Arteta អរគុណកីឡាករចំណូលថ្មី Partey ដែលជួយក្រុមឱ្យកើនទម្រង់លេងឡើងវិញ

កីឡាអន្តរជាតិ

អន្តរជាតិ

Arteta អរគុណកីឡាករចំណូលថ្មី Partey ដែលជួយក្រុមឱ្យកើនទម្រង់លេងឡើងវិញ

19, Jan 2021 , 5:59 pm

រូបភាព

ដោយ: ទេព ពិទូរ្យ

លោក Mikel Arteta សរសើរ និងអរគុណ Thomas Partey ដែលជួយធ្វើឲ្យ Arsenal មានទម្រង់លេងប្រសើរឡើងវិញនៅប៉ុន្មានប្រកួតចុងក្រោយ។ អ្នកចាត់ការកាំភ្លើងធំលើកឡើងបែបនេះ ក្រោយក្រុមទទួលបានជ័យជម្នះលើ Newcastle United ក្នុងការប្រកួត Premier League សប្តាហ៍ទី១៩។

ចុចទីនេះដើម្បីទទួលបានព័ត៌មានរហ័ស

Partey បានបញ្ជូនបាល់ឲ្យដៃគូសម្រេចទី (assist) ជាលើកដំបូងក្នុងលីគកំពូលអង់គ្លេសចាប់តាំងពីបង្ហាញខ្លួនឲ្យកាំភ្លើងធំនៅដើមរដូវកាល២០២០-២១នេះ ក្នុងជំនួបដែល Arsenal យកឈ្នះ Newcastle United ៣-០ នៅរាត្រីថ្ងៃទី១៨ ខែមករា។ ៣គ្រាប់របស់កាំភ្លើងធំធ្វើបានដោយ Pierre-Emerick Aubameyang ២គ្រាប់ និង Bukayo Saka ១គ្រាប់។

នេះជាការបង្ហាញខ្លួនលើកទី៨ប៉ុណ្ណោះរបស់ខ្សែបម្រើសញ្ជាតិហ្គាណា សម្រាប់ក្រុមលោក Arteta ដ្បិតរូបគេជួបបញ្ហារបួស ក្រោយផ្ទេរពី Atletico Madrid ក្នុងតម្លៃ៦១លានដុល្លារអាមេរិក កាលពីខែតុលាកន្លងទៅ។

នៅប៉ុន្មានសប្តាហ៍ចុងក្រោយ កាំភ្លើងធំហាក់បង្ហាញទម្រង់លេងល្អឡើងវិញ បន្ទាប់ពីរងបរាជ័យជាច្រើនប្រកួតក្នុងលីគរួចមក។ តាមរយៈលទ្ធផលជាផ្លែផ្កា អ្នកចាត់ការសញ្ជាតិអេស្ប៉ាញ បានបង្ហាញក្តីរីករាយចំពោះការខិតខំ និងរបៀបលេងដ៏ល្អរបស់ Partey ក្នុងការរួមចំណែកយ៉ាងសំខាន់សម្រាប់ក្រុមនៅប៉ុន្មានប្រកួតចុងក្រោយ។

Arteta បានប្រាប់អ្នកព័ត៌មានក្នុងសន្និសីទក្រោយចប់ការប្រកួតថា៖ «Partey អវត្តមានសម្រាប់ក្រុមកន្លងមកដោយសាររបួស។ ក្រោយការវិលត្រឡប់ រូបគេមានភាពស្រស់ស្រាយក្នុងការលេង រហូតធ្វើឲ្យគាត់ក្លាយជាកីឡាករពិសេសសម្រាប់យើង។ សង្ឃឹមថាគាត់អាចរក្សារបៀបលេងនេះ ព្រោះគាត់នឹងជួយយើងឲ្យប្រសើរឡើងវិញ។ ខ្ញុំពិតជាអរគុណគាត់ខ្លាំងណាស់»។

Arteta ពិតជាពេញចិត្តនឹងទម្រង់លេងរបស់ Partey និងសមាជិកក្រុមដទៃទៀត ក្រោយ Arsenal ឡើងទៅកាន់ចំណាត់ថ្នាក់ទី១០ ក្នុងតារាង Premier League ដោយរកបាន២៧ពិន្ទុ ពីការប្រកួត១៩លើក៕

Tag:

Thomas Partey

Arsenal