កីឡាអន្តរជាតិ
អន្តរជាតិ
Messi បានកាតក្រហមដំបូងនៅ Barca ខណៈក្រុមរបូតពាន Super Cup ទៅ Bilbao 18, Jan 2021 , 2:10 pm
×
ដោយ៖ ជា យូគៀង
Barcelona បានបាត់បង់ពានរង្វាន់ Super Cup ក្រោយចាញ់ Athletic Bilbao ដោយលទ្ធផល ២-៣ ក្នុងជំនួបវគ្គផ្តាច់ព្រ័ត្រ។ Lionel Messi មិនអាចជួយក្រុមបាន ហើយថែមទាំងទទួលបានកាតក្រហមជាលើកដំបូងក្នុងអាជីពសម្រាប់ក្រុមយក្សអេស្ប៉ាញទៀតផង។
នាជំនួបវគ្គផ្តាច់ព្រ័ត្រ នៅរាត្រីថ្ងៃទី១៨ ខែមករា ខ្សែបម្រើប្រយុទ្ធសញ្ជាតិបារាំង Antoine Griezmann រកបានទាំង២គ្រាប់ឲ្យ Barcelona នៅនាទី៤០ និង៧៧ ខណៈ Athletic Bilbao រកបាន ៣គ្រាប់ដោយកីឡាករ Oscar de Marcos នៅនាទី ៤២ កីឡាករ Asier Villalibre នៅនាទី ៩០ និង Inaki Williams នៅនាទី៩៤ នៃម៉ោងបន្ថែម។
ការប្រកួតរវាងក្រុមទាំង២មានភាពតានតឹងរហូតអូសបន្លាយដល់ពេញ ៩០នាទីត្រឹមលទ្ធផល ២-២។ ដោយត្រូវស្វែងរកម្ចាស់ពានតម្រូវឲក្រុមទាំង២ ប្រកួតថែមម៉ោង ១៥នាទី ពីរដង ហើយ Bilbao ជាអ្នកទទួលបានជ័យជម្នះនេះ។
តាមរយៈលទ្ធផលជ័យជម្នះ ៣-២ បាននាំឲ្យ Bilbao ក្លាយជាម្ចាស់ពាន Super Cup សម្រាប់រដូវកាល ២០២០-២១នេះ និងជាលើកទី៣ដែលពួកគេទទួលបាន។
ស្របពេលគ្នានេះដែរ Messi ខ្សែបម្រើឆ្នើមសញ្ជាតិអាហ្សង់ទីន ក៏ទទួលកាតក្រហមបណ្តេញចេញពីការប្រកួតនៅចុងម៉ោងនាទី១២០ផងដែរ ក្រោយប្រើហិង្សាលើកីឡាករ Asier Vallalibre។ នេះជាការទទួលបានកាតក្រហមលើកដំបូងរបស់ម្ចាស់ពាន Ballon d’or ៦សម័យ សម្រាប់ក្រុមយក្សអេស្ប៉ាញ និងជាលើកទី៣ក្នុងអាជីព។
Messi ទទួលបានកាតក្រហមលើកទី១ នៅពេលលេងឲ្យអាហ្សង់ទីន នាជំនួបប្រកួតមិត្តភាពអន្តរជាតិជាមួយហុងគ្រី នៅឆ្នាំ ២០០៥ និងទី២ ក្នុងពានរង្វាន់ Copa America នៅពេលប៉ះស៊ីលី នៅឆ្នាំ ២០១៩៕
Tag:
Super Cup
Lionel Messi
© រក្សាសិទ្ធិដោយ thmeythmey.com