រដ្ឋទទួលបានថវិកាជាង៥៧លានដុល្លារ ពីសប្បុរសជន សម្រាប់ទិញវ៉ាក់សាំងកូវីដ-១៩ ខណៈចិននឹងផ្តល់ជំនួយខែក្រោយ

COVID-19

ជាតិ

រដ្ឋទទួលបានថវិកាជាង៥៧លានដុល្លារ ពីសប្បុរសជន សម្រាប់ទិញវ៉ាក់សាំងកូវីដ-១៩ ខណៈចិននឹងផ្តល់ជំនួយខែក្រោយ

20, Jan 2021 , 11:18 am

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ គិតត្រឹមថ្ងៃទី១៩ មករា រដ្ឋាភិបាលទទួលបានថវិកាជាង៥៧លានដុល្លារអាមេរិក ពីសប្បុរសជន សម្រាប់ទិញវ៉ាក់សាំងកូវីដ-១៩ ដើម្បីយកមកប្រើប្រាស់ចាក់ការពារពលរដ្ឋ។ សម្ដេចនាយករដ្ឋមន្ត្រី ហ៊ុន សែន បានប្រកាសឈប់ទទួលថវិកាពីសប្បុរសជន ដែលមានបំណងចូលរួមវិភាគទានទិញវ៉ាក់សាំងនេះហើយ កាលពីថ្ងៃទី១៥ មករា។

ចុចទីនេះដើម្បីទទួលបានព័ត៌មានរហ័ស

ថវិកាដែលរដ្ឋាភិបាលទទួលបានពីសម្បុរសជននេះ គឺកើតឡើងក្រោយពីសម្ដេច ហ៊ុន សែន ប្រកាសកាលពីថ្ងៃទី៧ ធ្នូ ២០២០ថា កម្ពុជាត្រៀមកញ្ចប់ថវិកាទិញវ៉ាក់សាំងកូវីដ-១៩ ចំនួន១លានដូស សម្រាប់យកមកចាក់ការពារពលរដ្ឋ៥០ម៉ឺននាក់ដំបូង ។ ក្រោយសម្ដេច ប្រកាសបែបនេះ ស្រាប់តែមានសប្បុរសជន រួមទាំងអង្គព្រះមហាក្សត្រ ឧកញ៉ា ឯកឧត្តម និងពលរដ្ឋ ចូលវិភាគទានជាបន្តបន្ទាប់។

ជុំវិញករណីថវិកាសម្បុរសជននេះ ក៏មានការរិះគន់រដ្ឋាភិបាលផងដែរ ជាពិសេសពីសំណាក់លោក សម រង្ស៊ី មេដឹកនាំអតីតគណបក្សសង្គ្រោះជាតិ ដែលកំពុងរស់នៅក្រៅប្រទេស។ លោក សម រង្ស៊ី ចោទរដ្ឋាភិបាលថា ប្រើលេសទិញវ៉ាក់សាំង ដើម្បីប្រមូលលុយពីពលរដ្ឋ ខណៈវ៉ាក់សាំងនេះ មិនមែនជាទំនិញក្នុងទីផ្សារ ដែលអាចទិញបានងាយៗ ដូចជា«នំអាកោរ»ឡើយ។ ប៉ុន្តែការរិះគន់របស់លោក សម រង្ស៊ី ដែលទាញព្រះមហាក្សត្រភ្ជាប់នឹងករណីទិញវ៉ាក់សាំងនេះ ក៏ត្រូវបានតុលាការកម្ពុជា ចោទមេដឹកនាំរូបនេះ ពីបទ«ប្រមាថព្រះមហាក្សត្រ»ផងដែរ។

អត្ថបទទាក់ទង

កម្ពុជា គ្រោងដាក់សំណើផ្លូវការទៅរុស្ស៊ី ដើម្បីសុំវ៉ាក់សាំងកូវីដ-១៩ ក្រៅពីចិន និងឥណ្ឌា

តុលាការ ចោទលោក សម រង្ស៊ី ពីបទប្រមាថព្រះមហាក្សត្រ ជាលើកទី៣ តាមអធិបញ្ជាពីក្រសួងយុត្តិធម៌

លោក សម រង្ស៊ី បន្តប្រមាថព្រះមហាក្សត្រ ,អ្នកវិភាគថា អ្នកនយោបាយហួសសម័យ ចូលចិត្តធ្វើឲ្យអ្នកដទៃឈឺចាប់

នាយករដ្ឋមន្ត្រី ថា មិនបានអង្គាសប្រាក់ សម្រាប់ទ្រទ្រង់ជាតិឡើយ

តែយ៉ាងណាសម្ដេច ហ៊ុន សែន អះអាងថា រដ្ឋាភិបាល មិនបានរ៉ៃអង្គាសប្រាក់ ទិញវ៉ាក់សាំងកូវីដ-១៩ ដើម្បីជាលេសយកប្រាក់សម្រាប់ប្រើប្រាស់ទ្រទ្រង់រដ្ឋ ក្នុងការបើកប្រាក់ខែឲ្យមន្ត្រីរាជការឡើយ។សម្ដេច ហ៊ុន សែន ចាត់ទុកការរិះគន់នេះ ជាការមើលស្រាលលើរដ្ឋាភិបាល ក្នុងការគ្រប់គ្រងប្រទេស ក្នុងបរិបទកូវីដ-១៩ រាតត្បាត។

កន្លងមកសម្ដេច ហ៊ុន សែន ធ្លាប់ប្រកាសថា កម្ពុជា នឹងទិញវ៉ាក់សាំងពីប្រទេសណា ដែលអង្គការសុខភាពពិភពលោក(WHO)ទទួលស្គាល់ជាផ្លូវការ។ ប៉ុន្តែស្រាប់តែយប់ថ្ងៃទី១៥ មករានេះ សម្ដេច ហ៊ុន សែន បានសម្រេចទទួលយកជំនួយវ៉ាក់សាំងពីប្រទេសចិន ១លានដូស ដែល WHO មិនទាន់ចុះបញ្ជីដាក់ឱ្យប្រើប្រាស់ទៅវិញ។ មូលហេតុដែលសម្ដេច សម្រេចយកវ៉ាក់សាំងបែបនេះ ក្រោមហេតុថា ការការពារសុខភាពប្រជាជន ជាអាទិភាពខ្ពស់ ដោយកម្ពុជាមិនអាចរង់ចាំបានទៀតទេ។

ខែកុម្ភៈខាងមុខនេះ ចិន នឹងផ្ដល់វ៉ាក់សាំងមកកម្ពុជា ៣០ម៉ឺនដូសសិន សម្រាប់ចាក់ការពារប្រជាពលរដ្ឋ ដែលមានសម្ដេច ហ៊ុន សែន ជាអ្នកស្ម័គ្រចិត្តចាក់មុនគេ។ ក្រៅពីចិន កម្ពុជា ក៏កំពុងរៀបចំសំណើទៅរដ្ឋាភិបាលឥណ្ឌា និងរុស្ស៊ី ដើម្បីសុំជំនួយវ៉ាក់សាំងទៀតផង។ នេះបើតាមការព្រលយរបស់សម្ដេច ទៀ បាញ់រដ្ឋមន្ត្រីក្រសួងការពារជាតិ កាលពីថ្ងៃទី១៨ មករា។

គិតត្រឹមថ្ងៃទី២០ មករានេះ កម្ពុជា មានអ្នកជំងឺកូវីដ-១៩ ចំនួន៤៤៨នាក់ ក្នុងនោះ៣៩២នាក់សះស្បើយ៕

Tag:

ហ៊ុន សែន

COVID-19