ខណៈរដ្ឋាភិបាលប៉ាពូអាស៊ីនូវែលហ្គីណេមិនបានបង្ហាញពីព័ត៌មានរបស់អ្នកស្លាប់ក្នុងគ្រោះ រញ្ជួយដី​៧,៦រ៉ិចទ័រ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) នៅតំបន់អាស៊ី និងប៉ាស៊ីហ្វិក អះអាងនៅថ្ងៃទី១១ ខែកញ្ញាថា មនុស្សយ៉ាងតិច៤នាក់ បាន​ស្លាប់ និង​៤​នាក់ផ្សេងទៀតបានរងរបួស។

 

យោងតាមការវាស់ស្ទង់របស់ភូគព្ភភូមិសាស្ត្រអាម៉េរិក​ ​គ្រោះរញ្ជួយដីនេះបានវាយប្រហារនៅជម្រៅ៦១ គីឡូម៉ែត្រ និងចម្ងាយប្រហែល៦៧គីឡូម៉ែត្រពីទីប្រជុំជនក្រុង Kainantu របស់កោះនេះ។ ក្នុង​របាយការណ៍មួយផ្សេងទៀតដែលបានបង្ហោះលើបណ្ដាញសង្គម Twitter ស្ថាប័ន OCHA បញ្ជាក់ថា មនុស្សម្នាក់បានស្លាប់ដោយសារការបាក់ដីនៅខណ្ឌ Rai Coast ក្រុង Madang ខណៈមនុស្ស៣នាក់ ទៀតស្លាប់នៅក្រុង Wau ខេត្ត Morobe។

 

របាយការណ៍ដដែលនោះបន្តថាបណ្តាញអគ្គិសនីក្នុងតំបន់ ខ្សែអ៊ីនធឺណិត និងផ្លូវហាយវេក្នុង តំបន់​ត្រូវ​បានខូចខាត ប៉ុន្តែអាកាសយានដ្ឋាននៅតែកំពុងដំណើរការ។

 

«ទីនេះមានការខូចខាតយ៉ាងច្រើន»។ សមាជិកសភាក្នុងស្រុកលោកស្រី Kessy Sawang បានប្រាប់​ទីភ្នាក់ងារ AFP បែបនេះរួចបន្តថា ការរអិលបាក់ដីបានកប់ និងបំផ្លាញផ្ទះប្រជាជននៅក្នុងភូមិ​មួយថែមទៀត។

 

ប្រព័ន្ធទំនាក់ទំនងនៅមានកម្រិតនៅក្នុងតំបន់ដែលរងគ្រោះមហន្តរាយ ហើយធនធានរដ្ឋាភិបាល​តិច​តួច ធ្វើឱ្យការវាយតម្លៃការខូចនិងកិច្ចខិតខំជួយសង្គ្រោះមានការលំបាក។ ក្រុមហ៊ុន​អាកាសចរណ៍​តូចៗ និងក្រុមអ្នកផ្សព្វផ្សាយសាសនា បានចូលរួមនៅក្នុងការជួយសង្គ្រោះអ្នករងរបួស​មួយ​ចំនួន​ដែរ។

 

ស្ថិតនៅលើវង់ភ្នំភ្លើងនៃមហាសមុទ្រប៉ាស៊ីហ្វិក ប៉ាពូអាស៊ីនូវែលហ្គីណេតែងបានរងគ្រោះ ដោយ​សារ​ការ​រញ្ជួយដីជាញឹកញាប់៕