ភ្នំពេញ៖ វិស័យកសិកម្មនៅកម្ពុជាមានសក្ដានុពល តែខ្វះអ្នកដាក់ទុនវិនិយោគ។ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ថ្លែងបែបនេះ នៅក្នុងជំនួបលោកឆាវ អ៊ីនទ័រ ប្រតិភូក្រុមហ៊ុន Khmer Holding Group នៅថ្ងៃទី២០ មករានេះ។
លោក វេង សាខុន បានពន្យល់ប្រាប់ភាគីក្រុមហ៊ុនចិន ក្នុងន័យនេះថា ដ្បិតកម្ពុជា មានសក្តានុពលលើវិស័យកសិកម្មក្តី ប៉ុន្តែមិនទាន់ត្រូវបានប្រើប្រាស់ឱ្យអស់សក្ដានុពល ដើម្បីប្រកួតប្រជែងក្នុងទីផ្សារនៅឡើយ។ តាមរយៈសំណេរលើហ្វេសប៊ុកផ្លូវការរបស់រដ្ឋមន្ត្រីកសិកម្ម បានសរសេរដូច្នេះថា៖ «កសិកម្មកម្ពុជាមានសក្តានុពល តែយើងនៅខ្វះវិនិយោគិនក្នុង និងក្រៅប្រទេស ដើម្បីប្រើប្រាស់សក្តានុពលដែលយើងមានឲ្យអស់លទ្ធភាព សំដៅលើកស្ទួយផលិតភាពផលិតកម្ម ប្រកួតប្រជែក កែច្នៃ និងនាំចេញឆ្លើយតបតាមតម្រូវការទីផ្សារគឺស្តង់ដារផលិត ធានាបរិមាណផ្គត់ផ្គង់ គុណភាព សុវត្ថិភាព និងការប្រកួតប្រជែងតម្លៃ»។
បើនិយាយសក្ដានុពលកសិកម្មកម្ពុជា គឺមានច្រើនដូចជាធនធានធម្មជាតិ អាកាសធាតុអំណោយ តំបន់ និងដីជាដើម ។ ប៉ុន្តែបើនិយាយពីផលវិជ្ជមានវិញ គឺមានច្រើនដែរ ដូចជា ខ្វះហេដ្ឋារចនាសម្ព័ន្ធរូបវ័ន្ត ប្រព័ន្ធធារាសាស្ត្រ ជាពិសេសអគ្គិសនី តម្លៃប្រេង និងថ្លៃដើមនៃការផលិតផ្សេងទៀត ត្រូវការចំណាយខ្ពស់ ដែលជះឥទ្ធពលមិនល្អ ដល់ការវិនិយោគ។ នេះជាការមើលឃើញរបស់លោក យ៉ង់ សាំងកុមារ អ្នកជំនាញកសិកម្ម។
ត្រង់ចំណុចនេះលោក យ៉ង់ សាំងកុមារ បានបញ្ជាក់ថា រដ្ឋាភិបាលគួរតែរៀបចំដោះស្រាយបញ្ហាទាំងនេះ សម្រាប់អ្នកវិនិយោគទាំងអស់ រាប់ទាំងបញ្ហាកសិករ បញ្ញវ័ន្ត និងសហគ្រិនធុនតូច និងមធ្យម ដែលធ្វើជំនួញកសិកម្ម ដោយមិនមែនដោះស្រាយតែអ្នកវិនិយោគធំៗនោះទេ ។
ថ្លែងប្រាប់សារព័ត៌មានថ្មីៗ អ្នកជំនាញកសិកម្មរូបនេះ និយាយដូច្នេះថា៖«ជារួមការវិនិយោគក្នុងវិស័យកសិកម្មនេះ វាមានច្រើនរួចហើយ តែសំខាន់តើ(រដ្ឋាភិបាល)យើងមានបើកចំហរលក្ខខណ្ឌយ៉ាងម៉េចខ្លះ ដើម្បីឱ្យអ្នកវិនិយោគទុនគេអាចមករកស៊ីបានចំណេញ។ ចំពោះខ្ញុំ គឺត្រូវចាប់ផ្ដើមពីគ្រួសារកសិករតូចតាច ឬក៏អ្នកវិនិយោគក្នុងស្រុក ដើម្បីបង្កលក្ខខណ្ឌងាយស្រួល សម្រាប់ពួកគាត់ តាំងពីផ្លូវគមនាគមន៍ តាំងពីថ្លៃដើមនៃការផលិត ថ្លៃជី អគ្គិសនី ប្រេង និងដឹកជញ្ជូន»។
សម្រាប់លោក យ៉ង់ សាំងកុមារ បើរដ្ឋាភិបាលយកចិត្តទុកដាក់ខ្ពស់លើកសិករ និងសហគ្រាសធុនតូច និងមធ្យមនោះ សន្ទុះកសិកម្មនៅកម្ពុជា នឹងកាន់តែរីកចម្រើនទៀត ដោយមិនបាច់រង់ចាំតែការវិនិយោគពីបរទេសនោះទេ។ «វាទាមទារឱ្យមានការបើកផ្លូវឱ្យធំទូលាយ ដោយមិនចាំបាច់តែអ្នកវិនិយោគក្រៅប្រទេសទេ ។ (រដ្ឋគួរតែជួយ) អ្នកវិនិយោគក្នុងប្រទេស ដោយជួយគាំទ្រកសិករខ្នាតតូច ខ្នាតមធ្យមឱ្យបានច្រើនទៅ ក៏វាជួយបានច្រើនដែរ កុំចាំតែគេមានលុយពីក្រៅប្រទេសទាំងលានៗដុល្លារ បានធ្វើឱ្យកសិកម្មរីកចម្រើនោះ តែកសិករយើងតូចតាច ខ្នាតតូចនិងខ្នាតមធ្យមនៅក្នុងប្រទេសក៏អាចធ្វើឱ្យរីកចម្រើននៅក្នុងប្រទេសបានដែរ»។ នេះបើតាមលោក កុមារ ដែលចង់ឃើញរដ្ឋាភិបាលជួយកសិករ និងសហគ្រាសខ្មែរ ច្រើនជាងរំពឹងការវិនិយោគពីបរទេស លើវិស័យកសិកម្មនេះ។
កន្លងមករដ្ឋាភិបាលកម្ពុជា ទម្លាក់កញ្ចប់ថវិកាពិសេស៥០លានដុល្លារ សម្រាប់ជួយដោះស្រាយបញ្ហាបង្វិលទុន និងវិនិយោគរបស់សហគ្រាសធនតូច និងមធ្យម (SME) ពាក់ព័ន្ធវិស័យកសិកម្ម ក្នុងស្ថានភាព ដែលកម្ពុជាកំពុងជួបបញ្ហាពីការដកផ្នែកខ្លះនៃប្រព័ន្ធអនុគ្រោះពន្ធ EBA និងជំងឺកូវីដ-១៩។ កញ្ចប់ថវិកា៥០លានដុល្លារនោះ ត្រូវបានរដ្ឋាភិបាលផ្តល់ជូន តាមរយៈធនាគារអភិវឌ្ឍន៍ជនបទនិងកសិកម្ម (ARDB)។
សហគ្រាសកែច្នៃផលិតផលកសិកម្មនីមួយៗ អាចមានលទ្ធភាពខ្ចីថវិការដ្ឋាភិបាលនេះ បានចាប់ពី៥ពាន់ដុល្លារ ដល់៣០ម៉ឺនដុល្លារ សម្រាប់បង្វិលទុន និងពង្រីកការវិនិយោគ។សម្រាប់ម្ចាស់សហគ្រាស និងកសិករដែលខ្ចីឥណទានពិសេសនេះយកទៅវិនិយោគ គឺមានអត្រាការប្រាក់៥,៥ភាគរយ និងខ្ចីសម្រាប់ធ្វើជាទុនបង្វិល គឺមានអត្រាការប្រាក់ត្រឹម៥ភាគរយប៉ុណ្ណោះក្នុងមួយឆ្នាំ។
ក្រៅពីទម្លាក់ថវិកាទាំងនេះ សម្ដេច ហ៊ុន សែន កន្លងមក ក៏បានបញ្ជាឱ្យរដ្ឋមន្ត្រីកសិកម្ម បញ្ឌូនមន្ត្រីជំនាញ ចុះទៅបណ្ដុះបណ្ដាលបច្ចេកទេសជូនពលរដ្ឋ និងកសិករបន្ថែម លើផ្នែកកសិកម្មទៀតផង ដើម្បីជួយពួកគេដោះស្រាយបញ្ហាជីវភាពតាមរយៈកសិកម្មនេះ៕