អន្តរជាតិ
WHO៖ ឆ្នាំទី២ នៃការរីករាលដាលកូវីដ-១៩ អាចនឹងយ៉ាប់ជាងមុន 15, Jan 2021 , 8:29 am
រូបភាព Xinhua
×
ដោយ៖ ឈួន ឈីវអ៊ីង
ឆ្នាំ២០២១ ជាឆ្នាំទី២ នៃការរីករាលដាលជំងឺកូវីដ-១៩ ។ មន្ត្រីជាន់ខ្ពស់អង្គការសុខភាពពិភពលោក ព្រមាននៅថ្ងៃទី១៣ ខែមករា ថា ឆ្នាំទី២ នឹងមានសភាពធ្ងន់ធ្ងរជាងកាលពីឆ្នាំទី១ខណៈវីរុសកូរ៉ូណាបំប្លែងខ្លួនថ្មីកំពុងបន្តសាយភាយ ពិសេសប្រទេសនៅលោកខាងជើងដូចជាអង់គ្លេស បារាំង ស្វ៊ីស និងអ៊ីតាលីជាដើម។
នៅចុងឆ្នាំ២០២០ និងដើមឆ្នាំ ២០២១ នេះ វីរុសកូរ៉ូណាបំប្លែងខ្លួនថ្មី បានលេចរូបរាងជាបន្តទៀត ហើយកាន់តែឆ្លងពីមនុស្សម្នាក់ទៅម្នាក់ទៀតកាន់តែលឿនជាងមុនផង។ សមត្ថភាពប្រែប្រួលឆាប់រហ័សនេះ ក្លាយជាបញ្ហាថ្មីគួរឲ្យព្រួយបារម្ភ និងជាផលលំបាកកាន់តែខ្លាំងដល់ពិភពលោក។ លោក Mike Ryan ប្រធានផ្នែកអាសន្នរបស់អង្គការសុខភាពពិភពលោក (WHO) ព្រមានថា ស្ថានភាពពិភពលោកនៅឆ្នាំទី២ នឹងកាន់តែលំបាកសម្រាប់ពិភពលោក។
«ពួកយើងកំពុងឈានទៅឆ្នាំទី២ នៃការីករាលដាលកូវីដ-១៩ វាអាចអាចនឹងមានសភាពអាក្រក់ជាងឆ្នាំមុន ដោយសារការឆ្លងមានសភាពប្រែប្រួល និងបញ្ហាផ្សេងទៀតដែលយើងកំពុងឃើញ។» នេះជាការលើកឡើងរបស់លោក Ryan ក្នុងកម្មវិធីមួយនៅលើបណ្ដាញសង្គមនៅថ្ងៃទី១៣ ខែមករា។
ប្រទេសនៅទ្វីបអឺរ៉ុប និងអាមេរិកខាងជើង កំពុងប្រឈមមុខរលកឆ្លងកាន់ធ្ងន់ធ្ងរ ស្របពេលវីរុសបំប្លែងខ្លួនថ្មី ក៏លេចមុខបន្តបន្ទាប់។ ករណីឆ្លងកូវីដ-១៩ ប្រភេទថ្មីត្រូវបានរកឃើញដំបូងនៅអង់គ្លេស ប៉ុន្តែ បានឆ្លងទៅកាន់ប្រទេសជាច្រើន។ រដ្ឋាភិបាលប្រទេសតំបន់នៅអឺរ៉ុប ប្រកាសរឹតបន្តឹងការវិធានការទប់ស្កាត់កូវីដ-១៩ កាន់តែខ្លាំង។ នៅស្វ៊ីស ប្រជាជនត្រូវបានទទូច ឲ្យមានការប្រុងប្រយ័ត្នទាំងនៅតាមផ្ទះ និងនៅកន្លែងធ្វើការ និងបិទរាល់ហាងលក់ដូរផ្សេងមិនចាំបាច់ ខណៈនៅអ៊ីតាលី ក៏បានពន្យារយៈពេលដាក់ប្រទេសក្នុងគ្រាអាសន្ន។
បច្ចុប្បន្ននេះ ករណីស្លាប់ដោយកូវីដ-១៩ កំពុងឆ្ពោះទៅកាន់ចំនួនពីរនាក់នៅទូទាំងពិភពលោក ស្របពេលករណីឆ្លងមានប្រមាណ ៩១,៥លានករណីហើយដែរ។ ក្នុងរបាយការណ៍ចុងក្រោយបង្អស់របស់ WHO ករណីឆ្លងបានហក់កាន់តែខ្លាំងនៅអំឡុងពេលសម្រាកចុងឆ្នាំ ដែលទំនងបណ្ដាលមកពីការធ្វេសប្រហែសរបស់ប្រជាជននានាក្នុងថ្ងៃសម្រាកដ៏ធំនេះ។ កាលពីសប្ដាហ៍មុន ករណីវិជ្ជមានថ្មីបន្ថែមប្រហែល៥លានករណី ត្រូវបានរាយការណ៍ទូទាំងពិភពលោក៕
© រក្សាសិទ្ធិដោយ thmeythmey.com