លោក អាន់តូនីញ៉ូ ហ្គូតេរ៉េស អគ្គលេខាធិការអង្គការសហប្រជាជាតិ (UN) បានប្រកាសបំណងឈរឈ្មោះអាណត្តិទីពីរ ខណៈអាណត្តិទីមួយរបស់លោក នឹងបញ្ចប់នៅថ្ងៃទី៣១ ធ្នូ ឆ្នាំ២០២១។ ក្នុងអាណត្តិដំបូង លោក ហ្គូតេរ៉េស ប្តេជ្ញាជំរុញការទូតសន្តិភាព ប៉ុន្តែរយៈពេលបួនឆ្នាំមកនេះពិភពលោកមើលឃើញការកើនឡើងជម្លោះរវាងចិន-អាមេរិក ជម្លោះតាមតំបន់ វិសមភាពនៃកំណើនសេដ្ឋកិច្ច ការនៅនឹងថ្កល់នៃសណ្តាប់ធ្នាប់ពហុភាគីនិយម និងជំងឺកូវីដ-១៩។
អតីតនាយករដ្ឋមន្ត្រីព័រទុយហ្កាល់ និងបន្ទាប់មកជាអតីតប្រធានទីភ្នាក់ងារជនភៀសខ្លួនរបស់អង្គការសហប្រជាជាតិ លោក អាន់តូនីញ៉ូ ហ្គូតេរ៉េស ត្រូវបានអង្គមហាសន្និបាតបោះឆ្នោតតែងតាំងជាអគ្គលេខាធិការ UN ដែលមានរយៈពេល៥ឆ្នាំក្នុងការប្រកួតប្រជែងកាលពីខែតុលា ឆ្នាំ២០១៦។ គ្រានោះមានបេក្ខជនចំនួន១៣រូប ដែលក្នុងនោះប្រាំពីររូបជាស្ត្រី និងប្រាំមួយរូបជាបុរស។ លោក ហ្គូតេរ៉េស ចូលកាន់តំណែងនៅថ្ងៃទី១ មករា ឆ្នាំ២០១៧។
«ខ្ញុំ នៅតែអាចបម្រើអង្គការសហប្រជាជាតិបានសម្រាប់អាណត្តិទីពីរ បើសិននេះជាឆន្ទៈរបស់រដ្ឋសមាជិក»។ នេះជាការលើកឡើងក្នុងលិខិតរបស់លោក ហ្គូតេរ៉េស ផ្ញើទៅកាន់លោក Volkan Bozkir ប្រធានអង្គមហាសន្និបាត UN កាលពីថ្ងៃទី៣១ ខែធ្នូ ឆ្នាំ២០២០។ លោកបន្តថា វាជាកិត្តិយសសម្រាប់លោកក្នុងការបន្តបម្រើអង្គការនេះដើម្បីសម្រេច និងបំពេញគោលបំណង និងគោលដៅដ៏ឧត្តុងឧត្តម។
លោក Bozkir បានផ្ញើលិខិតសួរលោក ហ្គូតេរ៉េស ពីបំណងបន្តឈរឈ្មោះឬយ៉ាងណា។ នេះបើយោងតាមទីភ្នាក់ងារព័ត៌មាន AFP ។
លោក Stephane Dujarric អ្នកនាំពាក្យ UN អះអាងថា លោក ហ្គូតេរ៉េស ក៏បានជូនដំណឹងរួចហើយនៅថ្ងៃទី៨ មករាទៅទូតចិន រុស្ស៊ី បារាំង អាមេរិក និងអង់គ្លេសដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខ។ ក្រុមប្រឹក្សាសន្តិសុខ ជ្រើសរើសបេក្ខភាពអគ្គលេខាធិការសម្រាប់ការបោះឆ្នោតនៅមហាសន្និបាត។ ដូច្នេះការគាំទ្រពីសមាជិកក្រុមប្រឹក្សាសន្តិសុខ ជាពិសេសសមាជិកអចិន្ត្រៃយ៍ ជារឿងមិនអាចខ្វះបាន។
នៅថ្ងៃទី១១ មករា លោក ហ្គូតេរ៉េស ទទួលបានការគាំទ្រដំបូងពីអង់គ្លេស។ លោកបូរីស ចនសុននាយករដ្ឋមន្ត្រីអង់គ្លេសសាទរចំពោះសេចក្តីសម្រេចចិត្តរបស់លោក ហ្គូតេរ៉េស ចំពោះការប្រកាសឈរឈ្មោះអាណត្តិទីពីរ ក៏ដូចជាអបអរការបញ្ចប់អាណត្តិទីមួយដោយជោគជ័យ។ នេះយោងតាមសេចក្ដីថ្លែងការណ៍ការិយាល័យនាយករដ្ឋមន្ត្រីអង់គ្លេស។
បន្ថែមពីនេះ លោក ហ្គូតេរ៉េស ក៏បានជជែកជាមួយថ្នាក់ដឹកនាំក្រុមប្រទេសតាមតំបន់ផងដែរ។ រដ្ឋសមាជិកនៃអង្គការសហប្រជាជាតិ បែងចែកជាក្រុមក្រៅផ្លូវការចំនួន៥គឺ ក្រុមអាហ្វ្រិក(៥៤រដ្ឋ) ក្រុមអាស៊ី និងប៉ាស៊ីហ្វិក(៥៣រដ្ឋ) ក្រុមអឺរ៉ុបខាងកើត(២៣រដ្ឋ) ក្រុមអឺរ៉ុបខាងលិច និងក្រុមដទៃទៀត(២៩រដ្ឋ) និងក្រុមអាមេរិកឡាទីន និងការ៉ាអ៊ីប(៣៣រដ្ឋ)។
ក្រោយលោក ហ្គូតេរ៉េស បញ្ជូនលិខិតស្តីពីការឈរឈ្មោះអាណត្តិទីពីរ ដំណាក់កាលបន្ទាប់គឺប្រធានក្រុមប្រឹក្សាសន្តិសុខ និងអគ្គមហាសន្និបាត នឹងចាប់ផ្តើមនីតិវិធីក្នុងការស្វែងរកបេក្ខជនសម្រាប់តំណែងអគ្គលេខាធិការតាមរយៈការផ្ញើលិខិតរួមទៅរដ្ឋសមាជិកទាំងអស់។
នីតិវិធីខាងលើនេះ អនុលោមតាមសេចក្តីសម្រេចរបស់អង្គមហាសន្និបាតឆ្នាំ២០១៥ ដែលតម្រូវឲ្យដំណើរការជ្រើសរើសប្រមុខស្ថាប័នពិភពលោកមានលក្ខណៈបើកចំហ និងតម្លាភាពជាងមុន។ សេចក្តីសម្រេចនេះ អនុញ្ញាតឲ្យរដ្ឋជាសមាជិកដឹងពីព័ត៌មានរបស់បេក្ខជនដូចជាជីវប្រវត្តិ ហើយអាចជួប និងសួរនាំក្នុងកិច្ចប្រជុំជាដើម។
ការជាប់ឆ្នោតរបស់លោក ហ្គូតេរ៉េស ក្នុងឆ្នាំ២០១៦ ជាការខកចិត្តសម្រាប់ស្ត្រី ដ្បិតអីស្ថាប័ននេះពុំដែលមានអគ្គលេខាធិការជាស្ត្រីម្តងឡើយ។ ដូចគ្នានេះដែរប្រទេសអឺរ៉ុបខាងកើតក៏មិនសប្បាយចិត្តប៉ុន្មានដែរដោយសារតែដល់វេនដែលបេក្ខជនមកពីតំបន់ខ្លួនត្រូវទទួលតំណែង មិនមែនមកលោក ហ្គូតេរ៉េស សញ្ជាតិព័រទុយហ្កាល់ដែលមកពីអឺរ៉ុបខាងលិចឡើយ៕