ជាតិ
នយោបាយជាតិ
លោក សាម អ៊ីន សមាជិកស្ថាបនិកនៃបណ្តាញសង្គមខ្មែរដើម្បីខ្មែរ
×![]()
សមាជិកបណ្តាញសង្គមខ្មែរដើម្បីខ្មែរជាង៨០នាក់ នឹងជួបជុំគ្នានៅថ្ងៃអាទិត្យទី២សីហា ដើម្បីអនុម័តគោលការណ៍សំខាន់ៗ និងគណៈកម្មការបណ្តោះអាសន្នមួយ ដែលជាផ្នែកមួយនៃដំណើរការរៀបចំបង្កើតគណបក្សប្រជាធិបតេយ្យមូលដ្ឋាន។ ប្រធានអង្គការសង្គមស៊ីវិលជាច្រើនគឺជាអ្នកផ្តួចផ្តើមគំនិតបង្កើត និងដឹកនាំគណបក្សនយោបាយថ្មីមួយនេះ។
តាមការគ្រោងទុក គណៈកម្មការបណ្តោះអាសន្នដែលចេញពីបណ្តាញសង្គមខ្មែរដើម្បីខ្មែរ នឹងដាក់លិខិតស្នើសុំបង្កើតគណបក្ស «ប្រជាធិបតេយ្យមូលដ្ឋាន» ទៅក្រសួងមហាផ្ទៃនៅថ្ងៃចន្ទទី៣សីហាដើមសប្តាហ៍ក្រោយនេះ។ លោក សាម អ៊ីន សមាជិកស្ថាបនិកនៃបណ្តាញសង្គមខ្មែរដើម្បីខ្មែរ បានបញ្ជាក់ព័ត៌មាននេះ ប្រាប់សារព័ត៌មានថ្មីៗ នៅព្រឹកថ្ងៃទី២៧ កក្កដានេះ។
បណ្តាញសង្គមខ្មែរដើម្បីខ្មែរ គឺជាបណ្តុំនៃក្រុមថ្នាក់ដឹកនាំអង្គការសង្គមស៊ីវិលមួយចំនួនដែលបានបង្ហើបអំពីបំណងបង្កើតគណបក្សនយោបាយ បន្ទាប់ពីពួកគេខកចិត្តនឹងគណបក្សសង្គ្រោះជាតិ។ ស្ថាបនិកនៃបណ្តាញសង្គមខ្មែរដើម្បីខ្មែរដែលត្រូវបានគេបង្ហាញតាមមុខនៅតាមបណ្តាញសង្គមហ្វេសប៊ុក នៅពេលដែលពួកគេជួបជុំគ្នាម្តងៗនោះ រួមមាន លោក យ៉ង់ សាំងកុមារ លោក យ៉េង វីរៈ លោក សាម អ៊ីន លោក កែម ឡី ជាដើម។
ដោយសារតែជាក្រុមបញ្ញវន្តជំនាញជាន់ខ្ពស់ ក្រុមអ្នកផ្តួចផ្តើមគំនិតបង្កើតគណបក្ស ប្រជាធិបតេយ្យមូលដ្ឋាននេះ ហាក់មិនសូវបារម្ភអំពីឧបសគ្គក្នុងក្របខណ្ឌនៃនីតិវិធីច្បាប់ឡើយ ដែលធ្វើឲ្យរាំងស្ទះដំណើរការបង្កើតគណបក្សនោះឡើយ។ លោក សាម អ៊ីន បានពន្យល់ប្រាប់សារព័ត៌មានថ្មីៗយ៉ាងដូច្នេះថា៖«យើងបានសិក្សាស្វែងយល់អំពីច្បាប់ស្តីគណបក្សនយោបាយហើយ។ យើងបានត្រៀមរៀបចំទៅតាមនីតិវិធីទាំងនោះ»។
ក្តីបារម្ភតែមួយនោះគឺ ស្លាកសញ្ញាគណបក្សដែលអាចស្រដៀងនឹងគណបក្សចាស់ៗ ហើយដែលក្រសួងមហាផ្ទៃអាចស្នើឲ្យកែសម្រួល។ ប៉ុន្តែបើតាមលោក សាម អ៊ីន ក្រុមស្ថាបនិកគណបក្សថ្មីនេះ សង្ឃឹមថាវានឹងមិនមានបញ្ហាចំពោះស្លាកសញ្ញាគណបក្សនេះ ដែលពួកគេស្រឡាញ់ពេញចិត្តខ្លាំងនោះទេ។
ដោយសារតែវាមិនទាន់ជាស្លាកសញ្ញាគណបក្សផ្លូវការនៅឡើយនោះ លោក សាម អ៊ីន មិនទាន់អាចបង្ហាញរូបភាពស្លាកសញ្ញាគណបក្សនេះនៅឡើយទេ។ លោកគ្រាន់តែបង្ហើបថា វាមានរូបត្រីកោណ និងមានពណ៌បៃតងដែលតំណាងឲ្យវិស័យកសិកម្ម ប្រជាធិបតេយ្យ ធម្មជាតិ និងមានពណ៌ក្រហមដែលតំណាងឲ្យភាពយុត្តិធម៌ជាដើម។
Tag:
លោក កែម ឡី
© រក្សាសិទ្ធិដោយ thmeythmey.com
