ជាតិ
សង្គមជាតិ
តំបន់មួយ ក្នុងភូមិព្រែកតាច្រែង ត្រូវដាក់ជាតំបន់ផ្ទុះជំងឺផ្តាសាយបក្សី ក្រោយមាន់ទាជិត២ពាន់ងាប់
12, Jan 2021 , 5:00 pm
ទាក្នុងកសិដ្ឋាន ដែលផ្ទុះជំងឺផ្តាសាយបក្សី H5N1 នៅភូមិព្រែកតាច្រែង (រូប ថតចេញបន្តពីវីដេអូលើទំព័រហ្វេសប៊ុក Battambang92.70FM)
×![]()
ដោយ: សារព័ត៌មានថ្មីៗ
លោក វេង សាខុន រដ្ឋមន្ត្រីក្រសួងកសិកម្ម បានចេញប្រកាស នៅថ្ងៃទី១២ ខែមករា ឆ្នាំ២០២១នេះ កំណត់ដាក់តំបន់មួយ ស្ថិតក្នុងភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង ជាតំបន់ជំងឺផ្តាសាយបក្សី។ ការកំណត់តំបន់ជំងឺផ្តាសាយបក្សីនេះ គឺបន្ទាប់ពីមានករណីមាន់និងទាជិត២ពាន់ក្បាល ក្នុងកសិដ្ឋានមួយរបស់ប្រជាពលរដ្ឋ បានងាប់ ដោយសារជំងឺផ្តាសាយបក្សី H5N1។ 
លោក ស្រី វុឌ្ឍី អគ្គលេខាធិការក្រសួងកសិកម្ម ប្រាប់សារព័ត៌មានថ្មីៗ តាមទូរស័ព្ទថា តាមរបាយការណ៍ ដែលលោក ទទួលបាន គឺមានមាន់និងទាសរុប១,៨ពាន់ក្បាល បានងាប់ក្នុងកសិដ្ឋានរបស់ប្រជាពលរដ្ឋ នៅភូមិព្រែកតាច្រែង។ លោក បន្តថា នៅថ្ងៃទី១១ ខែមករាម្សិលមិញ មន្ត្រីជំនាញ បានចុះទៅដល់កសិដ្ឋាននោះ ហើយបានពិនិត្យនិងធ្វើវិភាគលើមាន់និងទាដែលងាប់ ដោយលទ្ធផល ដែលបង្ហាញ គឺមាន់និងទារទាំង១,៨ពាន់ក្បាលនោះ ងាប់ដោយសារជំងឺផ្តាសាយបក្សី H5N1។
យ៉ាងណា លោក អះអាងថា ក្រោយទទួលបានព័ត៌មានអំពីការផ្ទុះជំងឺផ្តាសាយបក្សី H5N1 មន្ត្រីជំនាញ បានចុះទៅដល់តំបន់នោះភ្លាមៗ និងបានទប់ស្កាត់មិនឲ្យជំងឺផ្តាសាយបក្សីប្រភេទនេះ រាលដាលទៅតំបន់ផ្សេងទៀត។ លោក បញ្ជាក់ថា៖«[មន្ត្រីជំនាញ] គេ ធ្វើតាំងពីថ្ងៃផ្ទុះ [ជំងឺហ្នឹង] គេ ចុះទៅធ្វើការអស់ហើយ លែងមានអីហើយ។ ... កុំបារម្ភអី អត់អីទេ គេ បានធ្វើកិច្ចការហ្នឹងស្អាតបាតអស់ហើយ»។
តំបន់ ដែលត្រូវកំណត់ជាតំបន់ផ្ទុះជំងឺផ្តាសាយបក្សី H5N1 គឺស្ថិតនៅបរិវេណជុំវិញកសិកដ្ឋាន ដែលមានមាន់និងទា១,៨ពាន់ក្បាលងាប់នោះឯង។ តាមរយៈប្រកាស លោក វេង សាខុន បានប្រាប់ទៅអគ្គនាយកដ្ឋានសុខភាពសត្វនៃក្រសួងកសិកម្ម ឲ្យសិក្សាស្រាវជ្រាវពីប្រភពនៃការផ្ទុះជំងឺផ្តាសាយបក្សី ក្នុងរយៈពេល៣០ថ្ងៃ ហើយត្រូវពិនិត្យឃ្លាំមើលចលនាបក្សីជាប្រចាំ ក្នុងរង្វង់១០គីឡូម៉េត្រ ដោយគិតចាប់ពីចំណុចផ្ចិតនៃតំបន់ផ្ទុះជំងឺនេះ។
ជាមួយគ្នានេះ លោក វេង សាខុន ប្រាប់អគ្គនាយកដ្ឋានសុខភាពសត្វ ឲ្យចាត់វិធានការព្យាបាលសត្វបក្សី នៅតំបន់ផ្ទុះជំងឺផ្តាសាយបក្សី H5N1។ ចំពោះការទិញ ការលក់ ការចិញ្ចឹម និង ការដឹកជញ្ជូនបក្សីគ្រប់ប្រភេទចូលចេញ ឬឆ្លងកាត់តំបន់ផ្ទុះជំងឺផ្តាសាយបក្សីនេះ ត្រូវលោក ប្រាប់ឲ្យផ្អាកជាបណ្តោះសន្ន។ លោក ព្រមានថា បើមានជនណាល្មើស គឺត្រូវផ្តន្ទាទោសតាមច្បាប់ស្តីពីសុខភាពសត្វនិងផលិតកម្មសត្វ។
លើសពីនេះ រដ្ឋមន្ត្រីកសិកម្ម ណែនាំទៅអគ្គនាយកដ្ឋានសុខភាពសត្វ ឲ្យបំផ្លាញចោលចំពោះបក្សីគ្រប់ប្រភេទ ក្នុងតំបន់ផ្ទុះជំងឺបក្សី ទៅតាមវិធានការបច្ចេកទេសបសុពេទ្យ។ លោក ស្រី វុឌ្ឍី មានប្រសាសន៍បន្ថែមពីលើប្រកាសរបស់លោករដ្ឋមន្ត្រី ត្រង់ចំណុចនេះថា៖«បើកាលណា ឃើញសត្វ មានជំងឺហ្នឹង យើង កម្ទេចចោលតែម្តង»។
អគ្គលេខាធិការក្រសួងកសិកម្មរូបនេះ ពន្យល់ថា ជំងឺផ្តាសាយបក្សី H5N1 គឺជាប្រភេទជំងឺឆ្លងមួយ ហើយ វា នឹងឆ្លងរាលដាល បើគ្រប់គ្រងបក្សី មិនបានល្អ។ លោក អះអាងថា ជំងឺនេះ អាចឆ្លងទៅប្រភេទបក្សីផ្សេងទៀត មិនមែនតែមាន់និងទានោះទេ៕
Tag:
ផ្តាសាយបក្សី H5N1
© រក្សាសិទ្ធិដោយ thmeythmey.com
