ដោយ ឈួន ឈីវអ៊ីង
ប៉ូលិសម៉ាឡេស៊ី បានរឹបអូសគ្រឿងញៀនដែលមានតម្លៃជិត៥០លានដុល្លារក្នុងប្រតិបត្តិការនៅរដ្ឋ Johor កាលពីសប្ដាហ៍មុន។ នេះជាការការបង្ក្រាបគ្រឿងញៀនធំជាងគេក្នុងប្រវត្តិសាស្ត្រម៉ាឡេស៊ី។
ក្នុងប្រតិបត្តិការនៅរដ្ឋ Johor ប៉ូលិសម៉ាឡេស៊ី បានបង្ក្រាបកន្លែងផលិត និងចែកចាយគ្រឿងញៀន៣កន្លែង ហើយរឹបអូសគ្រឿងញៀនដែលមានតម្លៃដល់ទៅ៤៩,៨លានដុល្លារ។ នេះបើតាមការបញ្ជាក់របស់លោក Ayob Khan Mydin Pitchay ស្នងការប៉ូលិសរដ្ឋ Johor នៅថ្ងៃអាទិត្យទី១៧ មករា។ នេះជាស្នាដៃការបង្ក្រាប ទ្រង់ទ្រាយធំបង្អស់ក្នុងប្រវត្តិសាស្ត្ររបស់នាយកដ្ឋានប្រឆាំងគ្រឿងញៀនរបស់ម៉ាឡេស៊ី។
ភ្នាក់ងារពត៌មានរដ្ឋ Bernama បានរាយការណ៍ថា ប៉ូលិសបានលបវាយឆ្មក់ចំនួន ៣កន្លែងផ្សេងគ្នាគឺ នៅឯរោងចក្រផលិតគ្រឿងញៀន នៅ Taman Mount Austin និងផ្ទះជួលស្តុកគ្រឿងញៀន២កន្លែងផ្សេងទៀតកាលពីថ្ងៃព្រហស្បតិ៍និងថ្ងៃសុក្រសប្ដាហ៍មុន។ ការវាយឆ្មក់នេះធ្វើឡើង បន្ទាប់ពីបានសាកសួរជនសង្ស័យចំនួន១៤នាក់នៃក្រុមរត់ពន្ធនិងចែកចាយគ្រឿងញៀនមួយ ដែលត្រូវបានចាប់ខ្លួនតាំងពីដើមសប្ដាហ៍មុននៅទីក្រុង Johor Barhu។
នៅក្នុងប្រតិបត្តិការដំបូងនា នាយកដ្ឋានស៊ើបអង្កេតបទល្មើសគ្រឿងញៀន បានរកឃើញកន្លែងផលិតគ្រឿងញៀន២កន្លែង និងកន្លែងចែកចាយ២ផ្សេងទៀតដែលមានគ្រឿងញៀនមានតម្លៃច្រើនលានដុល្លារដែរ។ ជាសរុប គ្រឿងញៀនដែលរឹបអូសបានប្រភេទម្សៅ Ecstasy ទម្ងន់ ៣,២តោន, ប្រភេទ Ecstasy រាវ ២៦,១គីឡូក្រាម, និងម្សៅ Erimin-5 ទម្ងន់១១៧គីឡូក្រាម។ ប៉ូលិសម៉ាឡេស៊ីប៉ាន់ស្មានថា គ្រឿងញៀនទាំងនេះ អាចចែកចាយដល់អ្នកប្រើប្រាស់ប្រហែល១១លាននាក់។
លើសពីនេះ ក្នុងប្រតិបត្តិការចុះបង្ក្រាបនេះ ប៉ូលិស ក៏បានរឹបអូសវត្ថុតាងដូចជា រថយន្តទំនើបចំនួន ៤គ្រឿង, លុយសុទ្ធ៥លានរីងហ្គីត (លុយម៉ាឡេស៊ី), លុយបរទេសជាង ២៣ម៉ឺនរីងហ្គីត, គ្រឿងអលង្ការ ៣០ប្រភេទ, នាឡិកា Rolex បីគ្រឿង, និងគណនីធនាគារចំនួន៦២ ផ្ទុកលុយសរុបប្រមាណ ១,២៣លានរីងហ្គីតទៀត។
គួរបញ្ជាក់ថា ក្រុមជួញដូរគ្រឿងញៀននេះ បានដំណើរការតាំងពីឆ្នាំ ២០១៨ ដោយបានជួលរោងចក្រ និងផ្ទះដើម្បីផលិត និងរក្សាទុកគ្រឿងញៀន៕