លោក ថងលួន ស៊ីសូលីត ត្រូវបានគណៈមជ្ឈិមបក្សកុម្មុយនីស្តឡាវ ជ្រើសរើសជាអគ្គលេខាធិការសម្រាប់អាណត្តិ៥ឆ្នាំ(២០២១-២០១៥) ជំនួសលោក ប៊ុនញ៉ាង វរាជិត អំឡុងពេលសមាជបក្សបីថ្ងៃលើកទី១១ ដែលបញ្ចប់នៅថ្ងៃទី១៥ ខែមករា។ ភ្លាមៗនេះ មេដឹកនាំចិនក៏អបអរលោក ថងលួន ភ្លែតដែរ អមជាមួយសារត្រៀមធ្វើការជាមួយគ្នា។

 

បើតាមទីភ្នាក់ងារព័ត៌មានរដ្ឋចិន Xinhua លោក ស៊ី ដែលជាអគ្គលេខាធិការគណៈមជ្ឈិមបក្សកុម្មុយនីស្តចិន បញ្ជាក់ថា លោក រីករាយចំពោះការជាប់ឆ្នោតរបស់លោក ថងលួន ។ មេដឹកនាំចិនរូបនេះ ក៏និយាយដល់ស្នាដៃរបស់បក្សកាន់អំណាចឡាវដែលដឹកនាំប្រទេសសម្រេចបានលទ្ធផលគាប់ចិត្តនៅរយៈពេល៥ឆ្នាំមុន។

 

« ចាប់តាំងពីសមាជបក្សលើកទី១០ នៃបក្សបដិវត្តន៍ប្រជាជនឡាវមក ក្រោមការដឹកនាំរបស់លោក បុនញ៉ាង វរាជិត ឡាវសម្រេចបានសមិទ្ធផលជាច្រើនក្នុងបុព្វហេតុកសាងសង្គមនិយម និងរីករាយការទទួលបានស្ថិរភាពសង្គម និងនយោបាយ ការអភិវឌ្ឍសេដ្ឋកិច្ចដោយចីរភាព និងការបន្តប្រសើរឡើងនៃជីវភាពរស់នៅរបស់ប្រជាជនស្ថិត»។ លោក ស៊ី ដែលជាប្រធានាធិបតីចិនផងនោះ សរសេរបែបនេះក្នុងសាររបស់លោក។

 

ក្រៅពីកោតសរសើរដល់ការដឹកនាំរបស់បក្សកុម្មុយនីស្តឡាវ លោក ស៊ី ក៏បង្ហាញក្តីជឿជាក់ ក្រោមការដឹកនាំរបស់គណកម្មាការមជ្ឈិមបក្សបដិវត្តន៍ប្រជាជនឡាវដែលមានលោក ថងលួន ជាមេដឹកនាំ បក្សកាន់អំណាចឡាវ នឹងដឹកនាំប្រជាជនទៅជាធ្លុងតែមួយ ហើយសម្រេចបានមាគ៌ាសង្គមនិយម។ 

 

ជាមួយគ្នានេះ ប្រមុខដឹកនាំចិនរូបនេះ ក៏ប្រកាសត្រៀមខ្លួនធ្វើការជាមួយលោក ថងលួន ដើម្បីពង្រឹងទំនាក់ទំនងរវាងបក្ស និងបក្ស និងរវាងប្រជាជន និងប្រជាជនដែរ។ លោកស្នើឲ្យប្រទេសទាំងពីររួមគ្នាពង្រឹងបុព្វហេតុសង្គម ជំរុញទំនាក់ទំនង ក៏ដូចជារួមចំណែកជាវិជ្ជមានក្នុងការរក្សាស្ថិរភាព ការអភិវឌ្ឍ និងវិបុលភាពតំបន់៕