COVID-19
សុខភាព
អន្តរជាតិ
WHO៖ ភាពស៊ាំសហគមន៍ ទំនងមិនអាចសម្រចបានក្នុងឆ្នាំ២០២១ឡើយ
12, Jan 2021 , 10:29 pm
ទីស្នាក់ការអង្គការសុខភាពពិភពលោកនៅទីក្រុងហ្សឺណែវ ប្រទេសស្វ៊ីស។ រូបថត Xinhua
×![]()
ដោយ: ធៀន ភារិន្ទ
បណ្ដាប្រទេសអ្នកមានជាច្រើន កំពុងអនុវត្តកម្មវិធីចាក់វ៉ាក់សាំងលើប្រជាជនរបស់ខ្លួនក្នុងគោលដៅទប់ស្កាត់ការរាលដាលជំងឺ COVID-១៩។ យ៉ាងណាមិញ អង្គការសុខភាពពិភពលោក (WHO) ព្រមានថា ការបង្កើតប្រព័ន្ធភាពស៊ាំប្រឆាំងកូវីដ-១៩ ក្នុងសហគមន៍ ទំនងមិនអាចសម្រេចបានឡើយនៅក្នុងឆ្នាំ ២០២១ នេះ ដោយសារតែ វ៉ាក់សាំងមានកំណត់ ការសង្ស័យលើវ៉ាក់សាំងក្នុងការប្រយុទ្ធជាមួយកូរ៉ូណាវីរុសទម្រង់ថ្មី និងការទទួលបានវ៉ាក់សាំងមិនស្មើភាព។ 
វ៉ាក់សាំងរបស់ក្រុមហ៊ុនជាច្រើនប្រភេទ ត្រូវបានអង់គ្លេស អាមេរិក សិង្ហបុរី និងបណ្តាប្រទេសផ្សេងទៀត អនុម័តឲ្យប្រើប្រាស់ជាបន្តបន្ទាប់ ដើម្បីចាក់ឲ្យប្រជាជនរបស់ខ្លួន ដែលជាផ្នែកមួយនៃការទប់ស្កាត់ការរាតត្បាតកូវីដ-១៩។ ប៉ុន្តែ អង្គការសុខភាពពិភពលោក បង្ហាញក្ដីបារម្ភចំពោះការបង្កើតភាពស៊ាំសហគមន៍ (Herd Immunity) ទោះជាមានប្រទេសជាច្រើនចាក់វ៉ាក់សាំងក្ដី។
នៅក្នុងសន្និសីទសារព័ត៌មានមួយពីទីក្រុងហ្សឺណែវ ប្រទេសស្វ៊ីស លោកស្រី Soumya Swaminathan ប្រធានអ្នកវិទ្យាសាស្ត្ររបស់ WHO អះអាងថា ការបណ្តុះប្រព័ន្ធភាពស៊ាំសម្រាប់ប្រជាជនជាច្រើនលាននាក់ ទំនងមិនអាចកើតឡើងឡើយក្នុងឆ្នាំ២០២១។ លោកស្រី Swaminathan លើកយកកត្តាមួយចំនួនមកពន្យល់ដូចជាចំនួនវ៉ាក់សាំងនៅមានកម្រិត ការសង្ស័យលើប្រសិទ្ធភាពរបស់វ៉ាក់សាំងប្រឆាំងនឹងកូរ៉ូណាវីរុសបំប្លែងខ្លួនថ្មីដែលរកឃើញនៅអង់គ្លេស និងអាហ្វ្រិកខាងត្បូង និងការទទួលបានវ៉ាក់សាំងមិនស្មើគ្នាជាដើម។
ក្នុងសន្នីសីទសារព័ត៌មានដដែលនេះ ប្រធានអ្នកវិទ្យាសាស្ត្ររូបនេះ បានបន្តទៀតថា បើប្រព័ន្ធភាពស៊ាំសហគមន៍អាចសម្រេចបានមែន ក៏កើតមានក្នុងប្រទេសតិចតួចប៉ុណ្ណោះ ខណៈពេលប្រជាជននៅតំបន់ផ្សេងទៀតលើពិភពលោក ត្រូវបន្តរងគ្រោះដោយសារកូវីដ-១៩។ WHO មិនទាន់អាចកំណត់ពេលដែលអាចបង្កើតប្រព័ន្ធភាពស៊ាំប្រឆាំងកូវីដ-១៩ សម្រាប់មនុស្សជាច្រើននៅលើពិភពលោកបាន។
ទាក់ទិនរឿងនេះ WHO បានអំពាវនាវឲ្យប្រជាជន ត្រូវអត់ធ្មត់ ព្រោះការចាក់វ៉ាក់សាំងប្រឆាំងកូវីដ-១៩ ត្រូវការពេលវេលា ខណៈវ៉ាក់សាំងជាច្រើន ពាន់លានដូស កំពុងស្ថិតក្នុងដំណើរការផលិតហើយដែរ។ តាមការចុះផ្សាយរបស់សារព័ត៌មានអាល្លឺម៉ង់ DW លោកស្រី Swaminathan បានអំពាវនាវឲ្យបន្តអនុវត្តវិធានការផ្សេងៗដូចជា ការរក្សាគម្លាតសុវត្ថិភាព ការលាងដៃ និងការពាក់ម៉ាស់ ដែលនៅតែជាផ្នែកមួយដ៏សំខាន់ក្នុងការទប់ស្កាត់កូវីដ-១៩។
សូមបញ្ជាក់ថា គិតត្រឹមថ្ងៃទី១១ ខែមករា អាមេរិក បានអះអាងថា វ៉ាក់សាងជិត ៩លានដូស ត្រូវបានចាក់ឲ្យប្រជាជនខ្លួន។ ចំណែកអាល្លឺម៉ង់វិញ បានប្រកាសថា មនុស្សច្រើនជាង ៦០ម៉ឺននាក់ ត្រូវបានចាក់វ៉ាក់សាំង។ ដោយឡែកប្រទេសផ្សេងទៀត ដូចជា សិង្ហបុរី អង់គ្លេស និងប្រទេសផ្សេងទៀត បានចាប់ផ្តើមយុទ្ធនាការចាក់វ៉ាក់សាំងឲ្យប្រជាជនរបស់ខ្លួនថែមទៀត៕
Tag:
WHO
កូវីដ-១៩
© រក្សាសិទ្ធិដោយ thmeythmey.com
