អន្តរជាតិ
តុលាការថៃ កាត់ទោសស្ត្រីម្នាក់ជាប់គុក៤៣ឆ្នាំពីបទប្រមាថស្ដេច
19, Jan 2021 , 4:59 pm
ប៉ូលិសថៃឈរយាមតុលាការព្រហ្មទណ្ឌទីក្រុងបាងកក។ រូបថត AFP
×![]()
ដោយ: តន ចាន់រិទ្ធារ៉ា
តុលាការមួយរបស់ថៃ នៅថ្ងៃទី១៩ ខែមករា បានកាត់ទោសអតីតមន្ត្រីរាជការម្នាក់ឱ្យជាប់គុក៤៣ឆ្នាំពីបទប្រមាថមហាក្សត្រ។ នេះបើតាមការបញ្ជាក់របស់ក្រុមមេធាវីការពារសិទ្ធិមនុស្ស។ រយៈពេលនេះ ជាកំណត់ត្រាមួយនៃការដាក់ទោសលើបទល្មើសធ្ងន់ធ្ងរបែបនេះ។ 
ជារឿងកម្រមាន តុលាការព្រហ្មទណ្ឌទីក្រុងបាងកក បានកាត់ទោសស្ត្រីជាអតីតមន្ត្រីរាជការម្នាក់ឲ្យជាប់គុកដល់ទៅ៤៣ឆ្នាំបីខែចំពោះការល្មើសច្បាប់ស្ដីពីការដាក់ទោសអ្នកប្រមាថមហាក្សត្រ។ អង្គការមេធាវីថៃដើម្បីសិទ្ធិមនុស្ស បានបញ្ចេញឈ្មោះស្ត្រីជាប់ទោសថា Anchan វ័យជាង៦០ឆ្នាំទៅហើយ។
ក្នុងសវនាការថ្ងៃទិ១៩ ខែមករា តុលាការថៃ រកឃើញថា ស្ត្រីខាងលើមានកំហុសលើបទចោទចំនួន២៩ ក្នុងសំណុំរឿងប្រមាថមហាក្សត្រដែលកើតឡើងកាលពី៦ឆ្នាំមុន។ ស្ត្រីរូបនេះ បំពានមាត្រា១១២ នៃក្រមព្រហ្មទណ្ឌថៃ ដែលត្រូវបានស្គាល់ជាទូទៅថា ច្បាប់ការពារស្ដេច។ កន្លងទៅ មនុស្សជាច្រើននាក់ ត្រូវជាប់ទោសក្រោមបទល្មើសបែបនេះ ពិសេសវិបត្តិនយោបាយអំឡុងពេលរដ្ឋប្រហារឆ្នាំ២០១៤ កន្លងទៅ។
បើតាមទីភ្នាក់ងារព័ត៌មាន AP ស្ត្រីខាងលើ បានចែករំលែកសារសំឡេង និងវីដេអូលើ Youtube ដែលមានអត្ថន័យបំពានស្ដេច។ ពីដំបូង រូបគាត់បានបដិសេធការចោទប្រកាន់ទាំងអស់នៅក្នុងសវនាការនៅតុលាការយោធា។ ប៉ុន្តែពេលសំណុំរឿងនេះ ត្រូវផ្ទេរមកកាន់តុលាការស៊ីវិលវិញ ស្ត្រី Anchan ក៏បានទទួលស្គាល់កំហុស ដើម្បីអាចទទួលបានការលើកលែងទោស។ មុនចូលសវនាការ ស្ត្រីរូបនេះនិយាយថា គាត់បានតែចែករំលែកប៉ុណ្ណោះ មិនបានសរសេរអ្វីបន្ថែមឡើយ។
ដោយសារទទួលស្គាល់កំហុស លោកស្រីក៏ត្រូវបានតុលាការសម្រាលទោសមកត្រឹមពាក់កណ្ដាល ខណៈពីដំបូងគ្រោងកាត់ទោសលោកស្រីដល់ទៅ៨៧ឆ្នាំឯណោះ។ ពីឆ្នាំ២០១៥ ដល់ឆ្នាំ២០១៨ លោកស្រីក៏ត្រូវបានឃុំខ្លួនដែរ។
លោក Sunai Phasuk អ្នកស្រាវជ្រាវជាន់ខ្ពស់នៅអង្គការខាងលើ ចាត់ទុកការកាត់ទោសនេះ ជារឿងគួរឲ្យភ្ញាក់ផ្អើល និងជាសារថា មិនត្រឹមតែការរិះគន់ដែលមិនអាចអត់អោនឱ្យបានឡើយ តែក៏ត្រូវកាត់ទោសធ្ងន់ធ្ងរដែរ៕
Tag:
ថៃ
© រក្សាសិទ្ធិដោយ thmeythmey.com
