ចាប់ពីថ្ងៃទី២៥មករា ដល់ ២កុម្ភៈ បក្សកុម្មុយនីស្តវៀតណាម នឹងរៀបចំសមាជលើកទី១៣របស់ខ្លួន។ ក្រៅតែពីការរៀបចំគោលនយោបាយសម្រាប់រយៈពេល៥ឆ្នាំទៅមុខ អ្វីដែលអ្នកសង្កេតការណ៍អន្ទះអន្ទែងរង់ចាំមើលលទ្ធផលនោះ គឺសមាសភាពថ្នាក់ដឹកនាំកំពូលទាំង៤រូបនៅវៀតណាម។ តើអ្នកណាខ្លះ នឹងកាន់តំណែងកំពូលទាំង៤នៅវៀតណាម ក្នុងសមាជបក្សនាសប្តាហ៍ក្រោយ?
ដ្បិតជារដ្ឋកុម្មុយនីស្តដូចកូរ៉េខាងជើង និងចិនក្ដី វៀតណាមមិនមានឥស្សរជនដែលក្ដាប់អំណាចតែឯងឡើយ។ អំណាចដឹកនាំរដ្ឋនៅវៀតណាមត្រូវបានបែងចែកទៅកាន់បុគ្គលសំខាន់ៗ៤រូប គឺអគ្គលេខាធិការបក្សកុម្មុយនីស្តវៀតណាម ប្រធានាធិបតី នាយករដ្ឋមន្ត្រី និងប្រធានសភា។ សមាជ៥ឆ្នាំម្ដងនៃបក្សកុម្មុយនីស្តវៀតណាម ដែលចាប់ផ្ដើមនៅសប្ដាហ៍ក្រោយ នឹងកំណត់ក្បាលម៉ាស៊ីនសំខាន់ៗរបសប្រទេស។
ការត្រៀមខ្លួនបានបញ្ចប់អស់ហើយ។ បញ្ជីឈ្មោះបេក្ខជនសម្រាប់តំណែងក្នុងគណៈមជ្ឈិម ការិយាល័យនយោបាយ និងថ្នាក់ដឹកនាំកំពូលទាំង៤រូប ក៏ដូចជារបៀបវារៈ និងបញ្ជីឈ្មោះប្រតិភូ ត្រូវបានអនុម័តក្នុងកិច្ចប្រជុំចុងក្រោយនៃគណៈមជ្ឈិមបក្សកុម្មុយនីស្តវៀតណាមនីតិកាលទី១២ នៅថ្ងៃទី១៧ ខែមករា ឆ្នាំ២០២១។ សមាជបក្ស នឹងបោះឆ្នោតបញ្ជីទាំងនេះ។
ក្នុងរយៈពេលជាង១សប្តាហ៍ ប្រតិភូចំនួន១,៦០០រូបមកពីគ្រប់ទិសទីនៃប្រទេស នឹងបោះឆ្នោតក្នុងសមាជដើម្បីជ្រើសរើសសមាជិកចំនួន២០០រូបនៃគណៈមជ្ឈិមបក្ស។ សមាជិកទាំង២០០រូបនោះ នឹងបោះឆ្នោតជ្រើសរើសសមាជិកការិយាល័យនយោបាយ និងអគ្គលេខាធិការបក្ស។ ឯរិយាល័យនយោបាយនឹងស្នើបេក្ខភាពនាយករដ្ឋមន្ត្រី និងសមាជិកគណៈរដ្ឋមន្ត្រី ទៅសភាវៀតណាមបោះឆ្នោតផ្តល់សេចក្តីទុកចិត្តនៅពាក់កណ្តាលឆ្នាំ២០២១។
ឥស្សរជនសំខាន់ៗដែលអាចកាន់កាប់តំណែងសំខាន់ទាំង៤
លោក ង្វៀន ភូជុង កាន់តំណែងជាអគ្គលេខាធិការបក្ស តាំងពីឆ្នាំ២០១០ ហើយនៅឆ្នាំ២០១៨ លោកទទួលតំណែងជាប្រធានាធិបតី។ លោក ង្វៀន វ័យ ៧៦ ឆ្នាំ ជាអ្នកនយោបាយក្នុងបក្សដ៏មានឥទ្ធិពល ក្រោយពេលលោកកាន់តំណែងកំពូលទាំងពីរនេះ។ លោកត្រូវរំពឹងថា អាចនឹងបោះតំណែងអគ្គលេខាធិការបក្ស។ ជាទម្លាប់ អ្នកនយោបាយវៀតណាមកាន់តំណែងនេះត្រឹមតែពីរអាណត្តិប៉ុណ្ណោះ។ យ៉ាងណាក្តី លោកអាចនឹងប្រជែងតំណែងជាប្រធានាធិបតីវៀតណាមមួយអាណត្តិទៀត។
លោកនាយករដ្ឋមន្ត្រី ង្វៀន សួនហ្វ៊ុក អាយុ៦៦ឆ្នាំ ជាបេក្ខភាពមួយរូបសម្រាប់តំណែងជាអគ្គលេខាធិការបក្សបើលោក ង្វៀន ភូជុង ចាកចេញ។ ប៉ុន្តែវាមិនមែនជារឿងងាយស្រួលឡើយ។ លោក ង្វៀន សួនហ្វ៊ុក ត្រូវប្រជែងជាមួយអ្នកផ្សេងតួយ៉ាង លោក Tran Quoc Vuong ដែលជាប្រធានការិយាល័យគណៈមជ្ឈិមបក្ស និងជាមនុស្សជំនិតរបស់លោក ង្វៀន ភូជុង ផង។
ក្នុងតំណែងជានាយករដ្ឋមន្ត្រី លោក ង្វៀន សួនហ្វ៊ុក ដឹកនាំវៀតណាមឲ្យលេចមុខខ្លាំងលើឆាកអន្តរជាតិដូចជាសម្រេចបានកិច្ចព្រមព្រៀងពាណិជ្ជកម្មអន្តរជាតិ ដើរតួនាទីសំខាន់ក្នុងតំបន់អាស៊ាន ក៏ដូចជាបញ្ចៀសវិបត្តិសេដ្ឋកិច្ចដោយសារជំងឺកូវីដ-១៩។ ចំណែកលោក Tran ជាអ្នកនាំមុខក្នុងយុទ្ធនាការប្រយុទ្ធប្រឆាំងអំពើពុករលួយដែលដាក់ចេញដោយលោក ង្វៀន ភូជុង ផ្ទាល់។
ចំពោះតំណែងនាយករដ្ឋមន្ត្រីវិញ លោក ង្វៀន សួនហ្វ៊ុក អាចបន្តអង្គុយកៅអីនេះ៥ឆ្នាំទៀត បើលោកមិនសម្លឹងកៅអីប្រមុខបក្សទេនោះ។ បើលោកក្លាយជាលេខាបក្ស ឬតំណែងផ្សេង តំណែងនាយករដ្ឋមន្ត្រី ត្រូវគេរំពឹងថា អាចធ្លាក់លើលោក Vuong Dinh Hue អតីតឧបនាយករដ្ឋមន្ត្រី និងអតីតរដ្ឋមន្ត្រីហិរញ្ញ។ ក្នុងជួរបក្ស លោកក៏ជាប្រធានគណៈកម្មការសេដ្ឋកិច្ចនៃគណៈមជ្ឈិមបក្ស។ ចំណែកបេក្ខជនមួយរូបទៀតដែលគួរឲ្យកត់សម្គាល់គឺលោក Truong Hoa Binh ឧបនាយករដ្ឋមន្ត្រីប្រចាំការ ដែលទទួលបន្ទុកកិច្ចការសេដ្ឋកិច្ចមួយចំនួន។
រដ្ឋមន្ត្រីសន្តិសុខសាធារណៈ តូ ឡាំ ក៏ជាបេក្ខជនសម្រាប់តំណែងប្រធានាធិបតី។ បើលោក ឡាំ ក្លាយជាប្រធានាធិបតី នោះក៏មិនមែនជារឿងចម្លែកដែរ ព្រោះអតីតប្រធានាធិបតី ជិន ដាយគ័ង ក៏ជារដ្ឋមន្ត្រីសន្តិសុខ មុនក្លាយជាប្រធានាធិបតីនៅឆ្នាំ២០១៦ រួចស្លាប់នៅឆ្នាំ២០១៨ ។ ក្រៅពីលោក គេឃើញមានបេក្ខភាពមួយរូបផ្សេងទៀតដែលគួរឲ្យកត់សម្គាល់ គឺលោក ផាម ប៊ិញមិញ ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស។ លោក ផាម ត្រូវបានចាត់ទុកជាមនុស្សសំខាន់ក្នុងវិស័យការទូតវៀតណាម។ លោកស្ថិតក្នុងចំណោមថ្នាក់ដឹកនាំវៀតណាមកំពូលមួយក្តាប់តូចដែលចេះនិយាយភាសាអង់គ្លេសបានយ៉ាងរលូន។
តំណែងប្រធានសភា ជាតំណែងដែលមានអំណាចតិចបំផុតក្នុងចំណោមអំណាចទាំង៤។ នាពេលបច្ចុប្បន្ន លោកស្រី ង្វៀន ធី គីម ងិន កាន់តំណែងនេះ។ ប៉ុន្តែគេរំពឹងថាលោកស្រី Truong Thi Mai ប្រធានគណៈចលនាមហាជន និងជាសមាជិកគណៈមជ្ឈិមសព្វថ្ងៃអាចនឹងកាន់តំណែងនេះ។ លោកស្រី ង្វៀន ក៏ជាបេក្ខភាពមួយសម្រាប់តំណែងលេខាបក្សដែរ។ លោកង្វៀន ភូជុង ធ្លាប់កាន់តំណែងជាប្រធានសភាពីឆ្នាំ២០០៦ ដល់២០១១ មុនក្លាយជាលេខាបក្ស។
យ៉ាងណាមិញ ខណៈបញ្ជីឈ្មោះបេក្ខភាពទាំងអស់ មិនត្រូវបានផ្សាយជាសាធារណៈនោះ ការផ្លាស់ប្ដូរ និងការតតាំងផ្ទៃក្នុង ទំនងជាកើតមានមុនការមកដល់របស់សមាជ ដូចដែលអ្វីដែលកើតឡើងកាលពីសមាជឆ្នាំ២០១៦ ។ កាលនោះ ការផ្គូរផ្គង់បេក្ខភាពសម្រាប់តំណែងនានា ធ្វើឡើងនៅនាទីចុងក្រោយទៅទៀត។
សមាជទី១៣ នៃបក្សកុម្មុយនិស្តវៀតណាមធ្វើឡើងក្នុងបរិបទមួយដែលថ្នាក់ដឹកនាំចាស់ មានគំនិតអភិរក្សនិយម និង ធ្លាប់តស៊ូពីសង្គ្រាមមានចំនួនកាន់តែតិចៗ ខណៈថ្នាក់ដឹកនាំ និងសមាជិកបក្សដែលទទួលបានការរៀនសូត្រពីបរទេសមានចំនួនកាន់តែច្រើនឡើង។ ជាក់ស្តែងថ្នាក់ដឹកនាំបក្សតាមបណ្តាខេត្តចំនួន៤៣ភាគរយ មានអាយុក្រោម៥០ឆ្នាំ។ ថ្នាក់ដឹកនាំទាំងនោះ ជាសមាជិកមួយភាគធំនៃគណៈមជ្ឈិមបក្ស ដែលធំដឹងក្តីក្នុងរបបកំណែទម្រង់សេដ្ឋកិច្ច ពុំប្រកាន់មនោគមន៍វិជ្ជាតឹងតែង និងទទួលយកគោលការណ៍ ក៏ដូចជាគុណតម្លៃដែលទទួលស្គាល់ជាសាកល៕