អន្តរជាតិ
លោក ត្រាំ ក្លាយជាប្រធានាធិបតីអាមេរិកទីមួយដែលសភាបោះឆ្នោតចោទប្រកាន់ពីរដង
14, Jan 2021 , 9:51 am
×![]()
ដោយ: តន ចាន់រិទ្ធារ៉ា
សភាតំណាងអាមេរិក នៅថ្ងៃទី១៣ ខែមករា បានបោះឆ្នោតចោទប្រកាន់ប្រធានាធិបតី ដូណាល់ ត្រាំ ពាក់ព័ន្ធការញុះញង់ឲ្យមានការបះបោរអំឡុងពេលការចូលអុកឡុកវិមានសភាដោយអ្នកគាំទ្ររបស់លោកកាលពីសប្ដាហ៍មុន។ លោក ត្រាំ ក្លាយជាប្រធានាធិបតីអាមេរិកទីមួយហើយដែលត្រូវបានសភាចោទប្រកាន់ដល់ទៅពីរដងបែបនេះ។ វាសនារបស់របស់លោក ត្រាំ ក៏កំពុងស្ថិតក្នុងភាពមិនច្បាស់លាស់ ខណៈអាណត្តិលោកសល់៦ថ្ងៃទៀត។
ដោយសំឡេង២៣២ទល់នឹង១៩៧ សភាតំណាងអាមេរិកដែលគ្រប់គ្រងដោយបក្សប្រជាធិបតេយ្យ បានបោះឆ្នោតអនុម័តមាត្រាចោទប្រកាន់លើប្រធានាធិបតី ដូណាល់ ត្រាំ ពីបទញុះញង់ឲ្យមានការបះបោរ។ ដំណើរការចោទប្រកាន់លើកទីពីរនេះ ធ្វើឡើងយ៉ាងរហ័សបំផុតខុសពីដំណើរការលើកមុនដែល ត្រាំ រួចខ្លួននៅដំណាក់កាលព្រឹទ្ធសភា។
លើកនេះ លោក ត្រាំ ជាអ្នកយកភ្លើងដាក់ខ្លួន បន្ទាប់ពីលោកអំពាវនាវឲ្យអ្នកគាំទ្រសម្រុកទៅវិមានកាពីតូលនៅថ្ងៃទី៦ ខែមករា ទីដែលសមាជិកសភាទាំងពីរកំពុងប្រជុំដើម្បីទទួលស្គាល់ជ័យជម្នះលោក ចូ បៃឌិន ។ ក្រុមកុបករគាំទ្រលោក ត្រាំ បានចូលអុកឡុកអគារវិមានសភា ដែលបង្ខំឲ្យសមាជិកសភាត្រូវជម្លៀសខ្លួនភ្លាមៗ។ មនុស្ស៥នាក់ បានស្លាប់ក្នុងហេតុការណ៍នេះ ហើយបក្សប្រជាធិបតេយ្យក៏ចាប់ផ្ដើមគិតគូររឿងដកតំណែងលោក ត្រាំ តែម្ដង។
មុនការបោះឆ្នោត ប្រធានសភាតំណាង ណាន់ស៊ី ផេឡូស៊ី បានបន្តរិះគន់លោក ត្រាំ ដោយចោទថា លោកញុះញង់ឲ្យមានបះបោរ និងសកម្មភាពឧទ្ទាមប្រដាប់អាវុធប្រឆាំងប្រទេស។ ប៉ុន្តែប្រធានមតិភាគតិច Kevin McCarthy និយាយថា ខណៈលោក ត្រាំ សក្តិសមនឹងទទួលការត្រួតពិនិត្យនោះ ការចោទប្រកាន់ដ៏រហ័សនឹងធ្វើឲ្យប្រទេសកាន់តែបែកបាក់។ ក្នុងការបោះឆ្នោតនេះ សមាជិកបក្សសាធារណរដ្ឋ១០នាក់ បោះឆ្នោតគាំទ្រ។
នីតិវិធីបន្ទាប់ គឺសភាតំណាងបញ្ជូនមាត្រាចោទប្រកាន់នេះទៅព្រឹទ្ធសភា ដែលនឹងដើរតួជាអង្គជំនុំជម្រះ។ ខណៈជិតមួយឆ្នាំមុនព្រឹទ្ធសភាដែលគ្រប់គ្រងដោយបក្សសាធារណរដ្ឋមិនដកតំណែងនោះ លើកនេះក៏ទំនងដូចគ្នាដែរ។ ម្យ៉ាងអាណត្តិរបស់លោក ត្រាំ នៅសល់តែ៦ថ្ងៃប៉ុណ្ណោះ ហើយម្យ៉ាងនីតិវិធីក៏ត្រូវចំណាយពេលដេរ។ ប្រធានសំឡេងភាគច្រើនព្រឹទ្ធសភា Mitch McConnell និយាយថា ព្រឹទ្ធសភាគ្មានពេលគ្រប់គ្រាន់ដើម្បីកាត់ក្ដីលោក ត្រាំ ឡើយ ព្រោះមិនស្ថិតក្នុងសម័យប្រជុំឡើយ។
ដោយសារពេលវេលាក្ដីបែបនេះ សំណួរក៏លេចឡើងថា តើលោក ត្រាំ អាចត្រូវកាត់ក្ដីក្រោយអស់អំណាចឬទេ? លោក McConnell អះអាងថា លោកមិនទាន់សម្រេចចិត្តនៅឡើយទេ ហើយរង់ចាំស្ដាប់យោបល់របស់អ្នកច្បាប់សិន។
ក្នុងប្រវត្តិសាស្ត្រអាមេរិក មិនដែលមានឡើយការជម្រះក្ដីប្រធានាធិបតីដែលផុតអាណត្តិ។ ប្រធានាធិបតីបីនាក់កន្លងដែលត្រូវចោទប្រកាន់ ក៏មិនដែលជួបរឿងបែបនេះដែរ។ ចំណែកអ្នកច្បាប់អាមេរិកខ្លះក៏ជឿថា ព្រឹទ្ធសភាមិនអាចកាត់ក្ដីប្រធានាធិបតីចប់អាណត្តិឡើយ។ ប៉ុន្តែកន្លងមក ព្រឹទ្ធសភាអាមេរិកធ្លាប់កាត់ក្ដីអតីតសមាជិកព្រឹទ្ធសភា និងចៅក្រមដែលមានកំហុសដែរ។
ក្នុងករណីមានសវនាការក្រោយថ្ងៃទី២០ ខែមករា បក្សសាធារណរដ្ឋលែងកាន់កាប់ព្រឹទ្ធសភាទៀតហើយ។ ការងារធ្ងន់នឹងធ្លាក់លើបក្សប្រជាធិបតេយ្យដែលចូលគ្រប់គ្រងព្រឹទ្ធសភា ហើយដើម្បីដាក់ទោសលោក ត្រាំ បក្សនេះត្រូវអូសទាញសមាជិកមកពីសាធារណរដ្ឋយ៉ាងហោចណាស់១៧នាក់ទៀត។ មេដឹកនាំបក្សប្រជាធិបតេយ្យនៅព្រឹទ្ធសភា Chuck Schumer និយាយថា លោក ត្រាំ នឹងមិនត្រឹមតែត្រូវកាត់ទោសកំហុសញុះញង់ឡើយ តែត្រូវកាត់ទោសដើម្បីហាមមិនឲ្យឈរឈ្មោះតំណែងនយោបាយលើកក្រោយៗទៀតផង៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com
