ងៃទី១២ ខែមករា ប្រមុខរដ្ឋាភិបាលម៉ាឡេស៊ី បញ្ជាក់ថា អំឡុងពេលអាសន្ននេះ កិច្ចប្រជុំសភាត្រូវផ្អាក ហើយការបោះឆ្នោតគ្រប់កម្រិត ត្រូវពន្យារ។ លោកបបកស្រាយថា ការប្រកាសដាក់ប្រទេសក្នុងស្ថានភាពអាសន្ន ក៏មិនមែនជារដ្ឋប្រហារយោធាឡើយ ប៉ុន្តែវាជាការទប់ស្កាត់កូវីដ-១៩ នៅក្នុងប្រទេស។ ចំណែករដ្ឋាភិបាលនៅបន្តកិច្ចការរបស់ខ្លួនធម្មតាក្នុងអំឡុងពេលនេះ ហើយបម្រាមគោចរ ក៏មិនមានដែរ។
នៅក្នុងខែតុលា ឆ្នាំ២០២០ លោក យ៉ាស៊ីន បានស្នើទៅមហាក្សត្រឲ្យប្រកាសស្ថានភាពអាសន្នម្ដងដែរ ប៉ុន្តែត្រូវបដិសេធសំណើ ព្រោះស្ថានការណ៍ អាចគ្រប់គ្រងបាន។ ម្យ៉ាងនៅពេលនោះ ម៉ាឡេស៊ីមានបញ្ហានយោបាយផងដែរ។ ប៉ុន្តែនៅពេលនេះ គឺខុសគ្នា ដោយសារករណីកូវីដ-១៩ បានហក់ឡើង ខណៈពេលគ្រែសម្រាប់ដាក់អ្នកជំងឺនៅក្នុងមន្ទីរពេទ្យ និងបន្ទប់សង្គ្រោះបន្ទាន់ គឺស្ទើរតែជិតពេញអស់។ នេះបើតាមការចុះផ្សាយរបស់កាសែត The Straits Times។
ការប្រកាសដាក់ប្រទេសក្នុងស្ថានភាពអាសន្ននេះ ធ្វើឡើងបន្ទាប់ពីលោក យ៉ាស៊ីន នៅថ្ងៃទី១១ ខែមករា បានប្រកាសដាក់រដ្ឋចំនួន៥ និងតំបន់ផ្សេងទៀតនៅម៉ាឡេស៊ី ក្រោមបទបញ្ជាគ្រប់គ្រងការធ្វើដំណើរ (MCO) ដែលមានរយៈពេល២សប្តាហ៍ ដោយមានសុពលភាពដល់ថ្ងៃទី២៦ ខែមករា។ ក្រោមបទបញ្ជាគ្រប់គ្រងការធ្វើដំណើរនេះ រដ្ឋាភិបាលមិនអនុញ្ញាតឲ្យប្រជាពលរដ្ឋឆ្លងកាត់រដ្ឋ និងតំបន់ទាំងនោះឡើយ។
នៅក្នុងខែមីនា ឆ្នាំ២០២០ កន្លងទៅ ម៉ាឡេស៊ី បានប្រកាសបិទប្រទេសទាំងមូល និងអនុវត្តបទបញ្ជាគ្រប់គ្រងការធ្វើដំណើរដែរ បន្ទាប់ពីមានករណីឆ្លងកូវីដ-១៩ ហើយថែមទាំងពង្រាយកងទ័ព នៅក្នុងប្រទេសថែមទៀត៕
Tag:
ម៉ាឡេស៊ី
កូវីដ-១៩
© រក្សាសិទ្ធិដោយ thmeythmey.com
